މި އަހަރުގެ ހޫނު މޫސުމުގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގެ ފެށުމުގެ ތިން ރަސްމިއްޔާތުގައި ކޭޓީ ޕެރީ، މައިކަލް ބޫބްލޭ އަދި އެލަނިސް މޮރިސެޓް ފަދަ މަޝްހޫރު ފަންނާނުން ހުށަހަޅައިދޭ ގޮތަށް ހަމަޖެހިއްޖެ އެވެ.
މި ފަހަރުގެ މުބާރާތް ބާއްވާ ތިން ގައުމު ކަމަށްވާ އެމެރިކާ، ކެނެޑާ އަދި މެކްސިކޯގައި ކުޅޭ ފުރަތަމަ މެޗުތަކުގެ ކުރިން ކޮންމެ ގައުމެއްގައި ވެސް ހާއްސަ ރަސްމިއްޔާތެއް ބޭއްވުމަށް ވަނީ ނިންމާފަ އެވެ.
މުބާރާތުގެ ފުރަތަމަ ރަސްމިއްޔާތު އޮންނާނީ ޖޫން މަހުގެ 11 ވާ ބުރާސްފަތި ދުވަހު މެކްސިކޯ ސިޓީގެ އެސްޓާޑިއޯ އަޒްޓެކާގަ އެވެ. މުބާރާތުގެ ޖުމްލަ 104 މެޗުގެ ތެރެއިން މެކްސިކޯ އާއި ދެކުނު އެފްރިކާ ބައްދަލުކުރާ ފުރަތަމަ މެޗުގެ ކުރިން ބާއްވާ މި ރަސްމިއްޔާތުގައި ކޮލަމްބިއާގެ ތަރި ޖޭ ބަލްވިން އާއި ދެކުނު އެފްރިކާގެ ލަވަކިޔުންތެރިޔާ ޓައިލާ ހުށަހެޅުންތައް ދޭނެ އެވެ.
އޭގެ އަނެއް ދުވަހު، ކެނެޑާގެ ޓޮރޮންޓޯގެ ބީއެމްއޯ ފީލްޑްގައި ބާއްވާ ފެށުމުގެ ރަސްމިއްޔާތުގައި ކެނެޑާގެ މަޝްހޫރު ދެ ފަންނާނުން ކަމަށްވާ މައިކަލް ބޫބްލޭ އާއި އެލަނިސް މޮރިސެޓް ފެނިގެންދާނެ އެވެ. މި ރަސްމިއްޔާތަށް ފަހު ކުޅޭ މެޗުގައި ބައްދަލުކުރާނީ ކެނެޑާ އާއި ބޮސްނިއާ އެންޑް ހެރްޒެގޮވީނާ އެވެ.
އެމެރިކާގައި ބާއްވާ ރަސްމިއްޔާތު އޮންނާނީ ޖޫން 12 ވަނަ ދުވަހު ލޮސް އެންޖެލިސްގެ ސޯފައި ސްޓޭޑިއަމްގަ އެވެ. އެމެރިކާ އާއި ޕެރަގުއޭ ބައްދަލުކުރާ މެޗުގެ ކުރިން ބާއްވާ މި ހަރަކާތުގައި ޕޮޕް ތަރި ކޭޓީ ޕެރީ އާއި ރެޕް އާޓިސްޓް ފިއުޗާ ހުށަހަޅައިދޭނެ އެވެ.
"ފީފާ ވޯލްޑް ކަޕަކީ މުޅި ދުނިޔެ ބައިވެރިވާ ވަގުތެއް، އަދި އެކަން ފެށިގެންދާނީ މުބާރާތް ހުޅުވުމަށް ބާއްވާ މި ހަރަކާތްތަކުން،" ފީފާގެ ރައީސް ޖިއާނީ އިންފަންޓީނޯ ވިދާޅުވި އެވެ.
އިންފަންޓީނޯ އިތުރަށް ވިދާޅުވީ، މެކްސިކޯ ސިޓީން ފަށައިގެން ޓޮރޮންޓޯ އާއި ލޮސް އެންޖެލިސްގައި ކުރިއަށްދާ މި ރަސްމިއްޔާތުތަކުން މިއުޒިކާއި ސަގާފަތް އަދި ފުޓްބޯޅަ އެއްކޮށްލާނެ ކަމަށެވެ. އަދި މިއީ ކޮންމެ ގައުމެއްގެ ވަކިވަކި ސިފަތަކާއި، މި މުބާރާތުން ރަމްޒުކޮށްދޭ އެއްބައިވަންތަކަން ދައްކުވައިދޭނެ ކަމެއް ކަމަށް ވެސް އޭނާ ވިދާޅުވި އެވެ.
"މިއީ މުޅި ދުނިޔެ ފާހަގަކުރާ މި ބޮޑު އީދު ފެށުމަށް ލިބޭ ވަރަށް ވަރުގަދަ ފުރުސަތެއް،" އިންފަންޓީނޯ ވިދާޅުވި އެވެ.
މި ހަފުތާގެ ކުރީކޮޅު، ކޮލަމްބިއާގެ މަޝްހޫރު ލަވަކިޔުންތެރިޔާ ޝަކީރާ ވަނީ ނައިޖީރިއާގެ ބާނާ ބޯއީއާ އެކު ކިޔާފައިވާ މި މުބާރާތުގެ ރަސްމީ ލަވައިގެ ކުޑަ މިންވަރެއް އާންމުންނަށް ދައްކާލާފަ އެވެ.
