މެލްބާން، އޮސްޓްރޭލިއާ (ޖެނުއަރީ 31) - މިހާރު ކުރިއަށްދާ އަހަރުގެ ފުރަތަމަ ގްރޭންޑް ސްލޭމް ޓެނިސް މުބާރާތް، އޮސްޓްރޭލިއަން އޯޕަންގެ ފައިނަލުގައި ސާބިއާގެ ނޮވަކް ޖޮކޮވިޗް އާއި ސްޕެއިނުގެ ކާލޯސް އަލްކަރާޒް ބައްދަލުުކުރަން ޖެހިއްޖެ އެވެ.
އަލްކަރާޒް، ކެރިއަރުގައި ފުރަތަމަ ފަހަރަށް އޮސްޓްރޭލިއަން އޯޕަން ފައިނަލަށް ދަތުރުކުރީ، ސެމީ ފައިނަލުގައި ފަސް ސެޓު ކުޅެގެން، ޖަރުމަނުގެ އަލެކްސަންޑަ ޒްވެރެވް ބަލިކޮށްފަ އެވެ. ފަސް ގަނޑިއިރާއި 27 މިނިޓަށް ދިގުދެމިގެންދިޔަ މި މެޗުން އަލްކަރާޒް މޮޅުވިއިރު، ސެޓުތައް ދިޔައީ، 6-4 7-6 (7-5) 6-7 (3-7) 6-7 (4-7) 7-5 އިންނެވެ.
ޖޮކޮވިޗް، 11 ވަނަ ފަހަރަށް އޮސްޓްރޭލިއަން އޯޕަން ފައިނަލަށް ދަތުުރުކުރީ، އެންމެ ފަހުގެ ޗެމްޕިއަން، އިޓަލީގެ ޖަނިކް ސިނާ، ފަސް ސެޓު ކުޅެގެން ބަލިކޮށްފަ އެވެ. މިއީ، 19 މެޗަށް ފަަހު އޮސްޓްރޭލިއަން އޯޕަންގައި ސިނާ ބަލިވި ފުރަތަމަ ފަހަރެެވެ. އަނެއްކޮޅުން، 2024 ވަނަ އަހަރުގެ ވިމްބަލްޑަން އަށް ފަހު، ޖޮކޮވިޗްގެ ފުރަތަމަ ގްރޭންޑް ސްލޭމް ފައިނަލް އެވެ.
ސިނާ އަތުން މޮޅުވިއިރު، ޖޮކޮވިޗް ވަނީ ތަފާތު ރޫހެއް ދައްކައިފަ އެވެ. އެންމެ ފަހުން ދެ އޮސްޓްރޭލިއަން އޯޕަން ވެސް ކާމިޔާބުކުރި ސިނާއާ އެކު ޖޮކޮވިޗް ކުޅުނު މެޗުގައި ސެޓުތައް ގެންދިޔައީ، 3-6 6-3 4-6 6-4 6-4 އިންނެވެ. މިއީ، ސިނާ އަތުން ފަސް މެޗަށް ފަހު ޖޮކޮވިޗަށް ލިބުނު ފުރަތަމަ މޮޅެވެ.
މިހާތަނަށް އަލްކަރާޒް އާއި ޖޮކޮވިޗް ވަނީ ހަތަރު ފައިނަލެއްގައި ބައްދަލުކޮށްފަ އެވެ. އެ ގޮތުން، އެންމެ ފުރަތަމަ 2023 ވަނަ އަހަރުގެ ވިމްބަލްޑަން ފައިނަލުގައި އަލްކަރާޒް މޮޅުވި އެވެ. އޭގެ ފަހުން، އެ އަހަރުގެ ސިންސިނާޓީ ފައިނަލުގައި، ޖޮކޮވިޗް ކާމިޔާބު ހޯދިއިރު، 2024 ގެ ވިމްބަލްޑަން ފައިނަލުގައި މޮޅުވީ އަލްކަރާޒް އެވެ. އެކަމަކު، އެންމެ ފަހުން މި ދެ ކުޅުންތެރިން ކުޅުނު ޕެރިސް އޮލިމްޕިކްސްގެ ސިންގަލްސް ފައިނަލުގައި އަލްކަރާޒް އަތުން ޖޮކޮވިޗް މޮޅުވި އެވެ. އެންމެ ފަހުން މި ދެ ކުޅުންތެރިން ވާދަކުރީ މިދިޔަ އަހަރުގެ ޔޫއެސް އޯޕަން ސެމީ ފައިނަލުގަ އެެވެ. އެ މެޗުން މޮޅުވީ އަލްކަރާޒް އެވެ.
އަލްކަރާޒް އާއި ޖޮކޮވިޗް ބައްދަލުކުރާ ފައިނަލް މެޗު އޮތީ މާދަމާ މެންދުރު 13:30 ގަ އެވެ.
