ޗައިނާގެ ނިންބޯގައި މިއަދު ފެށި ބެޑްމިންޓަން އޭޝިއާ ޗެމްޕިއަންޝިޕްގެ އަންހެން ސިންގަލްސް ގްރޫޕް ސްޓޭޖުގައި ކުޅުނު ދެ މެޗުން ވެސް ފުރިހަމަ މޮޅެއް ހޯދައި، ރިވައިވަލް ސްޕޯޓްސް އާއި ގައުމީ ބެޑްމިންޓަން ޓީމުގެ ތަރި، ފާތިމަތު ނަބާހާ (ނަބާ)، އޭޝިއާގެ އަންހެން ސިންގަލްސް ގަދަ 32 ކުޅުންތެރިންގެ ބުރުން ޖާގަ ހޯދައިފި އެވެ.
މިއީ، ރާއްޖޭގެ ކުޅުންތެރިއަކު އޭޝިއާގެ އެންމެ ބޮޑު ބެޑްމިންޓަން މުބާރާތުގެ އަންހެން ސިންގަލްސް ބުރުގެ ގަދަ 32 ކުޅުންތެރިންގެ ބުރުގައި ދެ މެޗުން މޮޅުވެގެން، އެ ވަރުގެ ރެކޯޑެއްގައި ކުރިއަށްގޮސް ވާދަކުރާ ފުރަތަމަ ފަހަރެވެ.
ނަބާގެ ފުރަތަމަ މެޗުގައި އޭނާ ނުކުތީ ބަންގްލަދޭޝްގެ އެއް ވަނަ އަންހެން ކުޅުންތެރިޔާ، އުރްމީ އަކްތަރުއާ ދެކޮޅަށެވެ. އެ ގޮތުން، އުރްމީއާ ދެކޮޅަށް ކުޅުނު މެޗުން ނަބާ މޮޅުވީ، 21-07، 21-17 އިން ސެޓުތައް ގެންގޮސްގެންނެވެ. ދެ ވަނަ މެޗުގައި، ނަބާ ނުކުތީ ކިރްގިސްތާންގެ މަތީ ރޭންކްގެ ކުުޅުންތެރިޔާ، ޒަސްމީން އައިސަރޯވާއާ ދެކޮޅަށެވެ. ޒަސްމީން ކައިރިން ވެސް ސެޓެއް ނުގެއްލި ނަބާ މެޗުން މޮޅުވިއިރު، އޭނާ ސެޓުތައް ގެންދިޔައީ، 21-05، 21-06 އިންނެވެ.
މުބާރާތުގެ ގަދަ 32 ކުޅުންތެރިން ވާދަކުރާ ބުރުގައި، މާދަމާ، ނަބާ ކުޅޭނީ ޖަޕާންގެ އަކާނޭ ޔަމަގޫޗީއާ ދެކޮޅަށެވެ. މި ވަގުތު ދުނިޔޭގެ ރޭންކިން ހަތަރު ވަނައިގައި އޮތް ޔަމަގޫޗީ ވަނީ ތިން ފަހަރު ބެޑްމިންޓަން ވޯލްޑް ޗެމްޕިއަންޝިޕްގެ އަންހެން ސިންގަލްސް ކާމިޔާބުކޮށްފަ އެވެ. އެއީ، 2021، 2022 އަދި މިދިޔަ އަހަރު އެވެ. އަދި، އޭނާ ވަނީ 2019 ވަނަ އަހަރު އޭޝިއަން ޗެމްޕިއަންޝިޕް ކާމިޔާބުކުރުމުގެ އިތުރުން، 2018 ވަނަ އަހަރުގެ އޭޝިއަން ގޭމްސްގެ އަންހެން ސިންގަލްސް އިން ރަން މެޑަލް ހޯދައިފަ އެވެ.
އަންހެން ޑަބަލްސްގައި ނަބާ އާއި ނަބީގެ ޕެއާ ވާދަކުރާއިރު، ދެން ވާދަކުރާނީ މިކްސް ޑަަބަލްސްގައި ނަބާ އާއި ޒަޔާންގެ ޕެއާ އެވެ.
ބެޑްމިންޓަން އޭޝިއާ ޗެމްޕިއަންޝިޕްގައި، ފިރިހެން ސިންގަލްސްގެ ގްރޫޕް ސީގައި ޒަޔާން ނުކުންނާނީ ސްރީ ލަންކާގެ ވިރޭން އާއި މަކާއުގެ ޕީ ޕުއީއާ ދެކޮޅަށެވެ. އަންހެން ޑަބަލްސްގައި، ނަބާ އާއި ނަބީގެ ޕެއާ ހިމެނެނީ، އިންޑޮނޭޝިއާގެ ޓޭ އާއި ޓިއޯގެ ޕެއާ އަދި ސްރީ ލަންކާގެ ހަސިނީ އާއި ހަސާރާގެ ޕެއާއާ އެވެ. މިކްސް ޑަބަލްސްގައި ނަބާ އާއި ޒަޔާންގެ ޕެއާ ވާދަކުރާނީ، ހޮންގް ކޮންގްގެ ޗޭން އާއި އެންޖީގެ ޕެއާ އާއި ބަންގްލަދޭޝްގެ ޖުމަރް އާއި އުރްމީގެ ޕެއާއާ އެއް ގްރޫޕެއްގަ އެވެ.
މި މުބާރާތުގައި ރިވައިވަލްގެ ކޯޗު ނަޝްފާން މުހައްމަދު ވެސް ޓީމާ އެކު ހަރަކާތްތެރިވެ އެވެ.
