ރައީސް އޮފީހުގެ ކުރީގެ މުވައްޒަފަކު ރައީސް މުހައްމަދު މުއިއްޒަށް ކުރާ ޖިންސީ ތުހުމަތުތަކުގެ ވާހަކަ ގެނެސްދިން އަދަދު ނޫހުގެ ޑޮކިއުމެންޓަރީ "އައިޝާ" ދިވެހިރާއްޖޭގައި މަނާ ކުރަން އަމުރެއް ނެރުމުން ކުރީގެ ރައީސް އަބްދުﷲ ޔާމީން ކްރިމިނަލް ކޯޓަށް ފާޑުވިދާޅުވެއްޖެ އެވެ.
ޕީޕަލްސް ނެޝަނަލް ފްރަންޓުން ބޭއްވި ޖަލްސާއެއްގައި، ކޯޓުން ރޭގެ ވަގުތެއްގައި ނެރުނު އަމުރާ ގުޅޭ ގޮތުން ވާހަކަ ޔާމީން ދައްކަވަމުން ވިދާޅުވީ، ކޯޓުން ނެރުނު އަމުރުގެ ސަބަބުން އެ މައްސަލައިގައި މިހާރު ވެސް ގޮތެއް ނިންމާފައި އޮތް ކަމުގެ ސުވާލު އުފެދޭ ކަމަށެވެ.
"ކްރިމިނަލް ކޯޓުން ގޮތެއް ނިންމީތޯ މި އުޅޭ ރިލޭޝަންޝިޕަށް ނޫނީވިއްޔާ މިދެކެވޭ ސެކްޝުއަލް އެލެގޭޝަނަށް ކްރިމިނަލް ކޯޓުން ގޮތެއް ނިންމީތޯ؟ އެހެން ނޫނީ ގަޒުފުގެ ލަފުޒު އަންނާކަށް ނުޖެހޭ ދެއްތޯ؟،" ޔާމީން ވިދާޅުވި އެވެ.
"ފަނޑިޔާރުން ކުރާ ކަންކަމުގައި އެބަޖެހޭ ތަންކޮޅެއް އޮއްޓަރު ހުންނަން. އޮއްޓަރު ނެތި މިހެން ނުކުންނަ ހުކުމްތައް ނުކުތީމަ މި ވަނީ ހަމަ ޕަބްލިކް ރިޑިކިއުލް [މަލާމާތް] ކުރާ ކަމަކަށް."
އޭގެ އިތުރުން، އެ މައްސަލައިގައި ފުލުހުން ހިންގި ތަހުގީގަށް ދިފާއުގައި ބަޔާން ދިނުމުގެ ފުރުސަތު ރައީސް އޮފީހުގެ ކުރީގެ މުވައްޒަފަށް ނުދިނުމުން އެކަމަށް ވެސް ޔާމީން ފާޑުވިދާޅުވި އެވެ.
"ފުލުހުން ތަހުގީގު ކުރާ ގޮތަކަށް ކުރީ. އެ ތަހުގީގުގައި މި ބުނަނީ ތިމަންނަމެން ކުރާ ސުވާލަކީ މިއީއޭ، އައިޝާ ދައްކާނެ ވާހަކައެއް ނެތޭ. [އައިޝާ] ދައްކައިގެން ނުވާނެއޭ ވާހަކައެއް،" އެމަނިކުފާނު ވިދާޅުވި އެވެ.
ޑޮކިއުމެންޓަރީގެ ވާހަކަ ދެއްކުން މަނާކޮށް ކޯޓުން ނެރުނު އަމުރަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވެސް ފާޑުވިދާޅުވި އެވެ. އަދި ޑޮކިއުމެންޓަރީ މައްސަލައިގައި އަދަދު ނޫހުގެ ސީއީއޯ ހުސެއިން ފިޔާޒް މޫސާ އާއި އެޑިޓަރު ހަސަން މުހައްމަދުގެ މައްޗަށް ޖިނާއީ ދައުވާއެއް އުފުލުމުން ވެސް ފައްޔާޒް ކަންބޮޑުވުން ފާޅު ކުރެއްވި އެވެ.
"މި ޝަރީއަތް ފެށުމުގެ ކުރިން ވަކި ގޮތެއް ނިމިފައި އޮތް މަންޒަރު ދިވެހިންނަށް ސާފުކޮށް ފެނޭ. ނޫސްވެރިން ކުރާ މަސައްކަތްތަކާ ދެކޮޅަށް ޖިނާއީ ދައުވާ އުފުލާނީ ހުދުމުހުތާރު ވެރިން،" ނިމިދިޔަ އެމްޑީޕީ ސަރުކާރުގައި އިކޮނޮމިކް މިނިސްޓަރުކަން ވެސް ކުރެއްވި ފައްޔާޒް ވިދާޅުވި އެވެ.
ފިޔާޒް އާއި ހަސަންގެ މައްޗަށް ދައުވާ އުފުލާފައި މި ވަނީ "އައިޝާ" ޑޮކިއުމެންޓަރީގެ މައްސަލަ ބަލަން ފެށިތާ 14 ވަނައަށް ވީ ދުވަހެވެ. އެ މައްސަލަ ބަލަން އެންގީ ތުހުމަތުތަކާ ގުޅޭ ގޮތުން އަދަދު އިން ސުވާލު ކުރުމުން ޕްރެސް ކޮންފަރެންސެއްގެ ތެރެއިން ސީދާ ރައީސް މުއިއްޒެވެ.
ހަމަ އެރޭ ފުލުހުން ވަނީ އަދަދުގެ އޮފީހަށް ރެއިޑުކޮށް 20 އިލެކްޓްރޯނިކް ޑިވައިސްއެއް ގެންގޮސްފަ އެވެ. އޭގެ ތެރޭގައި ލެޕްޓޮޕްތަކާއި ހާޑް ޑިސްކު ހިމެނެ އެވެ.
ޖެހިގެން އައި ދުވަހު ފިޔާޒް އާއި ހަސަން ރާއްޖެއިން ބޭރަށް ފުރުން މަނާކޮށް، ތަހުގީގުގެ ބޭނުމަށް ފުލުސް އޮފީހަށް ހާޒިރުކުރި އެވެ. މި މައްސަލައިގައި ހިމެނޭ ރައީސް އޮފީހުގެ ކުރީގެ މުވައްޒަފު ވެސް ފުލުސް އޮފީހަށް ހާޒިރުކޮށް، ނުފުރޭ ގޮތް ހެދި އެވެ.
ފިޔާޒް އާއި ހަސަންގެ މައްޗަށް ދައުވާ އުފުލާފައި މި ވަނީ ދުނިޔޭގެ ހަތް ޖަމިއްޔާއަކުން ޖިނާއީ ދައުވާތައް އަނބުރާ ގެންދިޔުމަށް ގޮވާލައި، މައްސަލައިގައި ތުހުމަތު ރައްދުވާ ފަރާތުގެ މިނިވަން ތަހުގީގެއް ކުރުމަށް ގޮވާލާފައި ވަނިކޮށެވެ.
