ލަންޑަން (އޭޕްރީލް 17) - ޔުއެފާ ޔޫރޮޕާ ލީގުގެ ކުއާޓާ ފައިނަލް ދެ ވަނަ ލެގުގައި ރޭ ކުޅުނު މެޗުތަކުން މޮޅުވެ، މުބާރާތުގެ ސެމީ ފައިނަލުގައި އިނގިރޭސި ދެ ކްލަބް ކަމަށްވާ ނޮޓިންހަމް ފޮރެސްޓާއި އެސްޓަން ވިލާ ކުރިމަތިލާން ޖެހިއްޖެ އެވެ.
ވިލާ އިން ރޭ އަމިއްލަ ދަނޑުގައި ކުޅުނު ދެ ވަނަ ލެގުން 4-0 އިން މޮޅުވިއިރު، އެގްރިގޭޓުން ކުރިހޯދީ 7-1 އިންނެވެ. އަދި، ޕޯޓޯގެ މައްޗަށް ފޮރެސްޓުން އަމިއްލަ ދަނޑުގައި 1-0 އިން ކުރިހޯދިއިރު، އެގްރިގޭޓުން މޮޅުވީ 2-1 އިންނެވެ.
ވިލާ ޕާކުގައި ރޭ ކުޅުނު މެޗުގެ 16 ވަނަ މިނިޓްގައި އޮލީ ވަޓްކިންސް ވަނީ ގޯލެއް ޖަހައި ލީޑު ނަގައިދީފަ އެވެ. މިއީ ހުރިހާ މުބާރާތަކަށް ބަލާއިރު، މިހާތަނަށް ވަޓްކިންސް ވިލާ އަށް ޖަހައިދިން 100 ވަނަ ގޯލެވެ. އޭގެ ނުވަ މިިނިޓް ފަހުން، ވިލާގެ ޕެނަލްޓީ އަކުން މޯގަން ރޮޖާސް ފޮނުވާލި ބޯޅަ ބޮލޯނިއާ ކީޕަރު، ފެޑެރީކޯ ރަވާލިއާ ވަނީ މަތަކޮށްފަ އެވެ. އެކަމަކު، ޕެނަލްޓީ ނާކާމިޔާބުވިތާ މިނިޓެއް ފަހުން، އެމީ ބުއެންޑިއާ ވަނީ ވިލާގެ ދެ ވަނަ ލަނޑު ޖަހައިފަ އެވެ.
ފުރަތަމަ ހާފު ނިމުމުގެ ކުރިން ވިލާގެ ތިން ވަނަ ލަނޑު ޖެހީ 39 ވަނަ މިނިޓްގައި ޖޯން މެކްގިން ދިން ބޯޅައަކުން ރޮޖާސް އެވެ. އަދި، މެޗުގައި ވިލާ އިން ޖެހި ފަހު ގޯލު 89 ވަނަ މިނިޓްގައި ކާމިޔާބުކުރީ އެޒްރީ ކޮންސާ އެވެ.
މިދިޔަ ހަފްތާގައި ޕޯޓޯ ދަނޑުގައި ކުޅުނު ފުރަތަމަ ލެގު އެއްވަރުވެފައި އޮތުމުން ރޭ ފޮރެސްޓް ދަނޑުގައި ކޮންމެ ޓީމެއް މޮޅުވި ކަމުގައި ވިޔަސް ސެމީ ފައިނަލުގެ ޖާގަ އޮތީ ހުޅުވިފަ އެވެ. ކުޅުންތެރިއަކު މަދުކޮށް މެޗުގެ ބޮޑު ބައި ކުޅުނު ޕޯޓޯ އަތުން މޮޅުވެ، ފޮރެސްޓުން ވަނީ 1984 ވަނަ އަހަރުގެ ފަހުން ފުރަތަމަ ފަހަަރަށް ޔޫރަޕްގެ މުބާރާތެއްގެ ސެމީ ފައިނަލަށް ދަތުރުކޮށްފަ އެވެ.
ޕޯޓޯގެ ޔެން ބެޑްނަރެކަށް މެޗުގެ އަށް ވަަނަ މިނިޓްގައި ރަތް ކާޑެއް ދެއްކީ، ފޮރެސްޓްގެ ކްރިސް ވުޑް އަށް ކުރި ނުރައްކާތެރި ފައުލަކަށެވެ.
މޯގަން ގިބްސް-ވައިޓް، ރޭގެ މެޗުގައި ފޮރެސްޓްގެ ހަމައެކަނި ލަނޑު ޖަހައި އެ ޓީމު މޮޅުކޮށްދިންއިރު، މިއީ، މި ފަހަރު ފޮރެސްޓުން އަމިއްލަ ދަނޑުގައި ޕޯޓޯ ބަލިކުރި ދެ ވަނަ ފަހަރެވެ. މިދިޔަ އޮކްޓޫބަރު މަހު މި ދެ ޓީމުން ފޮރެސްޓް ދަނޑުގައި ކުޅުނު މެޗުން އެ ޓީމު މޮޅުވީ 2-0 އިންނެވެ. އިނގިރޭސި ކްލަބެއް އަތުން ރަށުންބޭރުގައި ޕޯޓޯ އަށް އެންމެ ފަހުން ކުޅުނު 25 މެޗުގައި ވެސް މޮޅެއް ލިބިފައިނުވެ އެވެ.
ޔޫރޮޕާ ލީގުގެ އަނެއް ސެމީ ފައިނަލުގަައި ޖަރުމަނުގެ ފްރައިބާގުން ބައްދަލުކުރާނީ ޕޯޗުގަލްގެ ބްރާގާއާ އެވެ. ބްރާގާ އިން ވަނީ ކުއާޓާ ފައިނަަލުގައި ބެޓިސް ބަލިކޮށްފަ އެވެ. އަދި، ފްރައިބާގުން ވަނީ ސެލްޓަ ވީގޯގެ މައްޗަށް ކުރިހޯދައިފަ އެވެ.
ޔުއެފާ ކޮންފަރެންސް ލީގުގެ ކުއާޓާ ފައިނަލްގެ ފަހު މެޗުތައް ރޭ ކުޅުނުއިރު، ސެމީ ފައިނަަލަށް ޓީމުތައް ވަނީ ދަތުރުކޮށްފަ އެވެ. އެ ގޮތުން، އޭޒެޑް އަލްކްމާރު ކަޓުވާލައި ސެމީ އަށް ދިޔަ ޝަހުތަރު ޑޮނެސްކުން ކުޅޭނީ ފިއޮރެންޓީނާ ބަލިކުރި ކްރިސްޓަލް ޕެލަސްއާ އެވެ. އޭއީކޭ އެތަންސް ބަލިކުރި ރަޔޯ ވަޔެކާނޯ އިން ސެމީގައި ނުކުންނާނީ މައިންޒް ކަޓުވާލި ސްޓްރާސްބޯއާ އެވެ.
