އެމްޑީޕީއަށް މިއަދު ބޭނުންވާ ބަދަލުގެ ރަމްޒަކީ އެ ޕާޓީގެ ޗެއާޕާސަނަކަށް ކުރިމަތިލައްވާކަން އިއުލާންކުރައްވާފައިވާ ގަލޮޅު ދެކުނު ދާއިރާގެ މެންބަރު، މީކާއީލް އަހްމަދު ނަސީމް ކަމަށް ކުރީގެ އެންވަޔަރަމަންޓް މިނިސްޓަރު އައިމިނަތު ޝައުނާ ރޭ ވިދާޅުވެއްޖެ އެވެ.
މީކާއިލްގެ ކެމްޕެއިން އިވެންޓެއްގައި ޝައުނާ ވިދާޅުވީ މީކާއީލްއަށް އޭނާގެ ފުރިހަމަ އިތުބާރު އޮތް ކަމަށެވެ. އޭނާ ވިދާޅުވީ ޕާޓީގެ ކުރިމަގު އުޖާލާވާނީ އާ ޖީލަކަށް ޕާޓީގެ ހިންގުން ހަވާލުކޮށްގެން ކަމަށެވެ.
"އެމްޑީޕީއަށް ބަދަލެއް މިއަދު ބޭނުންވޭ. އެ ބަދަލުގެ ރަމްޒަކީ މީކާއީލް ނަސީމް. އަޅުގަނޑުގެ ފުރިހަމަ، ފުރިހަމަ އިތުބާރު އެބައޮތް ދެންމެ މީކާއިލް ނަސީމް އެ ވިދާޅުވެދެއްވި ކަންތައްތަކުގެ، ތަސައްވަރުގެ ފުރިހަމަ ކުލަ ޖައްސައިދެވޭނީ އާ ޖީލަކަށް އަޅުގަނޑުމެންގެ މި ޕާޓީ ހިންްގުމުގެ ކަންތައްތަކަށް ހަވާލުކޮށްދެވިގެންކަން،" ޝައުނާ ވިދާޅުވި އެވެ.
ޝައުނާ ވިދާޅުވީ މީކާއީލްއާ ދެކޮޅަށް އިންތިހާބުގައި ވާދަކުރައްވާ ކުރީގެ ރައީސް މުހައްމަދު ނަޝީދަކީ ވަރަށް އިހުތިރާމްކުރައްވާ އަދި ލޯބިވާ ބޭފުޅެއް ކަމަށެވެ. ނަމަވެސް އެމްޑީޕީއަކީ ލީޑަރުން އުފައްދާ ޕާޓީއެއްކަން މިއަދު ފެންނަމުންދާ ކަމަށް އޭނާ ވިދާޅުވި އެވެ.
"އަޅުގަނޑުމެން ވަރަށް އިހުތިރާމްކުރާ، އަޅުގަނޑުމެން ވަރަށް ލޯބިވާ ބޭފުޅެއް އަޅުގަނޑުމެންގެ ވާދަވެރި ކެންޑިޑޭޓަކީ. ސިޔާސީގޮތުން އަޅުގަނޑުމެންނަށް އެތައް، އެތައް ކަމެއް އަޅުގަނޑަށްވެސް ދަސްވެފައި ހުރި، އަޅުގަނޑުމެންނަށް އެބޭފުޅުންނާއެކީގައި އެތައް ދުވަހެއް،" ޝައުނާ ވިދާޅުވި އެވެ.
"އެތައް ޒަމާނެއް އަޅުގަނޑުމެން މަސައްކަތް ކޮށްފިން. އެހެންނަމަވެސް އަޅުގަނޑު މިއަދު ފަހުރުވެރިކަމާއެކީގައި އަޅުގަނޑަށް ދަންނަވާލަން އެނގޭނީ މި ޕާޓީއަކީ ލީޑަރުން އުފައްދާ ޕާޓީއެއްކަން މިއަދު އަަޅުގަނޑުމެންނަށް އެބަ ފެނޭ."
އެމްޑީޕީގެ ޗެއާޕާސަން އިންތިހާބު ބޭއްވުމަށް ހަމަޖެހިފައިވަނީ އަންނަ ޖޫން 12، ގަ އެވެ. އިންތިހާބުގައި ވާދަކުރައްވާނެކަން މިހާތަނަށް އިއުލާންކުރައްވާފައިވަނީ ނަޝީދު އާއި މީކާއީލް އެވެ.
