މެޑްރިޑް (މެއި 15) - ސްޕެނިޝް ލީގުގައި ރޭ ރެއާލް އޮވިއޭޑޯ އަތުން 2-0 އިން ރެއާލް މެޑްރިޑް މޮޅުވި މެޗުގައި އެ ޓީމުގެ ތަރި، ކީލިއަން އެމްބާޕޭ، އެނބުރި ކުޅުމަށް އައިއިރު، އޭނާ އަށް ރެއާލް ސަޕޯޓަރުންގެ ނުރުހުން ވަނީ އަމާޒުވެފައި.
އެމްބާޕޭ، އެ ކްލަބުން ބޭރުކުރަން ގޮވާލައި، ރެއާލްގެ ސަޕޯޓަރުންގެ ބަޔަކު ތައްޔާރުކުރި އޮންލައިން ޕެޓިޝަނެއްގައި 50 މިލިއަނަށް ވުރެން ގިނަ ސޮއި މިހާތަނަށް ވަނީ ހަމަވެފަ އެވެ. ޖެހިޖެހިގެން ދެ ވަނަ ސީޒަނުގައި ރެއާލުން ތަށްޓެއް ނުލިބި ސީޒަން ނިންމާލުމާ ގާތުގައި އޮތްއިރު، ދާދި ފަހުން އެމްބާޕޭ އަށް ލިބުނު އަނިޔާއެއްގެ ސަބަބުން، އޭނާ މި ވަގުތު ހުރީ ކުޅުމާ ދުުރުގަ އެވެ. އެކަމަކު، އަނިޔާގެ ރިކަވަރީ މުއްދަތުގެ ތެރޭގައި، ލޯބިވެރިޔާއާ އެކު، އެމްބާޕޭ، އިޓަލީ އާއި ފްރާންސްގައި ޗުއްޓީ ހޭދަކުރި ފޮޓޯ އާއި ވީޑިއޯތަކެއް ސޯޝަލް މީޑިއާ އާއި މެއިންސްޓްރީމް މީޑިއާތަކުގައި ދައުރުވާން ފެށުމާ އެކު، ރެއާލް ސަޕޯޓަރުންގެ ކެތްތެރިކަން ކޮޅުންލީ އެވެ.
ފުރަތަަމަ ހާފުގައި ގޮންޒާލޯ ގާސިއާގެ ގޯލުން ރެއާލުން ލީޑުނެގި މި މެޗުގައި، އެމްބާޕޭ ކުޅެން އަރައި، 80 ވަނަ މިނިޓްގައި ރެއާލްގެ ޖޫޑް ބެލިންހަމް ޖެހި ގޯލަށް ވަނީ ފުރުސަތު ތަނަވަސްކޮށްދީފަ އެވެ. އެމްބާޕޭ، ކުޅެެން އެރީ 69 ވަނަ މިނިޓްގަ އެވެ.
ސަޕޯޓަރުންގެ ނުރުހުމުގެ ޝުއޫރުތަކުގެ ވާހަަކަ އެހުމުން އެމްބާޕޭ ބުނެފައިވަނީ، ބަޔަކު ރުޅި ގަދަވެފައި ހުއްޓަައި ކުއްލިއަކަށް އެ މީހުންގެ ރުހުން ހޯދުން ވާނީ އުނދަގޫ ކަމަކަށް ކަމަށެވެ.
"އެއީ، ރެއާލް މެޑްރިޑްގެ ކުޅުންތެރިއަކަށް، އަމުދުން އަހަރެން ކަހަލަ މަޝްހޫރު ކުޅުންތެރިއަކަށް ދިމާވާނެ ކަހަލަ ކަންކަން. ފުޓްބޯޅަ ކުޅުންތެރިންނަށް ހުރިހާ ކަމެއް އެނގުމަކީ ވެސް ވާނެ ކަމެއް ނޫން. ޖެހޭނީ ކެތްތެރިކަމާ އެކު ކުރިމަަތިލައި މަސައްކަތް ކޮށް ހާލަތު ބަދަލުކުރަން،" މި ސީޒަނުގައި 41 މެޗުން 41 ލަނޑު ޖަހާފައިވާ އެމްބާޕޭ ބުންޏެވެ.
ރޭގެ މޮޅާ އެކު، ލީގުގެ ދެ ވަނައިގައި އޮތް ރެއާލަށް ވަނީ 36 މެޗުން 80 ޕޮއިންޓް ލިބިފަ އެވެ.
