ސަރުކާރާ ދެކޮޅަށް އިދިކޮޅު ސިޔާސީ ޕާޓީތަކުން ގާނޫނާ ހިލާފު ހަރަކާތްތައް ހިންގަމުން އަންނަ ކަމަށް ތުހުމަތުކޮށް އެ ހަރަކާތްތަކާ ދެކޮޅަށް ފިޔަވަޅު އަޅައިދިނުމަށް ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ފަރާތުން ރައްޔިތުންގެ މަޖިލީހަށް މިއަދު ގަރާރެއް ހުށަހަޅައިފި އެވެ.
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާއި ޕީޕަލްސް ނެޝަނަލް ފްރޮންޓް (ޕީއެންއެފް) އިން އަންނަނީ ސަރުކާރުގެ ސިޔާސަތުތަކާ ދެކޮޅަށް ސިލްސިލާކޮށް މަގުމަތީ ހަރަކާތްތަކެއް ހިންގަމުންނެވެ.
ޖަލްސާގައި މި ގަރާރު ހުށަހެޅުއްވީ ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު އެވެ. އެ ޕާޓީތަކުން ހިންގާ ހަރަކާތްތަކަކީ މަސްލަހަތު ނަގާލުމަށް ހިންގާ ހަރަކާތްތަކެއްގެ ގޮތުގައި އެ ގަރާރުގައި ވަނީ ސިފަކޮށްފަ އެވެ.
ސަރުކާރު ޕާޓީގެ ޕާލިމެންޓްރީ ގްރޫޕްގެ ލީޑަރު އިބްރާހިމް ފަލާހު ވަނީ ފެހި ގާނޫނުއަސާސީގެ ދަށުން ސިޔާސީ ޕާޓީތައް އުފެދުމާއެކު މުޖުތަމައުއަށް ނޭދެވޭ ބަދަލުތަކެއް އައިސްފައިވާ ކަމަށް ވިދާޅުވެފަ އެވެ. ސިޔާސީ ޕާޓީތަކާއެކު މުޖުތަމައުގެ ކަންކަން ހައްދުން ނައްޓާފައިވާ ކަމަށް ފަލާހު ވިދާޅުވި އެވެ.
މިދިޔަ ސަރުކާރުގައި ޕީޕީއެމްއިން ކުރި މުޒާހަރާތަކުގެ ވާހަކަ ގެންނެވުމުން ފަލާހު ވަނީ ޕީޕީއެމްއަކީ ޕީއެންސީ ނޫން ކަމަށް ވިދާޅުވެ އޮޅުވައިލަން މަސައްކަތް ކުރައްވާފަ އެވެ. ކުރީީގެ ރައީސް އަބްދުުالله ޔާމީން އާއި މަދު ބަޔަކު ފިޔަވައި ޕީޕީއެމްއަށް ނިސްބަތްވާ އެންމެން ތިބީ މި ސަރުކާރުގަ އެވެ.
މަޖިލީހުގައި ތިއްބަވާ އިދިކޮޅު މެންބަރުން ވެސް ވަނީ ސަރުކާރަށް ބަހުގެ ހަމަލާތަކެއް އަމާޒުކުރައްވާފަ އެވެެ. އެގޮތުން އެމްޑީޕީގެެ ޕާލިމެންޓްރީ ގްރޫޕްްގެ ޑެޕިއުޓީ ލީޑަރު ހުސައިން ޒިޔާދު (ފިއްޓޭ) ވަނީ މިހާރު ސަރުކާރުގައި ތިއްބެވި ބޭފުޅުން މަގުމަތީގައި ހަރަކާތްތެރިވިއިރު ވެެސް ސިޔާސީ ޕާޓީތަކުގެ ގާނޫނު އޮތް ކަމަށާއި ފިޔަވަޅު އަޅާފައި ނުވާ ކަމަށް ވިދާޅުވެފަ އެވެ.
”އިންޑިއާ އައުޓް ގޮވިއިރު ވެސް އޮތް އެެ މާއްދާ ގާނޫނުއަސާސީގައި ލިޔެވިފައި. މި ބޭފުޅުން ހަނދާނަކު ނެތް. މާލި ހަދައިގެން ނުކުމެ މަގުމަތީގައި ނުކުމެ ދުވުއިރު ވެސް ކުޑަކުދިން ބަލައި އަތްޖެހި. ރައީސް ވެސް އެ ދެއްކެވި ވާހަކަ އާއި މި ބޭފުޅުން ދެއްކެވި ވާހަކަ އަޑު އެހިއޭ،” ވައިކަރަދޫ ދާއިރާގެ މެންބަރު ފިއްޓޭ ވިދާޅުވި އެވެ.
ކެންދޫ ދާއިރާގެ މެންބަރު މައުރޫފް ޒާކިރު ވަނީ މުޒާހަރާކޮށް ސަރުކާރު ވައްޓާލަން ޖެހޭ ހާލަތަށް ގައުމުގެ ކަންކަން ގޮސްފައިވާ ކަމަށް ވިދާޅުވެފަ އެވެ. މިވަގުތު ރާއްޖޭގެ ރައްޔިތުންގެ ތެރެއިން ގިނަ ބަޔަކު ސަރުކާރަށް ނޫނެކޭ ބުނެފައިވާ ކަމަށް އޭނާ ވިދާޅުވި އެވެ.
”ދެ އަހަރާއި ބައިވީއިރު ރައްޔިތަކަށް ވީ ކަމެއް ނެތޭ. އޭގެ ބަދަލުގައި މި ފެނިގެންދަނީ ދޮގު ހެދުމާއި ވައްކަން ކުރުން. ދިވެހި ރައްޔިތުންގެ މުޅި މާލިއްޔަތު ލޫޓުވާލާފައި ވައްކަން ކުރުން ނޫން ކަމެއް. ކޮންމެ ޕްރޮޖެކްޓެއްގެ ފަހަތުގައި ވަނީ ވައްކަން،” މައުރޫފް ވިދާޅުވި އެވެ.
ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވަނީ ސިޔާސީ ޕާޓީއަކުން ކުރާނެ އެެންމެ ބޮޑު ކުށަކީ ވައްކަން ކުރުން ކަމަށް ވިދާޅުވެ މި ސަރުކާރުން ވައްކަން ކުރުމުންދާ ކަމަށް ތުހުމަތު ކުރައްވާފަ އެވެ.
”ބަސްމަގަކުންނެއް ނޫން ސިޔާސީ ޕާޓީއެއް އާންމު އިޖުތިމާއީ މިންގަނޑާ ހިލާފަށް އަމަލުކުރަނީއެއް ނޫން. ސިޔާސީ ޕާޓީތަކުން ކުރާ އެންމެ ހުތުރު އަމަލަކީ ވައްކަން. މި ސަރުކާރުން މި ނޫން ކަމެއް ނުކުރޭ،” މީކާއިލް ވިދާޅުވި އެވެ.
