މިހާރުގެ ސަރުކާރުން މުޅި ދައުލަތް ހިސޯރުކޮށްފައިވާ ކަމަށް ތުހުމަތުކުރައްވައި، ގައުމު ސަލާމަތްކުރުމަށްޓަކައި އިދިކޮޅު ހުރިހާ ލީޑަރުން އެކުގައި ނުކުމެވަޑައިގަތުމަށް އެމްޑީޕީގެ ކުރީގެ ޗެއަރޕާސަން ފައްޔާޒު އިސްމާއިލް ގޮވާލައްވައިފި އެވެ. ފައްޔާޒު މިކަމަށް ގޮވާލެއްވީ ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގަ އެވެ.
ފައްޔާޒު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުންނެވީ މަގާމާ ހަވާލުވެވަޑައިގަތުމަށް ކުރެއްވި ހުވަޔާ ހިލާފުވެވަޑައިގެން ކަމަށެވެ. އަދި މުޅި ދައުލަތް ހިސޯރުކޮށްގެން ހުންނެވި ރައީސް މުއިއްޒުގެ ބުއްދި ފިލައި ގޮސްފައިވާ ކަމަށް ސިފަކުރައްވައި، ފައްޔާޒު ވަނީ ސަރުކާރުގެ އަމަލުތަކަށް ވަރަށް ބޮޑަށް ފާޑުވިދާޅުވެފަ އެވެ. އޭނާ ވިދާޅުވި ގޮތުގައި މިހާރު ގައުމުގެ ހާލަތު އޮތް ގޮތުން ސިޔާސީ ތަފާތު ވިސްނުންތައް އެއްފަރާތްކޮށް، ސަރުކާރާ ދެކޮޅަށް މުޅި ރާއްޖޭގައި މުޒާހަރާކޮށް ރައްޔިތުންގެ ނުރުހުމުގެ އަޑު އިއްވަން ޖެހެ އެވެ.
މި މަސައްކަތުގައި އިދިކޮޅު ލީޑަރުންގެ ދައުރު ބޮޑުކަން ފާހަގަކުރައްވަމުން ފައްޔާޒު ވަނީ ކުރީގެ ތިން ރައީސުން ކަމަށްވާ ރައީސް މުހައްމަދު ނަޝީދާއި، ރައީސް އިބްރާހީމް މުހައްމަދު ސޯލިހު އަދި ރައީސް އަބްދުﷲ ޔާމީން އަބްދުލްގައްޔޫމް އެކުގައި ނުކުމެވަޑައިގަތުމަށް އިލްތިމާސްކުރައްވާފަ އެވެ. މިއީ އެ ބޭފުޅުން ގައުމުގެ ހައްގުގައި ނުކުމެވަޑައިގެން ގައުމު ސަލާމަތް ކުރަންވީ ވަގުތު ކަމަށް އޭނާ ވިދާޅުވި އެވެ. އަދި އެ ތިން ރައީސުންނާއެކު މި މަސައްކަތުގައި ފަސްޖެހުމެއް ނެތި ބައިވެރިވުމަށް އެމްޑީޕީ އޮތީ ތައްޔާރަށް ކަމުގެ ޔަގީންކަން ވެސް ފައްޔާޒު ދެއްވި އެވެ.
މީގެ އިތުރުން، ނޫސްވެރިކަމުގެ މިނިވަންކަމަށް ހުރަސްއެޅެމުންދާ ކަމުގެ ކަންބޮޑުވުން ފާޅުކުރައްވައި، ހައްޔަރުކޮށްފައިވާ ނޫސްވެރިން މިހާރުން މިހާރަށް މިނިވަން ކުރުމަށް ފައްޔާޒު ވަނީ ގޮވާލައްވާފަ އެވެ. މިކަމުގައި އިންސާފުވެރި ފަނޑިޔާރުންނާއި މިނިވަން މުއައްސަސާތަކުން އިސްނަގައިގެން މަސައްކަތް ކޮށްދެއްވުމަށް ވެސް އޭނާ ވަނީ އިލްތިމާސްކުރައްވާފަ އެވެ.
ފައްޔާޒު މިފަދަ މޭރުމަކުން ވާހަކަދައްކަވާފައި މިވަނީ، ސަރުކާރުގެ ބައެއް ސިޔާސަތުތަކާ ގުޅިގެން އިދިކޮޅު ފަރާތްތަކުގެ ފާޑުކިޔުން އަމާޒުވެ، ސިޔާސީ މަސްރަހު ހޫނުވެފައިވާ ދަނޑިވަޅެއްގަ އެވެ. ހާއްސަކޮށް ހިޔާލު ފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމަށް ސަރުކާރުން ނުފޫޒު ފޯރުވާ ކަމަށް ބުނެ އިދިކޮޅު އިއްތިހާދުން ދަނީ ކަންބޮޑުވުން ފާޅުކުރަމުންނެވެ.
