ބާސެލޯނާ (އޭޕްރީލް 17) - މަޝްހޫރު ފުޓްބޯޅަ ތަރި، ލިއޮނަލް މެސީ، ސްޕެއިނުގެ ފަސް ވަނަ ޑިވިޝަނުގައި ވާދަކުރަމުން އަންނަ ކްލަބެއް ކަމަށްވާ ޔޫޑީ ކޯނޭޔާގެ މެޖޯރިޓީ ހިއްސާ ގަނެފި އެވެ.
މެސީގެ ކުރީގެ ކްލަބް، ބާސެލޯނާ ވެސް ނިސްބަތްވާ ކަޓަލޫނިއާ ސަރަހައްދުގެ ކްލަބް، ކޯނޭޔާ އިން ނެރުނު ބަޔާނެއްގައި ބުނެފައިވަނީ އަށް ފަހަރު ބެލޮންޑިއޯ ހޯދާފައިވާ ލެޖެންޑަރީ ތަރި މެސީ އަކީ އެ ކްލަބްގެ ވެރިއެއް ކަމަށެވެ. އަދި، އެ ކަމަށް ފުރިހަމަ ކުރަން ޖެހޭ ލިޔެކިޔުންތަކުގެ މަރުހަލާ ވެސް ނިމިފައިވާ ކަމަށް ސްޕެއިނުގެ ނޫސްތަކުން ވަނީ ރިޕޯޓްކޮށްފަ އެވެ.
މެސީ، 38، މި ވަގުތު ކުޅެމުން އަންނަނީ އެމެރިކާގެ ކްލަބް، އިންޓަ މިއާމީ އަށެވެ. ބާސެލޯނާ ސަރަަހައްދުގެ ކްލަބެއް ގަންނަން މެސީ ނިންމުމަކީ މުސްތަގުބަލުގައި އެ ސަރަަހައްދުގައި ދިރިއުޅެން ގަސްދުކުރާތީ އައި ނިންމުމެއް ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ.
އުމުރުން 13 އަހަރުގައި އުފަން ގައުމު އާޖެންޓީނާ ދޫކޮށް މެސީ، އޭނާގެ ހަޔާތުގެ ބޮޑުބައި ހޭދަކުރީ ބާސެލޯނާގަ އެވެ. ބާސެލޯނާގެ ސީނިއާ ޓީމަށް އުމުރުން 17 އަހަރުގައި ކުޅެން ފެށި މެސީ، އެންމެ ފުރަތަމަ އެ ކްލަބަށް ސީނިއާ ލެވަލްގައި މެޗެއް ކުޅުނީ 2004 ވަނަ އަހަރު އެވެ. ބާސެލޯނާ އަށް ގިނަ އަހަރުތަކެއް ވަންދެން ކުޅުނު މެސީ އެ ކްލަބް ދޫކޮށްލީ 2021 ވަނަ އަހަރު އެވެ. އެ ފަަހަރު، ޕީއެސްޖީ އަށް ބަދަލުވެ، ދެ ސީޒަން އެ ޓީމަށް ކުޅެދިނުމަށް ފަހު، އިންޓަ މިއާމީ އަށް ބަދަލުވީ 2023 ވަނަ އަހަރު އެވެ. އެ ފަަހަރު މެސީ، އެނބުރި ބާސެލޯނާ އަށް އައުމުގެ ވާހަކަ ތަކެއް ދެެކެވުނު ނަމަވެސް ހަގީގަތަކަށް ނުވި އެެވެ.
ސްޕެއިނުގެ ދެ ވަނަ ޑިވިޝަނުގައި ވާދަކުރަމުން އަންނަ ކްލަބް، އަލްމެރިއާގެ ހިއްސާއެއް، މަޝްހޫރު ފުޓްބޯޅަ ތަރި، ކްރިސްޓިއާނޯ ރޮނާލްޑޯގެ ކުންފުނިން CR7 ސްޕޯޓްސް އިންވެސްޓްމަންޓްސް ކޮމްޕެނީން މިދިޔަ ފެބްރުއަރީ މަހު ވަނީ ގަނެފަ އެވެ.
