ރާއްޖޭގައި ހުރިހާ ހިސާބެއްގައި ވެސް މި ދުވަސްވަރު މަދިރިން ޖެހޭ ޑެންގީ ހުން ފެތުރޭތީ ސަލާމަތީ ފިޔަވަޅުތައް އަޅަން ހެލްތު ޕްރޮޓެކްޝަން އެޖެންސީ އިން މިއަދު އިލްތިމާސްކޮށްފި އެވެ.
މިދިޔަ މާޗް މަހު އެކަނި ވެސް ޑެންގީ ހުމުގެ 535 ކޭސް ރިޕޯޓުކޮށްފައިވާ ކަމަށް އެޗްޕީއޭ އިން ބުންޏެވެ. ޑެންގީ ޖެހިގެން ރާއްޖެއިން މިދިޔަ ހަފުތާގައި ޒުވާނަކު ނިޔާ ވެސް ވި އެވެ.
ޑެންގީ ހުމުން ރައްކާތެރިވުމަށްޓަކައި ސްކޫލްތަކާއި ހޮސްޕިޓަލްތަކާއި ކައުންސިލްތަކާއި ރިސޯޓުތަކާއި ކޮންސްޓްރަކްޝަން ސައިޓުތަކާއި ޖަމިއްޔާތަކާއި މީޑިއާ އަދި އަމިއްލަ ފަރުދުން މަސައްކަތް ކުރަން އެޗްޕީއޭ އިން ވަނީ އިލްތިމާސްކޮށްފަ އެވެ.
އެޗްޕީއޭއިން ބުނީ ޑެންގީ ހުމުގެ އަލާމާތްތަކަށް ހޮސްޕިޓަލްތަކުން ވަރަށް ބޮޑު ސަމާލުކަމެއް ދޭންޖެހޭނެ ކަމަށެވެ. ރަށު ތެރެ ސާފުކޮށް ބެލެހެއްޓުމަށް ރަށު ކައުންސިލްތަކުން ޓާސްކް ފޯހެއް ހެދުމަށް ވެސް އެޗްޕީއޭ އިން އެދެ އެވެ.
އޭގެ އިތުރުން، މަދިރި އާލާވާ ގޮތަށް ހުރި ތަންތަން ބަލައި ރަށު ތެރެ ސާފުކޮށް، ބެލެހެއްޓުމަށް ހުރިހާ ފަރާތްތަކަކުން ވެސް ސަމާލުކަން ދޭންވާނެ ކަމަށް އެޗްޕީއޭ އިން ބުނެ އެވެ.
