މަދިރީގެ ޒަރިއްޔާއިން ފެތުރޭ ޑެންގޫ ހުން ޖެހިގެން 22 އަހަރުގެ ޒުވާނަކު މަރުވެއްޖެ އެވެ.
މައުލޫމާތު ލިބިފައިވާ ގޮތުގައި ޑެންގޫ ޖެހިގެން ހާލުދެރަވެ މަރުވީ ށ. މިލަންދޫއަށް ނިސްބަތްވާ ޒުވާނެކެވެ.
ޑެންގޫ ހުން ޖެހިގެން ޒުވާނަކު މަރުވެފައިވާއިރު، ރާއްޖޭގައި ޑެންގޫ ހުން ފެތުރޭ މިންވަރު ވަނީ އިތުރުވެފަ އެވެ. އެގޮތުން، ހުސްވި މާޗު މަހުގެ ތެރޭގައި ޑެންގޫ ހުން ޖެހިގެން 535 ކޭސް ރިޕޯޓުކޮށްފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކަ އެވެ.
އެއީ އޭގެ ކުރީ މަހާ އަޅައިބަލާއިރު، އިތުރު އަދަދެކެވެ. ފެބްރުއަރީ މަހު ޑެންގޫ ހުން ޖެހިގެން ރިޕޯޓު ކޮށްފައި ވަނީ 428 ކޭހެވެ. މި އަދަދުތަކަކީ މީގެ ކުރީ ތިން އަހަރާ އަޅައިބަލާއިރު ވަރަށް ބޮޑުތަން އިތުރު އަދަދެކެވެ.
ޑެންގޫ ހުން ރާއްޖޭގައި އެންމެ ގިނައިން ފެތުރެނީ މެއި މަހުން ފެށިގެން ޖުލައި މަހާ ދެމެދު އެވެ. އަދި، ނޮވެމްބަރު ޑިސެމްބަރުގައި ވެސް ޑެންގޫ ފެތުރޭ މިންވަރު އިތުރުވާ ކަމަށް ތަފާސްހިސާބުތަކުން ދައްކަ އެވެ.
އީޑީސް މަދިރީގެ ސަބަބުން ޖެހޭ ޑެންގޫ ހުމަކީ ދާދި އަވަހަށް ސީރިއަސްވެ، ފުރާނައަށް ނުރައްކާ ކުރުވާ ބައްޔެކެވެ. ނަމަވެސް ބައެއް މީހުންނަށް މި ބަލީގެ މާބޮޑު އަލާމާތްތަކެއް ނުފެނި ރަނގަޅުވެސްވެ އެވެ.
ޑެންގޫ ފެތުރެނީ ވައިރަސް ހަށިގަނޑުގައި ހިމެނޭ އަންހެން އީޑީޒް މަދިރިއެއް އިންސާނުންގެ ގައިގައި ހެފުމުންނެވެ. ގާތްގަނޑަކަށް ހަތަރު ހަފުތާގެ އުމުރުގައި އީޑީޒް މަދިރި، ބަލި ފަތުރަމުން ދެ އެވެ.
ޑެންގޫ ހުމުގެ އާންމު އަލާމާތްތަކުގެ ތެރޭގައި ހިމެނެނީ ހުން އައުމާއި ބޮލާއި ގައިގައި ރިއްސުން އަދި މޭ ނުބައި ކުރުމެވެ.
ހުމާއެކު އިތުރު އަލާމާތްތައް ނުފެނުނު ކަމުގައިވީ ނަމަވެސް ހުން އަންނަތާ ތިން ދުވަސްވުމުން ޑޮކްޓަރަށް ދެއްކުމަށް ސިއްހީ ހިދުމަތްތެރިން ލަފާ ދެއްވަ އެވެ. ޑެންގޫ ހުމަކީ އޭގެ ސަބަބުން ފުރާނައަށް ނުރައްކާވާ ފަދަ ހާލަތްތައް ވެސް ދިމާވެދާނެ ބައްޔެކެވެ.
ންގޫ ހުމަށް ވަކި ހާއްސަ ފަރުވާއެއް ނުދެ އެވެ. ބަލީގެ އަލާމާތްތަކަށް އާންމުކޮށް ދެނީ ޕެރެސެޓަމޯލް އެވެ. އަދި ޑޮކްޓަރުން ލަފާ ދެއްވަނީ ގިނަގިނައިން ދިޔައި ތަކެތި ބޭނުން ކުރުމަށެވެ.
ޑީހައިޑްރޭޓްވުމުން ދުރުވުމަށް, ޑޮކްޓަރުން ލަފާ ދެއްވަނީ ކޮފީ އާއި ކެފެއިން އެކުލެވޭ ބުއިންތަކާއި މައިލޯ، ކަރާ ފަނި ފަދަ ކުލަ ގަދަ އަދި ރަތް ކުލަ ހުންނަ ބުއިންތައް ބޭނުން ނުކޮށް، ލޮނު ޕެކެޓު، ކުރުނބާ ފަނި އަދި ޖޫސް ފަދަ ތަކެތި ބޭނުން ކުރުމަށެވެ.
ޑެންގޫ ހުމަކީ މާބޮޑު ޑޮކްޓަރީ ފަރުވާއެއް ނެތް ބައްޔަކަށްވީ ނަމަވެސް, ބަލި ޖެހޭ މީހުންނަށް ފަޅޯފަތުގެ ޖޫސް ދީ އުޅެ އެވެ. އެއީ ޑެންގޫ ހުމުގައި އެންމެ ބޮޑަށް މޮނިޓާ ކުރަންޖެހޭ އެއްޗެއްގެ ގޮތުގައި އެނގިފައި އޮންނަ ލޭގެ ޕްލެޓްލެޓް ކައުންޓު މަތި ކުރުމަށެވެ.
