މިދިޔަ ދެ ހަފްތާ ތެރޭގައި ކުޅުދުއްފުށިން 62 މީހުން ޑެންގީއަށް ޕޮޒިޓިވްވެއްޖެ

މިދިޔަ ދެ ހަފްތާ ތެރޭގައި މަދިރީގެ ޒަރީޔާއިން ފެތުރޭ ޑެންގީހުމަށް ހދ. ކުޅުދުއްފުށިން 62 މީހުން ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ. 

އެޗްޕީއޭއިން ބުނީ މިދިޔަ ދެ ހަފްތާ ތެރޭގައި އެންމެ ގިނައިން ޑެންގީ ކޭސްތައް ރިޕޯޓްކުރީ ހދ. އަތޮޅުން ކަމަށްވާއިރު، އެއީ ޖުމްލަ 83 ކޭސް އެވެ. އޭގެއިތުރުން މިދިޔަ ދެ ހަފްތާ ތެރޭގައި ގދ. އަތޮޅުން ޑެންގީގެ 17 ކޭސްއެއް ރިޕޯޓުކުރި އެވެ. 

މިދިޔަ މަހު މުޅި ރާއްޖެއިން 635 މީހުން ޑެންގީއަށް ޕޮޒިޓިވްވިއިރު، މި ހިނގާ މެއި މަސް ފެށިގެން މެއި 3، އާ ހިސާބަށް 116 މީހުން ބައްޔަށް ޕޮޒިޓިވްވި އެވެ. މި އަހަރު ޑެންގީއަށް ޕޮޒިޓިވްވާ އަދަދު މިދިޔަ އަހަރު މި މުއްދަތާ އަޅާބަލާއިރު ބޮޑުތަނުން ވަނީ އިތުރުވެފަ އެވެ. 

މި އަހަރުގެ ޖެނުއަރީ މަހުން ފެށިގެން މެއި 3، ގެ ނިޔަލަށް މުޅި ރާއްޖެއިން 2،459 މީހުން ޑެންގީއަށް ޕޮޒިޓިވްވި އެވެ. އެގެ ތެރެއިން 410 މީހުންނަކީ މާލެ ސަރަހައްދުން ރިޕޯޓުކުރި ކޭސްތައް ކަމަށްވާއިރު، ބާކީ 2،059 ކޭސްއަކީ އަތޮޅު ތެރެއިން ރިޕޯޓުކުރި ކޭސްތަކެވެ. 

ރާއްޖޭގައި ހުރިހާ ހިސާބެއްގައި ވެސް މި ދުވަސްވަރު މަދިރިން ޖެހޭ ޑެންގީ ހުން ފެތުރޭތީ ސަލާމަތީ ފިޔަވަޅުތައް އަޅަން އެޗްޕީއޭއިން މިދިޔަ މަހު އިލްތިމާސްކުރި އެވެ. 

ޑެންގީ ހުމުން ރައްކާތެރިވުމަށްޓަކައި ސްކޫލްތަކާއި ހޮސްޕިޓަލްތަކާއި ކައުންސިލްތަކާއި ރިސޯޓުތަކާއި ކޮންސްޓްރަކްޝަން ސައިޓުތަކާއި ޖަމިއްޔާތަކާއި މީޑިއާ އަދި އަމިއްލަ ފަރުދުން މަސައްކަތް ކުރަން އެޗްޕީއޭ އިން ވަނީ އިލްތިމާސްކޮށްފަ އެވެ. 

އެޗްޕީއޭއިން ބުނީ ޑެންގީ ހުމުގެ އަލާމާތްތަކަށް ހޮސްޕިޓަލްތަކުން ވަރަށް ބޮޑު ސަމާލުކަމެއް ދޭންޖެހޭނެ ކަމަށެވެ. ރަށު ތެރެ ސާފުކޮށް ބެލެހެއްޓުމަށް ރަށު ކައުންސިލްތަކުން ޓާސްކް ފޯހެއް ހެދުމަށް ވެސް އެޗްޕީއޭ އިން އެދެ އެވެ. 

ޑެންގީ ފެތުރެނީ ކިހިނެއް؟

ޑެންގީ އަކީ ގައިން ގަޔަށް އަރާ ބައްޔެއް ނޫނެވެ. އެއާ ހިލާފަށް މި ބަލި ފެތުރެނީ ޑެންގީ ވައިރަސް ހަށިގަނޑުގައި ހިމެނޭ އަންހެން އީޑީޒް މަދިރި އިންސާނުންގެ ގައިގައި ހެފުމުންނެވެ. އިންސާނުންގެ ގައިން މަދިރި އަށް ވެސް މި ބަލި އަރަ އެވެ. އިންފެކްޓުވެފައިވާ މަދިރީގެ މުޅި އުމުރަށް ވެސް އިންސާނުންގެ މެދުގައި ބަލި ފަތުރަމުން ދާނެ އެވެ. މަދިރިއެއްގެ އުމުރުގެ ދިގު މިނަކީ 3-4 ހަފުތާ އެވެ.

ޑަބްލިއުއެޗްއޯ އިން ބުނެފައި ވަނީ ފަހަކަށް އައިސް ޑެންގީ ފެތުރުން ވަރަށް ބޮޑަށް އިތުރުވެފައިވާ ކަމަށެވެ. އިންފެކްޝަންގެ އަސަރު އިންސާނަކަށް ކުރުމުން އަލާމާތްތައް ފެންނަނީ 4-5 ދުވަސް ފަހުންނެވެ. އެ އަލާމާތްތައް ހަފުތާއެއް ނުވަތަ އެއަށްވުރެ ގިނަ ދުވަސް ވަންދެން ފެނުން އެކަށީގެންވެ އެވެ.

ޑެންގީ ޖެހޭ ކޮންމެ ހަތަރު މީހެއްގެ ތެރެއިން އެކަކު ބަލިވެ އެވެ. އަލާމާތްތަކުގެ ތެރޭގައި ބޮލުގައި ރިއްސުން، މޭނުބައި ކުރުން، ހުން އައުން، ބަނޑުގައި ރިއްސުން، ނޭވާލާން އުނދަގޫވުން އަދި ސީރިއަސް ހާލަތްތަކުގައި ހަށިގަނޑުގެ އެތެރެއިން ލޭ އައުން ހިމެނެ އެވެ. ޑެންގީ ޖެހުމުން ބަލިވާ ކޮންމެ 10 މީހުންގެ ތެރެއިން އެކަކުގެ ހާލު ސީރިއަސްވެ އެވެ.