އާންމު ސިއްހަތަށް ގެއްލުންވާ މިންވަރަށް ރާއްޖެ ސަރަހައްދުގެ ވައި ނުސާފުވުމާ ގުޅިގެން އެކަމަށް ސަމާލުވުމަށް ހެލްތު ޕްރޮޓެކްޝަން އޭޖެންސީން އިލްތިމާސްކޮށްފި އެވެ.
އެޗްޕީއޭއިން ބުނީ މޫސުމާ ބެހޭ ގައުމީ އިދާރާގެ ތަފާސް ހިސާބުތަކުން ދައްކާ ގޮތުގައި ރާއްޖޭގެ އެކި ކަންކޮޅަށް ދުންފުހުގެ އަސަރު ވަރަށް ބޮޑަށް ކުރަމުންދާ ކަމަށެވެ. ދުންފުހުގެ އަސަރު އެންމެ ބޮޑަށްކޮށް، ވައި ނުސާފުވެފައި ވަނީ މެދު ރާއްޖެ ސަރަހައްދަށް ކަމަށް އެ އިދާރާއިން ބުންޏެވެ.
"ކުރިއަށް އޮތް ދެ ދުވަހު ވެސް ދުންފުހުގެ [ހޭޒްގެ] އަސަރު ރާއްޖޭގެ ސަރަހައްދުގައި ހުންނާނެ ކަމަށް ބެލެވޭ. މިކަމާ ގުޅިގެން ރައްކާތެރިކަމުގެ ފިޔަވަޅުތައް އެޅުއްވުމަށް ހާއްސަ ސަމާލުކަމެއް ދެއްވާ،" އެޗްޕީއޭއިން ކުރި ޕޯސްޓެއްގައި ބުންޏެވެ.
އެޗްޕީއޭއިން ހަވީރު އެހެން ބުނި ނަމަވެސް، މި ވަގުތު އެންމެ ވައި ނުސާފުވެފައި ވަނީ ރާއްޖޭގެ އުތުރުގެ ރަށްތަކަށްށެވެ. ކުޅުދުއްފުށީގައި ހުންނަ އެއާ ކޮލިޓީ މޮނީޓަރިން ސިސްޓަމުން ދައްކާ ގޮތުން މި ވަގުތު އެ ސަރަހައްދުގެ ވައިގެ ކޮލިޓީ ހުރީ 168 ގަ އެވެ. އެއީ އާންމު ސިއްހަތަށް ގެއްލުންވާ މިންގަނޑެވެ.
ވިލިމާލޭގައި ހުންނަ އެއާ ކޮލިޓީ މޮނީޓަރިން ސިސްޓަމުން ދައްކާ ގޮތުން މި ވަގުތު ވެސް މާލެ ސަރަހައްދުގެ ވައިގެ ކޮލިޓީ ހުރީ 161 ގަ އެވެ. އެއީ ސިއްހަތަށް ނުރަނގަޅު ރަތް ކުލައިގެ މިންގަނޑެވެ.
އޭގެ އިތުރުން ރާއްޖޭގެ ދެކުނުގެ އަތޮޅުތަކުގެ ވައި ވެސް މި ވަގުތު ވަރަށް ނުސާފެވެ. އެގޮތުން އައްޑޫ ހިތަދޫގައި ހުންނަ އެއާ ކޮލިޓީ މޮނިޓަރިން ސިސްޓަމުން ދައްކާ ގޮތުން މި ވަގުތު އެ ސަރަހައްދުގެ ވައިގެ ކޮލިޓީ ހުރީ 153 ގަ އެވެ. ފުވައްމުލަކުގައި ހުންނަ އެއާ ކޮލިޓީ މޮނިޓަރިން ސިސްޓަމުން ދައްކާ ގޮތުން އެ ސަރަހައްދުގެ ވައިގެ ކޮލިޓީ ހުރީ 159 ގަ އެވެ.
ވައި ނުސާފު ވަގުތުތަކުގައި ފުއްޕާމޭގެ ބަލިތަކާއި ހިތުގެ ބަލި ނުވަތަ އެލާޖީގެ މައްސަލަތައް ހުންނަ މީހުންގެ އިތުރުން ކުޑަކުދިންނާއި ދޮށީ އުމުރުން މީހުން ބޭރުގައި ގިނަ ވަގުތު ހޭދަ ނުކުރުމަށް އެޗްޕީއޭއިން މީގެ ކުރިން އިލްތިމާސް ކޮށްފައިވެ އެވެ.
ވައި ނުސާފު ދުވަސްވަރު ތުއްތު ކުދިން ގެއިން ބޭރަށް ނުނެރުމަށާއި ގޭގޭގެ ދޮރުތައް ލައްޕާފައި ބެހެއްޓުމާއި ގެއިން ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން ކުޑަ ދުވަސްކޮޅަކަށް މަޑު ޖައްސައިލަން އެޗްޕީއޭއިން މީގެ ކުރިން އިލްތިމާސް ކޮށްފައިވެ އެވެ.
