ބާމިންހަމް (މެއި 8) - އެސްޓަން ވިލާ ގޮވައިގެން ޔުއެފާ ޔޫރޮޕާ ލީގުގެ ފައިނަލުން ޖާގަ ހޯދައި، އެ މުބާރާތުގެ އެންމެ ކާމިޔާބު ކޯޗު، އުނާއި އެމެރީ، ހަ ވަނަ ފަހަރަށް މި މުބާރާތުގެ ފައިނަލަކުން ޖާގަ ހޯދައިފި އެވެ.
ސެވިއްޔާ އަށް ތިން ފަހަރު އަދި ވިޔަރެއާލަށް އެއް ފަހަރު ޔޫރޮޕާ ލީގު ކާމިޔާބުކޮށްދިން އެމެރީ، ފައިނަލުގައި ބަލިވީ އާސެނަލް ގޮވައިގެން 2019 ގައި ވާދަކުރިއިރު އެކަންޏެވެ.
ޔޫރޮޕާ ލީގުގެ ސެމީ ފައިނަލް ފުރަތަމަ ލެގުގައި ރޭ ވިލާ އިން ނުކުތްއިރު، އެ ޓީމު އޮތީ މިދިޔަ ހަފްތާގައި ނޮޓިންހަމް ފޮރެސްޓްގެ ދަނޑުގައި ކުޅުނު ފުރަތަަމަ ލެގުން 1-0 އިން ބަލިވެފަ އެވެ. އެކަމަކު، ރޭ ވިލާ އިން އަމިއްލަ ދަނޑުގައި ކުޅުނު ދެ ވަނަ ލެގުން ވަނީ 4-0 އިން މޮޅުވެ، ނަތީޖާ އަނބުރާލައި، 30 އަހަރަށް ފަހު ތަށްޓެއް ހޯދުމާ ގާތަށް ޖެހިލައިފަ އެވެ. ވިލާ އިން އެންމެ ފަހުން ތަށްޓެއްގައި އަތްލީ 1996 ވަނަ އަަހަރުގެ ލީގު ކަޕް ކާމިޔާބުކުރިިއިރު އެވެ.
ރޭގެ މެޗުގެ ފުރަތަމަ ހާފުގައި ވިލާ އިން ލީޑުނެގީ، އެމީ ބުއެންޑީއާ ދިން ބޯޅައަކުން އޮލީ ވަޓްކިންސް ޖެހި ލަނޑުންނެވެ. ދެ ވަނަ ހާފުގައި ޕެނަލްޓީ އަކުން، ބުއެންޑީއާ ވަނީ ވިލާގެ ދެ ވަަނަ ލަނޑު ޖަހައިފަ އެވެ. އަދި، އޭގެ ފަހުން، އެސްޓަން ވިލާގެ ކެޕްޓަން، ޖޯން މެކްގިން ވަނީ ގާތްގާތުގައި ދެ ގޯލު ޖަހައި ވިލާ އަށް ހަމަޖެހިލައިގެން ފައިނަލަށް ދިއުމުގެ މަގު ތަނަވަސްކޮށްދީފަ އެވެ.
ފައިނަލުގައި ވިލާ އިން މި މަހު 20 ވަނަ ދުވަހު ކުޅޭނީ ޖަރުމަނުގެ ފްރައިބާގްއާ އެވެ. މިއީ، މިދިޔަ 44 އަހަރު ތެރޭ ވިލާ އިން ކުޅޭނެ ޔޫރަޕްގެ ފުރަތަމަ ފައިނަލެެވެ.
ތުރުކީގެ އިސްތަންބޫލްގައި ކުޅޭ ފައިނަލުން ފްރައިބާގް ޖާގަ ހޯދީ ރޭ އަމިއްލަ ދަނޑުގައި ކުޅުނު ދެ ވަނަ ލެގުގެ މެޗުން 3-1 އިން ޕޯޗުގަލްގެ ބްރާގާ ބަލިކޮށްފަ އެވެ. ފުރަތަމަ ލެގުގައި ބްރާގާ 2-1 އިން މޮޅުވި ނަމަވެސް، ފްރައިބާގް ރޭ ނެރުނު ނަތީޖާއާ އެކު، އެ ޓީމަށް ބްރާގާ ކައިރިން ކުރިލިބުނީ އެގްރިގޭޓަށް ބަލާއިރު، 4-3 އިންނެވެ.
ޔޫރަޕްގެ ތިން ވަނަ ފަންތީގެ ކްލަބް ފުޓްބޯޅަ މުބާރާތް، ކޮންފަރެންސް ލީގުގެ ފައިނަލުން އިނގިރޭސި ކްލަބް، ކްރިސްޓަލް ޕެލަސް ވެސް ވަނީ ޖާގަ ހޯދައިފަ އެވެ. ޕެލަސް އިން ރޭ އަމިއްލަ ދަނޑުގައި ކުޅުނު މެޗުން 2-1 އިން ޔޫކްރެއިންގެ ޝަހުތަރު ޑޮނެސްކް ބަލިކުރިއިރު، އެގްރިގޭޓުން ކުރިހޯދީ 5-2 އިންނެވެ.
މި ސީޒަނަށް ފަހު، ޕެލަސްގެ ކޯޗުކަން ދޫކޮށްލަން ނިންމާފައިވާ އޮލިވާ ގްލާސްނާ މި ވަނީ އެ ކްލަބަށް ކޯޗުކޮށްދޭ ފަހު މެޗުގައި އެ ޓީމަށް ފުރަތަމަ ފަހަރަށް ޔޫރަޕްގެ ތަށްޓެއް ހޯދައިދިނުމުގެ ފުރުސަތު ހޯދައިފަ އެވެ. ގްލާސްނާގެ ކޯޗުކަމުގައި ޕެލަސް އިން އެފްއޭ ކަޕާއި ޗެރިޓީ ޝީލްޑް ހޯދާފައިވާއިރު، ކޮންފަރެންސް ލީގުގެ ފައިނަލުގައި ޕެލަސް އިން ކުޅޭނީ މި މަހުގެ 27 ވަނަ ދުވަހު، ސްޕެއިނުގެ ރަޔޯ ވަޔެކާނޯއާ އެވެ.
