އިންޑިއާ ކަނޑުގެ ސަލާމަތާއި ރައްކާތެރިކަމާ ބެހޭ ކޮންފަރެންސްއެއްގައި ބައިވެރިވެވަޑައިގަތުމަށް ކުރީގެ ރައީސް، މުހައްމަދު ނަޝީދު އިންޑިއާއަށް ފުރާވަޑައިގެންފި އެވެ.
މާދަމާ އާއި އޭގެ އަނެއް ދުވަހު އިންޑިއާގެ ވެރިރަށް، ނިއުދިއްލީގައި އޮންނަ އެ ކޮންފަރެންސަކީ މި ސަރަހައްދުގެ ސަލާމަތާއި ރައްކާތެރިކަމުގެ އިތުރުން، އެ ކަންކަމުގެ ސަބަބުން އިންޑިއާ ކަނޑުގެ ޖަޒީރާ ގައުމުތަކުގެ ހާލަތަށް ކުރާ އަސަރުތަކާ ބެހޭގޮތުން ބާއްވާ ކޮންފަރެންސްއެކެވެ.
އެ ކޮންފަރެންސްގައި ބައިވެރިވެވަޑައިގަތުމަށް އިންޑިއާއަށް ފުރާވަޑައިގަތުމުގެ ކުރިން ދެއްވި ވީޑިއޯ އިންޓަވިއުއެއްގައި، އެމްޑީޕީގެ ޗެއާޕާސަންގެ މަގާމަށް ވާދަކުރައްވާ ނަޝީދު ވިދާޅުވީ އަވައްޓެރި ސްރީލަންކާ އަށާއި އިންޑިއާއަށް ދަތުރެއްނުކޮށް ރާއްޖޭގެ ކެމްޕޭނެއް ފުރިހަމަ ނުވާނެ ކަމަށެވެ.
"އެހެން ނޫންނަމަވިޔަސް، މި ދެންނެވިހެން އިންޑިއާ ކަނޑާ ގުޅޭގޮތުން ހިނގާ މަޝްވަރާތަކުގައި އަޅުގަނޑު ދެކޭގޮތުގައި ދިވެހިރާއްޖޭގެ ފަރާތުން ބައިވެރިވުމަކީ ބޭނުންތެރިކަމެއް،" ނަޝީދު ވިދާޅުވި އެވެ.
އެ ކޮންފަރެންސްގައި ދިވެހީންގެ ސަލާމަތާއި ރައްކާތެރިކަމާ ބެހޭ ކަންކަމާ ގުޅޭގޮތުން ވާހަކަދައްކަވާނެ ކަމަށް ނަޝީދު ވިދާޅުވި އެވެ.
ކޮންފަރެންސްގައި ބައިވެރިވެވަޑައިގަތުމަށްފަހު، ނަޝީދު އެނބުރި ރާއްޖެ ވަޑައިގަންނަވާނީ އަންނަ ހޮނިހިރު ދުވަހު އެވެ.
އެމްޑީޕީގެ ޗެއާޕާސަންގެ މަގާމަށް ނަޝީދުގެ އިތުރުން ދެން ވާދަކުރަނީ ގަލޮޅު ދެކުނު ދާއިރާގެ މެންބަރު މީކާއިލް ނަސީމް އަދި ލ. ފޮނަދޫއަށް ނިސްބަތްވާ އިބްރާހިމް މުހައްމަދު (ވާޑު) އެވެ.
