ބާސެލޯނާ (މެއި 18) - ސްޕެނިޝް ލީގުގައި ރޭ ރެއާލް ބެޓިސް އަތުން 3-1 އިން މޮޅުވެ، ބާސެލޯނާ އިން ފުރިހަަމަ ރެކޯޑެއް ހާސިލްކުރިއިރު، ރެއާލް މެޑްރިޑުން 1-0 އިން ސެވިއްޔާ އަތުން މޮޅެއް ހޯދައިފި އެވެ.
ބާސެލޯނާ އަކީ ސްޕެނިޝް ލީގުގެ ތާރީހުގައި، 38 މެޗު ކުޅޭ ލީގު ސީޒަނެއްގައި އަމިއްލަ ދަނޑުގައި ކުޅުނު 19 މެޗުން ވެސް މޮޅުވި ފުރަަތަމަ ޓީމެވެ. މީގެ އިތުރުން، އަމިއްލަ ދަނޑުގައި ފުރިހަމަަ ރެކޯޑަކާ އެކު. ލީގު ޗެމްޕިއަންކަން ހޯދި 11 ވަނަ ޓީމެވެ. ރެއާލް މެޑްރިޑުން 1985/1986 ސީޒަނުގައި އަމިއްލަ ދަނޑުގައި 17 މެޗުން މޮޅުވެ ޗެމްޕިއަންކަން ހޯދި އެވެ. ބާސެލޯނާ އިން އަމިއްލަ ދަނޑުގައި 15 މެޗުން މޮޅުވެ، ފުރިހަަމަ ރެކޯޑަކާ އެކު ލީގު ހޯދީ 1959/1960 ވަނަ ސީޒަނުގަ އެވެ.
ލީގު ޗެމްޕިއަންކަން ޔަގީންކޮށްފައިވާ ބާސެލޯނާ އިން އަމިއްލަ ދަނޑުގައި ފުރިހަމަ ރެކޯޑަކާ އެކު ލީގު ނިންމާލާއިރު، އެ ޓީމުން ވަނީ 37 މެޗުން 94 ޕޮއިންޓް ހޯދައިފަ އެވެ. ދެ ވަނައިގައި އޮތް ރެއާލް މެޑްރިޑަށް 37 މެޗުން ލިބިފައިވަނީ 83 ޕޮއިންޓެވެ.
ލީގުގެ ތިން ވަނައިގައި އޮތް ވިޔަރެއާލުން. ރޭ ރަޔޯ ވަޔެކާނޯ އަތުން 2-0 އިން ބަލިވިއިރު، ހަތަރެއްގައި އޮތް އެތުލެޓިކޯ މެޑްރިޑުން ވަނީ 1-0 އިން ޖިރޯނާގެ މައްޗަށް ކުރިހޯދައިފަ އެވެ. ލީގުގެ ފަހު މެޗާ ކުރިމަތިލާއިރު، ވިޔަރެއާލާއި އެތުލެޓިކޯ އަށް ވެސް 37 މެޗުން ލިބިފައި އޮތީ 69 ޕޮއިންޓެވެ. ވިޔަރެއާލަށް ކުރި ލިބެނީ ފައިދާ ގޯލު އެއްވަރުވެފައިވާތީވެ، ޖެހި ގޯލުންނެވެ.
ބާސެލޯނާ އަށް ރޭގެ މެޗުގެ 28 ވަަނަ މިނިޓްގައި ރަފީނިއާ ޖަހައިދިން ގޯލުން ލީޑުނެގިއިރު، ފުރަތަމަ ހާފު ނިންމާލީ ކުރީގައި އޮވެ އެވެ. މެޗުގެ 62 ވަނަ މިނިޓްގައި ބާސެލޯނާގެ ދެ ވަނަ ލަނޑު ޖެހީ ވެސް ރަފީނިއާ އެވެ. އެކަމަކު، އޭގެ ނުވަ މިނިޓް ފަހުން، 69 ވަނަ މިނިޓްގައި އިސްކޯ ވަނީ ޕެނަލްޓީ އަކުން ބެޓިސްގެ ލަނޑު ޖަހައި، ފަރަގުކުޑަކޮށްފަ އެވެ. މިއީ، އިސްކޯ އަށް ބާސެލޯނާގެ ގަވީ ކުރި ފައުލަކަށް ދިން ޕެނަލްޓީ އެކެވެ.
މެޗުގެ ތިންް ޕޮއިންޓް ބާސެލޯނާ އިން ޔަގީންކުރީ 74 ވަނަ މިނިޓްގައި ޕެޑްރީ ތަނަވަސްކޮށްދިން ފުރުސަތެއްގައި ޖޮއާއޯ ކަންސޭލޯ ޖެހި ގޯލުންނެވެ.
ސެވިއްޔާ ދަނޑުގައި ރޭ ރެއާލުން މޮޅުވި މެޗުަގައި ފެނިގެންދިޔަ ހަމައެކަނި ލަނޑު ޖެހީ މެޗުގެ 15 ވަނަ މިނިޓްގަ އެވެ. މިއީ، ކީލިއަން އެމްބާޕޭ ބައިވެރިވެގެން ތަނަވަސްކޮށްދިން ފުރުސަތެއްގައި ވިނީޝިއުސް ޖޫނިއާ ޖެހި ގޯލެކެވެ. މިއީ، މި ފަހަރުގެ ސީޒަނުގައިި ވިނީޝިއުސް ޖެހި 22 ވަނަ ލަނޑެވެ.
