ކުޑަކުދިންގެ ދުވަހާ ގުޅުވައިގެން ކުޑަކުދިންގެ ލޮލުގެ ސިއްހަތު ދެނެގަތުމަށާއި، ލޮލުގެ މައްސަލަތަކަށް އަވަސް ފަރުވާ ހޯދުމަށް ހިތްވަރު ދިނުމުގެ ގޮތުން އައިކެއާ ހޮސްޕިޓަލުން ހާއްސަ ޕެކޭޖުތަކެއް ތައާރަފްކޮށްފި އެވެ.
އައިކެއާއިން ބުނީ ކެމްޕެއިނުގެ ދަށުން "ބްރައިޓް އައިސް – ބޭސިކް" އަދި "ބްރައިޓް އައިސް – އެޑްވާންސް" ގެ ނަމުގައި ދެ ޕެކޭޖެއް ތައާރަފުކޮށްފައިވާއިރު، އެ ޕެކޭޖުތަކުން އިންޝުއަރެންސަށް ކެނޑެމަށްފަހު 30 ޕަސަންޓުގެ ޑިސްކައުންޓް ލިބޭނެ ކަމަށެވެ
ބްރައިޓް އައިސް - ބޭސިކް ޕެކޭޖުގެ ދަށުން ލޮލުގެ ފެނުން ޓެސްޓުކުރުމާއި، ލޮލުގެ ނަންބަރު ބެލުން އަދި ލޮލުގެ ހާއްސަ ޑޮކްޓަރަށް ދެއްކެ އެވެ. ބްރައިޓް އައިސް - އެޑްވާންސް ޕެކޭޖުގެ ދަށުން ލޮލުގެ ހާއްސަ ޑޮކްޓަރަށް ދެއްކުމާއި، ލޮލުގެ ފެނުން ޓެސްޓުކުރުމާއި، ލޮލުގެ ނަންބަރު ބެލުމާއި، ކޯނިއަލް ޓޮޕޮގްރަފީ އަދި ފަންޑަސް ފޮޓޯގްރަފީ ބެލުން ހިމެނެ އެވެ.
މި ކެމްޕޭނާ ގުޅޭގޮތުން އައިކެއާ އިން ބުނީ، މި ފުރުސަތަކީ ކުދިން ބޮޑުވަމުން އަންނަ ދުވަސްވަރު ލޮލުގެ ފެނުން ގަވާއިދުން ޗެކްކުރުމަށް ބާރުއެޅުމުގެ ގޮތުން ހުޅުވާލި ފުރުސަތެކެވެ. ހާއްސަކޮށް މިހާރަކަށް އައިސް ސްކްރީން ބޭނުންކުރާ މިންވަރު އިތުރުވުމާއި ކިޔެވުމުގެ ކަންކަމުގައި ލޮލަށް ކުރާ ބާރު ބޮޑުވުމުގެ ސަބަބުން ކުދިންގެ ލޮލުގެ ސިއްހަތަށް ބޮޑެތި އަސަރުތަކެއް ކުރަމުންދާކަން އެ ހޮސްޕިޓަލުން ފާހަގަކުރެ އެވެ.
ގިނަ ކުދިންނަށް ލޮލުގެ ފެނުމުގެ މައްސަލަތައް ހުރި ނަމަވެސް އެކަން ސާފުކޮށް ބުނެދޭން ނޭނގިދާނެ ކަމަށެވެ. މީގެ ސަބަބުން ކުއްޖާގެ އުނގެނުމަށާއި، ކަންކަމަށް ސަމާލުކަން ދިނުމަށް ބޮޑެތި ހުރަސްތަކެއް ކުރިމަތިވެއެވެ. އެހެންކަމުން މި ޕެކޭޖުތަކުގެ އެހީގައި ބެލެނިވެރިން ކުދިންގެ ލޮލުގެ ސިއްހަތަށް އިސްކަންދީ، ކުރިއަށް އޮތް ތަނުގައި ދިމާވެދާނެ މައްސަލަތަކުން ސަލާމަތްވުމަށް މަގުފަހިވާނެ އެވެ.
މި ޕެކޭޖުތައް ހާއްސަކޮށްފައިވަނީ 18 އަހަރުން ދަށުގެ ކުދިންނަށެވެ. އަދި މި ޕެކޭޖުތަކުގެ ދަށުން ދައްކަންޖެހޭނީ ކުޑަކުދިންގެ ލޮލުގެ ހާއްސަ ޑޮކްޓަރުންނަށެވެ. މެއި 10، އިން ފެށިގެން ވަކި މުއްދަތަކަށް ކުރިއަށްދާ މި ޕްރޮމޯޝަންގެ ދަށުން ޑޮކްޓަރަށް ދެއްކުމަށްޓަކައި ކުރިން އެޕޮއިންޓްމަންޓް ހެއްދުމަށް އައިކެއަރއިން އިލްތިމާސްކުރެ އެވެ.
އައިކެއާއިން އެޕޮއިންޓްމަންޓް ހެދުމަށް އެތަނުގެ ވެބްސައިޓުގެ އިތުރުން ވައިބާ އާއި ވަޓްސްއަޕް މެދުވެރިކޮށް 7201026 ނަންބަރާ މުއާމަލާތް ކުރުމަށް އެތަނުން ވަނީ އެދިފަ އެވެ.
