އިދިކޮޅު އެމްޑީޕީއަށް 2028 ވަނަ އަހަރު ބާއްވާ ރިޔާސީ އިންތިހާބު ކާމިޔާބުކުރެވޭނީ ޖޫން 12، ގައި ބާއްވާ އެ ޕާޓީގެ ޗެއާޕާސަން އިންތިހާބުގައި ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް ހޮވައިގެން ކަމަށް ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދު ރޭ ވިދާޅުވެއްޖެ އެވެ.
މީކާއީލްގެ އިތުބާރު ކެމްޕެއިން އިން ބޭއްވި ޖަލްސާއެއްގައި ޝަމްހީދު ވިދާޅުވީ ޗެއާޕާސަން އިންތިހާބުގައި ނިންމާ ނިންމުމަކީ މިހާރު ރައްޔިތުން ޖެހިފައި އޮތް ހާލުން ގައުމު ސަލާމަތް ކުރާނެ މީހަކު ހޯދުން ކަމަށްވާއިރު، އެކަން ކުރެވޭނީ މީކާއިލްއަށް ކަމަށެވެ.
"މި ނަގާ ވޯޓުގައި މި ނިންމަނީ އަޅުގަނޑުމެންނަށް، މި ދިވެހިރާއްޖޭގެ ރައްޔިތުން މިއަދު ޖެހިފައި މިއޮތް ހާލު މި ގައުމު ސަލާމަތްކުރާނެ ބަޔަކު ހޯދަން. އެ މަސައްކަތުގައި މި ޕާޓީ އެކުއެކީގައި ގެންދާނެ ބޭފުޅެއް ހޯދުމުގެ މަސައްކަތް. އެއީ އަޅުގަނޑުމެންގެ ވޯޓު ކަރުދާހުގައި އޮންނަ ސުވާލަކީ. މި ޕާޓީއަށް 2028 ކާމިޔާބުކުރެވޭނީ މިތަނުން ކޮން ބޭފުޅެއްގެ ޗެއާޕާސަންގެ ދަށުގަހޭ،" ޝަމްހީދު ވިދާޅުވި އެވެ.
"އަޅުގަނޑަށް ހީވަނީ ތިޔަ އެންމެ ބޭފުޅުން ރަނގަޅަށް ވިސްނައިފިއްޔާ އޭގެ ޖަވާބު ވަރަށް ސާފުކޮށް ފެންނާނެއޭ. އެއީ އިތުބާރު ކެމްޕެއިނުގައި އަޅުގަނޑުމެންނާއެކު މިހިރަ އެމްޕީ މީކާއިލް ނަސީމްއޭ."
ޝަމްހީދު ވިދާޅުވީ އޭނާ މަޖިލީހުގައި ހޭދަކުރި ދެ އަހަރެއްހާ ދުވަހުގެ ތެރޭގައި ޕާޓީން ނަގަންޖެހޭ އެންމެ މުހިންމު ނިންމުންތައް ނިންމުމުގައި މީކާއިލް ލީޑާޝިޕް ދެއްކެވި ކަމަށެވެ.
"ޖުމްލަކޮށް އަޅުގަނޑު ބުނަން އޮތީ މި ޕާޓީގައި އަޅުގަނޑު ސިޔާސީ މަގާމެއްގައި މި ހޭދަކުރި ދެ އަހަރު ދުވަހުގެ ތެރޭގައި އެންމެ ކީ ޑިޒިޝަން ނެގުމުގައި މި ޕާޓީގައި އަޅުގަނޑުމެންނާ އެކީގައި ލީޑާޝިޕް ދެއްކެވި ބޭފުޅަކީ އެމްޕީ މީކާއިލް ނަސީމް،" ޝަމްހީދު ވިދާޅުވި އެވެ.
އަންނަ ޖޫން 12، ގައި ބާއްވާ އެމްޑީޕީގެ ޗެއާޕާސަން އިންތިހާބުގައި މީކާއިލްއާ ދެކޮޅަށް ނުކުންނަވަނީ ކުރީގެ ރައީސް މުހައްމަދު ނަޝީދު އެވެ. އެ ދެ ބޭފުޅުން ވެސް ދަނީ އިންތިހާބަށް ކެމްޕެއިން ކުރައްވަމުންނެވެ.
އެމްޑީޕީގެ އަސާސީ ގަވާއިދުގައިވާ ގޮތުން ޗެއާޕާސަން އަކީ ޕާޓީގެ އެތެރޭގެ ކަންކަން ރާވާ އިންތިޒާމުކޮށް ބަލަހައްޓާ އެންމެ އިސް ފަރާތެވެ. ޗެއާޕާސަންގެ ދައުރަކީ ފަސް އަހަރު ދުވަހު އެވެ.
ޗެއާޕާސަންގެ މަސްއޫލިއްޔަތުތަކުގެ ތެރޭގައި ޕާޓީގެ ފަރާތުން ސަރުކާރާއި އެހެނިހެން ސިޔާސީ ފަރާތްތަކާއި މުއާމަލާތް ކުރުމާއި، އެތެރޭގެ އިންތިހާބުތައް ރާވާ އިންތިޒާމު ކުރުމާއި، ކޮންގުރެސް އާއި ގައުމީ މަޖިލީހާއި ގައުމީ ހިންގާ ކޮމިޓީގެ ރިޔާސަތު ބެލެހެއްޓުމާއި، ޕާޓީގެ އިދާރީ ކަންކަމުގެ މަސްއޫލިއްޔަތު އުފުލުން ހިމެނެ އެވެ.
