މާފަންނު މެދު ދާއިރާގެ މެންބަރު އަސްމާ ރަޝީދާ މެދު ސަރުކާރު ހިންގާ ޕީއެންސީން އަޅާފައިވާ ފިޔަވަޅުތަކެއް ބާތިލްކޮށް، ރައްޔިތުންގެ މަޖިލީހުގެ އިޖުތިމާއީ ކޮމިޓީގެ މުގައްރިރުކަން ވެސް އަލުން އޭނާއަށް ދީފިއެވެ.
މިދިޔަ އަހަރުގެ ޑިސެމްބަރު 1 ގައި އަސްމާ އެ ކޮމިޓީގެ މުގައްރިރުކަމުން ވަކިކުރީ ރައީސް މުހައްމަދު މުއިއްޒު މާފަންނު ރައްޔިތުންނާ ބައްދަލުކުރެއްވުމަށް ބޭއްވި ޖަލްސާއެއްގައި ސުވާލުކުރާނެ މީހުންގެ ނަންތައް ފޮނުވުމަށް އެދިވަޑައިގަތުމާ ގުޅިގެން އުފެދުނު ހިޔާލުތަފާތުވުންތަކެއްގައެވެ.
ފަސް މަސް ދުވަހަށް ފަހު އަސްމާއަށް އަލުން ކޮމިޓީގެ މުގައްރިރުކަން ދީފައިވާއިރު، މަޖިލީހުގެ ރަސްމީ ދަތުރުތަކުގައި ވެސް މިހާރު އޭނާ ބައިވެރިކުރަން ވަނީ ފަށާފައެވެ. އަސްމާއާ މެދު ކުރިން އެޅި ފިޔަވަޅުތައް އުވައިލަން ނިންމާފައި މިވަނީ ރައީސް މުއިއްޒުގެ މަގުބޫލުކަން ދަށްވަމުންދާ ކަމަށް ބައެއް ފަރާތްތަކުން ބުނަމުންދާ ދަނޑިވަޅެއްގައެވެ.
އަސްމާއާ މެދު ފިޔަވަޅު އެޅީ މުއިއްޒު މާފަންނު ރައްޔިތުންނާ ބައްދަލުކުރައްވަން އޮތް ބައްދަލުވުމުގައި ސުވާލުކުރަން ބޭނުންވާ މީހުންގެ ނަންތައް ފޮނުވުމަށް އެދި އަސްމާ ކުރެއްވި މެސެޖަކާ ގުޅިގެންނެވެ. އެ މެސެޖާ ގުޅިގެން މުއިއްޒު ވަނީ ޕީއެންސީގެ ޕާލިމަންޓްރީ ގްރޫޕުގެ ވަޓްސްއެޕް ގްރޫޕުގައި އަސްމާއަށް ވަރަށް ބޮޑަށް ނުރުހުން ފާޅުކުރައްވާފައެވެ. މުއިއްޒު ވިދާޅުވެފައި ވަނީ އެ މެސެޖުގެ ސަބަބުން އެމަނިކުފާނުގެ އިސްތަށިފުޅުގައި ބަދުނާމެއް އެޅިފައިވާ ކަމަށާއި، އެއީ އެމަނިކުފާނުގެ އެއްވެސް މަޝްވަރާއެއް ނެތި ކުރި ކަމެއް ކަމަށް ބުނެ އާންމުކޮށް މައާފަށް އެދުމަށެވެ.
އެ ހާދިސާއާ ގުޅިގެން އަސްމާ ވަނީ ރައްޔިތުންގެ ކިބައިން މައާފަށް އެދި ބަޔާނެއް ވެސް ނެރެފައެވެ. ނަމަވެސް، އެ ފަހަރު އަސްމާ ވަނީ އިޖުތިމާއީ ކޮމިޓީގެ އިތުރުން ޔޫކޭ-މޯލްޑިވްސް ފްރެންޑްޝިޕް ގްރޫޕުގެ ޗެއާގެ މަގާމުން ވެސް ވަކިކޮށްފައެވެ.
ނިމިދިޔަ ލޯކަލް ކައުންސިލް އިންތިހާބާއި ރައްޔިތުންގެ މެދުގައި ނެގި ފެންނަ ނުފެންނަ ވޯޓުގައި ޕީއެންސީ އަށް ވޯޓުނުދޭން އަސްމާ ބާރުއަޅައި ވާހަކަ ދައްކާފައިވާ އޯޑިއޯއެއް ލީކްވެފައި ވަނިކޮށް، ޔޫއޭއީގައި ހުންނަވާ ދިވެހި ސަފީރަކަށް ހުންނެވި އަސްމާގެ ދަރިކަލުން މުހައްމަދު ހުސައިން ޝަރީފު (މުންދު) އާއި ޖެނީވާގައި ހުންނަވާ ދާއިމީ މަންދޫބު ހުންނެވި އަސްމާގެ ކޮއްކޮ، ޑރ. ސަލްމާ ރަޝީދު މަގާމުން ވަކިކުރި އެވެ.
ނަމަވެސް ފަހުން މުންދުއަށް ވަނީ ސަރުކާރުގެ ތަރުޖަމާނުކަން ދީފަ އެވެ.
