މިލާން (އޭޕްރީލް 10) - ޔުއެފާ ޔޫރޮޕާ ލީގުގެ ކުއާޓާ ފައިނަލުގެ ފުރަތަމަ ލެގުގައި ރޭ އެސްޓަން ވިލާ އިން 3-1 އިން ބޮލޯނިއާ ބަލިކޮށް ސެމީ ފައިނަލުގެ ޖާގަައަކާ ގާތަށް ޖެހިލިއިރު، ނޮޓިންހަމް ފޮރެސްޓުން 1-1 އިން ޕޯޓޯއާ އެއްވަރުކޮށްފި އެވެ.
ބޮލޯނިއާ ދަނޑުގައި ރޭ ކުޅުނު މެޗުގެ ފުރަތަމަ ހާފުގައި އެޒްރީ ކޮންސާ ޖެހި ލަނޑުން ވިލާ އިން ލީޑުނެގިއިރު، ދެ ވަނަ ހާފުގެ ކުޅުން ފަށައިގެން ހަ މިނިޓް ތެރޭ ވިލާ އިން ލީޑުފުޅާކުުރި އެވެ. މި ލަނޑު އެ ޓީމަށް ޖަހައިދިނީ 51 ވަނަ މިނިޓްގައި އޮލީ ވަޓްކިންސް އެވެ. ޔޫރީ ޓީލަމަންސް ދިން ބޯޅައަކުން ކޮންސާ ލަނޑު ޖެހިއިރު، ވަޓްކިންސްގެ ގޯލަށް ފުރުސަތު ހޯދައިދިނީ އެމީ ބުއެންޑީއާ އެވެ.
މެޗުގެ 90 މިނިޓްގައި ބޮލޯނިއާ އިން ލަނޑެއް ޖެހި އެވެ. މިއީ، ބޮލޯނިއާ އަށް ކުޅޭ އިނގިރޭސި ފޯވާޑް، ޖޮނަތަން ރޯވް ޖެހި ގޯލެކެވެ. އެކަމަކު، މި ލަނޑު ޖެހިތާ ހަތަރު މިނިޓް ފަހުން، އިތުރު ވަގުތުގެ ވެސް ފަހު ވަގުތު ވަޓްކިންސް ވަނީ އިތުރު ގޯލެއް ޖަހައި، ވިލާ އަށް ސެމީ ފައިނަލުގެ އުންމީދު ބޮޑުކޮށްދީފަ އެވެ.
ފޮރެސްޓުން ރޭގެ މެޗުގައި ޕޯޓޯ ދަނޑުގައި ވަނީ ހިތްވަރުގަދަ ކުޅުމެއް ދައްކައިފަ އެވެ. އެ ގޮތުން، އަމިއްލަ ދަނޑުގައި ކުޅުނު ޕޯޓޯ އިން 11 ވަނަ މިނިޓްގައި ވިލިއަމް ޖެހި ލަނޑުން ލީޑުނެގި އެވެ. ފޮރެސްޓުން އޭގެ ތިން މިނިޓް ފަހުން އެއްވަރުކުރީ ޕޯޓޯގެ މާޓީން ފެނާނޭސް އަތުން ބައިކޮޅަށް ވަން ގޯލަކުންނެވެ. ޕޯޓޯގެ ކީޕަރު ޑިއޯގޯ ގޯމޭސް ނުވިސްނައި ހުއްޓައި، ފެނާންޑޭސް ފަހަތަށް ދިން ބޯޅަ ވަނީ ބައިކޮޅަށެވެ.
އަންނަ ހަފްތާގައި ފޮރެސްޓުން އަމިއްލަ ދަނޑުގައި ޕޯޓޯ ބަލިކޮށްފިނަމަ، 40 އަހަރު ތެރޭ ފުރަތަމަ ފަހަރަށް ޔޫރަޕްގެ މުބާރާތެއްގެ ސެމީ ފައިނަލުން ޖާގަ ލިބޭނެ އެވެ.
ޔޫރޮޕާ ލީގުގެ ކުއާޓާ ފައިނަލުގެ އަނެއް މެޗުތަކުގެ ނަތީޖާ އަށް ބަލާއިރު، ފްރެއިބާގުން ވަނީ އަމިއްލަ ދަނޑުގައި 3-0 އިން ސްޕެއިނުގެ ސެލްޓަ ވީގޯ ބަލިކޮށްފަ އެވެ. ރެއާލް ބެޓިސް އާއި ބްރާގާ ވަނީ 1-1 އިން އެއްވަރުވެފަ އެވެ.
ޔޫރަޕްގެ ތިން ވަނަ ފަންތީގެ ކްލަބް ފުޓްބޯޅަ މުބާރާތް، ކޮންފަރެންސް ލީގުގެ ކުއާޓާ ފައިނަލުގެ ފުރަތަމަ ލެގުގެ މެޗުތަކުގެ ނަތީޖާ އަށް ބަލާއިރު، ކްރިސްޓަލް ޕެލަސް އިން ވަނީ 3-0 އިން ފިއޮރެންޓީނާ ބަލިކޮށްފަ އެވެ. މައިންޒް އިން 2-0 އިން ސްޓްރާސްބޯގެ މައްޗަށް ކުރިހޯދިއިރު، ޝަހުތަރު ޑޮނެސްކުން ވަނީ 3-0 އިން އޭޒެޑް އަލްކްމާރު ބަލިކޮށްފަ އެވެ. އަދި، ރަޔޯ ވަޔެކާނޯ އިން އޭއީކޭ އެތަންސްގެ މައްޗަށް ކާމިޔާބު ހޯދީ 3-0 އިންނެވެ.
