ލަންޑަން (މެއި 1) - ޔުއެފާ ޔޫރޮޕާ ލީގުގެ ސެމީ ފައިނަލް ފުރަތަމަ ލެގުގައި ނޮޓިންހަމް ފޮރެސްޓުން 1-0 އިން އެސްޓަން ވިލާ ބަލިކުރިއިރު، ކޮންފަރެންސް ލީގުގެ ސެމީ ފައިނަލް ފުރަތަމަ ލެގުގައި ރަށުންބޭރުގައި، ޔޫކްރެއިންގެ ޝަހުތަރު ޑޮނެސްކް އަތުން 3-1 އިން މޮޅުވެ، ކްރިސްޓަލް ޕެލަސް އިން މުބާރާތުގެ ފައިނަލާ ގާތަށް ޖެހިލައިފި އެވެ.
ފޮރެސްޓުގެ ދަނޑު، ސިޓީ ގްރައުންޑްގައި ކުޅުނު މެޗުގައި ފެނިގެންދިޔަ ހަމައެކަނި ލަނޑު ޖެހީ 71 ވަނަ މިނިޓްގައި ކްރިސް ވުޑް އެވެ. ނިއު ޒީލެންޑުގެ ފޯވާޑް ވުޑް މި ލަނޑު ޖެހީ، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި ދިން ޕެނަލްޓީ އަކުންނެވެ. މި ޕެނަލްޓީ ދޭން ނިންމީ، އޭރިއާތެރެއިން އެސްޓަން ވިލާގެ ވާތުބެކް، ލޫކަސް ޑީންޏާ އަތުގައި ބޯޅަ ޖެހުމުންނެވެ.
ކަކުލުގެ އަނިޔާއަކާ ހެދި މި ސީޒަނުގެ ހަ މަސް ދުވަސް ކުޅުމާ ދުރުގައި ހުރި ވުޑް ޖެހި މި ގޯލަކީ، އޭނާގެ ކެރިއަރުގައި ކާމިޔާބުކުރި 200 ވަނަ ގޯލެވެ. މި މެޗުގައި ފޮރެސްޓުގެ އީގޯ ޖީސޫސް ޖެހި ބޯޅައެއް ވިލާގެ ކީޕަރު، އެމިލިއާނޯ މާޓީނޭޒް ވަނީ ފުރަތަމަ ހާފުގައި މަތަކޮށްފަ އެވެ.
ވިލާ އިން ވެސް އެޓޭކްތަކެއް ކުރި މި މެޗުގައި އެ ޓީމުގެ ޔޫރީ ޓީލަމަންސް އާއި މޯގަން ރޮޖާސް އަދި އޮލީ ވަޓްކިންސް ޖެހި ޝޮޓްތައް ފޮރެސްޓުގެ ކީޕަރު، ސްޓެފަން އޯޓޭގާ ވަނީ މަތަކޮށްފަ އެވެ.
ވިލާ އިން ވަނީ ޖެނުއަރީ މަހު، އިނގިރޭސި ޕްރިމިއާ ލީގުގައި 3-1 އިން ފޮރެސްޓް އަތުން އަމިއްލަ ދަނޑުގައި މޮޅުވެފަ އެވެ. އަންނަ ހަފްތާގައި ވިލާ ދަނޑުގައި ސެމީ ފައިނަލުގެ ދެ ވަނަ ލެގު ކުޅޭއިރު، ފަައިނަލުގެ ޖާގައެއް ހޯދަން، މޮޅުވެގެން ނަތީޖާ ނެރެން ވަނީ މަޖުބޫރުވެފަ އެވެ.
ޔޫރޮޕާ ލީގުގެ ސެމީ ފައިނަލް އަނެއް މެޗުގައި ޕޯޗުގަލްގެ ބްރާގާ އިން ވަނީ ޖަރުމަނުގެ ފްރެއިބާގް އަތުން 2-1 އިން މޮޅުވެފަ އެވެ.
ކޮންފަރެންސް ލީގުގެ ސެމީ ފައިނަލްގައި ޝަހުތަރު ދަނޑުގައި ކުޅުނު މެޗުގެ 21 ވަނަ ސިކުންތުގައި ޕެލަސް އިން ލީޑުނެގީ އިސްމާއިލާ ސާ ޖެހި ގޯލުންނެވެ. މިއީ، ޔޫރަޕްގެ ތިން ވަނަ ފަންތީގެ ކްލަބް ފުޓްބޯޅަ މުބާރާތް ކޮންފަރެންސް ލީގުގެ ތާރީހުގައި ފެނުނު އެންމެ އަވަސް ގޯލެވެ.
ދެ ވަަނަ ހާފުގެ ކުޅުން ފެށިގެން ތިން މިނިޓް ތެރޭ ކޯނަރަކުން އޮލެ އޮޗެރެޓްކޯ ޖެހި ގޯލުން ޝަހުތަރުން އެއްވަރުކުރި އެވެ. އެކަމަކު، 58 ވަނަ މިނިޓްގައި ޑައިޗީ ކަމާޑާ ވަނީ ލަނޑު ޖަހައި އަލުން ޕެލަސް އަށް ލީޑުނަގައިދީފަ އެވެ. މެޗުގެ ފުރިހަަމަ ވަގުތު ހަމަވުމުގެ ކުރިން ޕެލަސް އިން ދެ ގޯލުގެ ލީޑެއް ނަގައި ހަމަޖެހިލި އެވެ. މި ލަނޑު މެޗުގެ 84 ވަނަ މިނިޓްގައި ޖެހީ ޖޯގެން ސްޓްރޭންޑް ލާސެން އެވެ.
އަންނަ ހަފްތާގައި ޕެލަސް ދަނޑުގައި އެއްވަރު ނޫނީ އެއް ގޯލުގެ ފަރަގަކުން އެ ޓީމު ބަލިވި ކަމުގައި ވިޔަަސް، އެ ކްލަބްގެ ތާރީހުގައި ފުރަތަމަ ފަހަރަށް ޔޫރަޕްގެ މުބާރާތެއްގެ ފައިނަލުން ޖާގަ ލިބޭނެ އެވެ.
ކޮންފަރެންސް ލީގުގެ އަނެއް ސެމީ ފައިނަލުގައި، ސްޕެއިނުގެ ރަޔޯ ވަޔެކާނޯ އިން ވަނީ އަމިއްލަ ދަނޑުގައި 1-0 އިން ފްރާންސްގެ ސްޓްރާސްބޯ އަތުން މޮޅުވެފަ އެވެ.
