ރައީސް އޮފީހުގެ ކުރީގެ މުވައްޒަފަކު ރައީސް މުހައްމަދު މުއިއްޒަށް ކުރާ ޖިންސީ ތުހުމަތުތަކުގެ ވާހަކަ ގެނެސްދިން މި ނޫހުގެ ޑޮކިއުމެންޓަރީ "އައިޝާ" އާއި އޭގެ ވާހަކަ ދެއްކުން ރާއްޖޭގައި މަނާ ކުރުމުން އިދިކޮޅު މޯލްޑިވިއަން ޑިމޮކްރެޓިކް ޕާޓީގެ މަޖިލިސް މެންބަރު މީކާއީލް އަހުމަދު ނަަސީމް ކަންބޮޑޫވުން ފާޅު ކުރައްވައިފި އެވެ.
އެކްސްގައި މިރޭ ކުރެއްވި ޕޯސްޓެއްގައި މީކާއީލް ވިދާޅުވީ، ޑޮކިއުމެންޓަރީގެ ވާހަކަ އާއި އޭގެ ސައްލާ ކުރުމުގެ މަގު ބަންދުވާނޭ ގޮތަށް ކޯޓުން އަމުރެއް ނެރުމަކީ ކަންބޮޑުވާންޖެހޭ މައްސަލައެއް ކަމަށެވެ.
"ބިރު ދިައްކައިގެން ދިވެހި ރައްޔިތުންގެ އަޑު ކަނޑުވާލެވޭނެ ކަމަށް ރައީސް މުއިއްޒު ހީކުރެއްވުމަކީ ގޯހެއް. ގާނޫނުއަސާސީ އިން އަހަރުމެންނަށް ލިބިދީފައިވާ ހައްގު ކޮންމެ ހާލަތެއްގައި ވެސް ރައްކާތެރި ކުރާނަން،" މީކާއިލް ވިދާޅުވި އެވެ.
ނޫސްވެރިކަމާއި ނޫސްވެރިންނާ ދެކޮޅަށް ފިޔަވަޅު އަޅަމުންދާ މައްސަލައިގައި ވެސް މީކާއީލް ކަންބޮޑުވުން ފާޅު ކުރި އެވެ. އެގޮތުން އަދަދު ނޫހުގެ އޮފީސް ރެއިޑު ކުރުމާއި ބައެއް ނޫސްވެރިން ފުރުން މަނާކޮށްފައި އޮތް އޮތުމަށް ވެސް މީކާއީލް ފާޑުވިދާޅުވި އެވެ.
"މިއީ ހުދުމުހުތާރު ވެރިކަމެއްގެ ސިފަތަކެއް،" މީކާއީލް ވިދާޅުވެފައިވެ އެވެ.
ޑޮކިއުމެންޓަރީގެ ވާހަކަ ދެއްކުން މަނާކޮށް ކޯޓުން ނެރުނު އަމުރަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވެސް ފާޑުވިދާޅުވި އެވެ. އަދި ޑޮކިއުމެންޓަރީ މައްސަލައިގައި އަދަދު ނޫހުގެ ސީއީއޯ ހުސެއިން ފިޔާޒް މޫސާ އާއި އެޑިޓަރު ހަސަން މުހައްމަދުގެ މައްޗަށް ޖިނާއީ ދައުވާއެއް އުފުލުމުން ވެސް ފައްޔާޒް ކަންބޮޑުވުން ފާޅު ކުރެއްވި އެވެ.
"މި ޝަރީއަތް ފެށުމުގެ ކުރިން ވަކި ގޮތެއް ނިމިފައި އޮތް މަންޒަރު ދިވެހިންނަށް ސާފުކޮށް ފެނޭ. ނޫސްވެރިން ކުރާ މަސައްކަތްތަކާ ދެކޮޅަށް ޖިނާއީ ދައުވާ އުފުލާނީ ހުދުމުހުތާރު ވެރިން،" ނިމިދިޔަ އެމްޑީޕީ ސަރުކާރުގައި އިކޮނޮމިކް މިނިސްޓަރުކަން ވެސް ކުރެއްވި ފައްޔާޒް ވިދާޅުވި އެވެ.
ފިޔާޒް އާއި ހަސަންގެ މައްޗަށް ދައުވާ އުފުލާފައި މި ވަނީ "އައިޝާ" ޑޮކިއުމެންޓަރީގެ މައްސަލަ ބަލަން ފެށިތާ 14 ވަނައަށް ވީ ދުވަހެވެ. އެ މައްސަލަ ބަލަން އެންގީ ތުހުމަތުތަކާ ގުޅޭ ގޮތުން އަދަދު އިން ސުވާލު ކުރުމުން ޕްރެސް ކޮންފަރެންސެއްގެ ތެރެއިން ސީދާ ރައީސް މުއިއްޒެވެ.
ހަމަ އެރޭ ފުލުހުން ވަނީ އަދަދުގެ އޮފީހަށް ރެއިޑުކޮށް 20 އިލެކްޓްރޯނިކް ޑިވައިސްއެއް ގެންގޮސްފަ އެވެ. އޭގެ ތެރޭގައި ލެޕްޓޮޕްތަކާއި ހާޑް ޑިސްކު ހިމެނެ އެވެ.
ޖެހިގެން އައި ދުވަހު ފިޔާޒް އާއި ހަސަން ރާއްޖެއިން ބޭރަށް ފުރުން މަނާކޮށް، ތަހުގީގުގެ ބޭނުމަށް ފުލުސް އޮފީހަށް ހާޒިރުކުރި އެވެ. މި މައްސަލައިގައި ހިމެނޭ ރައީސް އޮފީހުގެ ކުރީގެ މުވައްޒަފު ވެސް ފުލުސް އޮފީހަށް ހާޒިރުކޮށް، ނުފުރޭ ގޮތް ހެދި އެވެ.
ފިޔާޒް އާއި ހަސަންގެ މައްޗަށް ދައުވާ އުފުލާފައި މި ވަނީ ދުނިޔޭގެ ހަތް ޖަމިއްޔާއަކުން ޖިނާއީ ދައުވާތައް އަނބުރާ ގެންދިޔުމަށް ގޮވާލައި، މައްސަލައިގައި ތުހުމަތު ރައްދުވާ ފަރާތުގެ މިނިވަން ތަހުގީގެއް ކުރުމަށް ގޮވާލާފައި ވަނިކޮށެވެ.
