ފުލުހުން ހިންގި އޮޕަރޭޝަނެއްގައި ކިލޯއަކަށްވުރެ ގިނަ މަސްތުވާތަކެއްޗާއެކު މާލެއިން މިދިޔަ ބުރާސްފަތި ދުވަހު ދެ މީހަކު ހައްޔަރުކޮށްފި އެވެ.
ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނުގައި ހައްޔަރުކުރީ ގއ. ވިލިނގިލި، އެދުރުގެ، މުހައްމަދު ފައުޒާން، 35، އާއި ބަންގްލަދޭޝްއަށް ނިސްބަތްވާ ޒާކިރު ހޮސައިން، 29، އެވެ.
މި މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޒާކިރު ހޮސައިންގެ ބަންދަށް 15 ދުވަސް އަދި މުހައްމަދު ފައުޒާންގެ ބަންދަށް 10 ދުވަސް ވަނީ ކޯޓުން ޖަހާފަ އެވެ.
މިދިޔަ ހަފްތާގައި މާލެ ސަރަހައްދުގައި ފުލުހުން ހިންގި މާލޭގެ ދެ އެޕާޓްމަންޓެއް ބަލައި ފާސްކޮށް 13 ކިލޯއަށްވުރެ ގިނަ ޑްރަގް އަތުލައިގަނެފައިވެ އެވެ. އެ މައްސަލައިގައި ޖުމްލަ ތިން މީހަކު ހައްޔަރުކުރި އެވެ.
ފުލުހުން ދަނީ ޑްރަގާ ދެކޮޅަށް އެކި އޮޕަރޭޝަންތަކެއް ހިންގަމުންނެވެ. އެގޮތުން ހިންގި އޮޕަރޭޝަންތަކުގައި މި އަހަރު މިހާތަނަށް ގިނަ އަދަދެއްގެ ޑްރަގާއެކު އެކި މީހުން ހައްޔަރުކޮށްފައިވެ އެވެ.
