މިއާމީ، ޔުނައިޓެޑް ސްޓޭޓްސް (މެއި 9) - ޕޯޗުގީސް ތަރި، ކްރިސްޓިއާނޯ ރޮނާލްޑޯ އަށް ވަރަށް ބޮަޑަށް އިހުތިރާމް އެބައޮތް ކަމަށާއި ޒާތީ ގޮތުން އެއްވެސް ކަމެއް ނެތް ކަމަށް އާޖެންޓީނާގެ ކެޕްޓަން، ލިއޮނަލް މެސީ ބުނެފި އެވެ.
ގާތްގަނޑަށް ވިއްސަކަށް އަހަރަށް ދިގު ދެމިގެންދާ އެކާވީސް ވަނަ ގަރުނުގެ ފުޓްބޯޅައިގެ އެންމެ ބޮޑު ވާދަވެރިކަން ކުރިއަށްދަނީ މެސީ އާއި ރޮނާލްޑޯއާ ދެމެދުގަ އެވެ. ދެ ކުޅުންތެރިން އެއްކޮށް ބަލާނަަމަ، ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް ވަނީ 13 ފަހަރު ހޯދައިފަ އެވެ. އެހެންވެ، މި ދެ ކުޅުންތެރިންގެ މެދުގައި އޮތް ވާދަވެރިކަން ވަނީ ސަޕޯޓަރުންގެ މެދުގައި ވެސް ބޮޑުވެފަ އެވެ.
އާޖެންޓީނާގެ މީޑިއާ އަކަށް ދިން އިންޓަވިއުއެއްގައި، އެމެރިކާގެ ކްލަބް، އިންޓަ މިއާމީގެ ކެޕްޓަން، މެސީ ބުނީ، ރޮނާލްޑޯއާ ދެމެދު އޮތީ އާދަޔާހިލާފަށް ކަމުދިޔަ ކުޅިވަރުގެ ވާދަވެރިކަމެއް ކަމަށެވެ.
"ދުނިޔޭގެ ފުޓްބޯޅައިގައި ނެޗުރަލް ކަމެއްގެ ގޮތުގައި ފެށިގެންދިޔައީ. އަހަރެން ކުޅުނީ ބާސެލޯނާ އަށް. އޭނަ ހުރީ ރެއާލް މެޑްރިޑްގައި. އަހަރެމެން ކުޅެމުން އައި ދެ ޓީމު ހުރިހާ ތަށްޓަކަށް ވާދަކުރަމުންދިޔައިރު، އަހަރެމެން ދެ މީހުން ދިޔައީ އިންޑިވިޖުއަލީ ހުރިހާ ޓްރޮފީ އަކަށް ވާދަކުރަމުން. އެހެންވީމަ، އެންމެން ދިޔައީ އަހަރެމެން އަޅާ ކިޔުމުގެ މަސައްކަތް ކުރަމުން،" މެސީ ބުންޏެވެ.
"އެކަމަކު، އަހަރެމެންގެ ގުޅުން އޮތީ ބަދަހިކޮށް އިހުތިރާމާ އެކު. ހިނގިކަމެއް ހިނގާފައި އެ އޮތީ ކުޅިވަރުގެ ރޫހުގައި އެ އޮންނަ ވާދަވެރިކަމެއްގެ ތެރެެއިން. ޒާތީ އެއްވެސް ކަމެއް މިކަމުަގައި ނެތް،"
މެސީ ބުނީ، ރޮނާލްޑޯއާ އަބަދުވެސް ބައްދަލުވެފައި އޮތީ މެޗުތަކާއި އެވޯޑް ހަފްލާތަކުން ކަމަށެވެ. އަދި، އޭނާ އާއި ސައުދީ ޕްރޯ ލީގުގެ އަލް ނަސްރަށް ކުޅެމުން އަންނަ ރޮނާލްޑޯ ވެސް މިހާރު ކެރިއަރުގައި އެ ހުރި ހިސާބުން ވިސްނުމަކަށްވާނީ ހަމަޖެހިލަައިގެން ކެރިއަރު ކުރިއަށްގެންދިއުން ކަމަށް މެސީ ވަނީ ބުނެފަ އެވެ.
އަންނަ މަހު، އެމެރިކާ، މެކްސިކޯ އަދި ކެނަޑާގައި ބާއްވާ ފީފާ ވޯލްޑް ކަޕަކީ މެސީ އާއި ރޮނާލްޑޯ ދުނިޔޭގެ އެންމެ ބޮޑު ފުޓްބޯޅަ މުބާރާތުން ފެންނާނެ ފަހު ފަހަރެވެ. މިއީ، މެސީ އާއި ރޮނާލްޑޯ ކުޅޭ ފަހު ވޯލްޑް ކަޕް އެވެ.
