ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ގާނޫނީ ހައްލެއް ހޯދައިދިނުމަށް ރައްޔިތުންގެ މަޖިލީހަށް ހުށަހަޅާފައިވާ ބޯހިޔާވަހިކަމުގެ ބިލް ކޮމިޓީ މަރުހަލާގައި ތާށިވެފައި ވާއިރު، އެ ބިލް ދިރާސާކުރާ ގެދޮރުވެރިކަމުގެ ކޮމިޓީގެ ބައްދަލުވުމެއް ވެސް ނުބާއްވާތާ ހަ މަސްވަރު ވެއްޖެ އެވެ.
ޕީއެންސީއަށް ނިސްބަތްވާ މާފަންނު މެދު ދާއިރާގެ މެންބަރު އަސްމާ ރަޝީދު މިދިޔަ އަހަރުގެ މެއި 7 ގައި ހުށަހެޅުއްވި ބޯހިޔާވަހިކަމުގެ ބިލް ދިރާސާކުރާ ކޮމިޓީގެ ބައްދަލުވުމެއް އެންމެ ފަހުން ބާއްވާފައިވަނީ ނޮވެމްބަރު 5، 2025 ގައެވެ.
އެ ކޮމިޓީގެ މުގައްރިރަކީ ސަރުކާރު ހިންގާ ޕީއެންސީގެ ޕާލިމެންޓަރީ ގްރޫޕްގެ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހެވެ.
ކޮމިޓީގައި އޮތް ހަމައެކަނި މަސައްކަތަކީ ބޯހިޔަވާހިކަމުގެ ބިލް ދިރާސާކުރުމެވެ.
ބިލް ދިރާސާކުރުން ދިގުލައިގެން ގޮސްފައި ވަނީ ފަލާހުގެ ސަބަބުން ކަމަށް ކޮމިޓީގައި ތިއްބެވި ޕީއެންސީގެ ބައެއް މެންބަރުން މި ނޫހަށް ވިދާޅުވި އެވެ.
"ޕީޖީ ލީޑަރަކަށް ފަލާހު ހުންނެވިޔަސް، ކޮމިޓީއެއް ނުބާއްވާ. ބާއްވާކަން ނުވެސް އުޅޭ،" ޕީއެންސީގެ މެންބަރަކު ވިދާޅުވި އެވެ.
ކޮމިޓީގައި ހިމެނިވަޑައިގަންނަވާ އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެމްބަރު އިބްރާހިމް މުހައްމަދު (ކުޑޫ) ވެސް ވިދާޅުވި ގޮތުގައި ކޮމިޓީ ހުއްޓިފައި އޮތީ ފަލާހުގެ ސަބަބުންނެވެ.
"ބައްދަލުވުމެއް ބާއްވާކަން ނޫޅޭ. ބައްދަލުވުމެއް ބޭއްވިޔަސް ފަސްވަރަކަށް މިނެޓުގެ ތެރޭގައި ނިންމާލާނެ،" އޭނާ ވިދާޅުވި އެވެ.
މި ބިލަކީ ރާއްޖޭގެ ބޯހިޔާވަހިކަމުގެ ސިޔާސަތުތައް ހަރުދަނާކޮށް، ނިކަމެތި އާއިލާތަކަށް އިސްކަންދޭނެ އުސޫލުތަކެއް ކަނޑައެޅުމަށް ފަރުމާކޮށްފައިވާ ބިލެކެވެ. ބިލުގެ މުހިއްމު ބައިތަކުގެ ތެރޭގައި ހިމެނެނީ ބޯހިޔާވަހިކަން ބޭނުންވާ ފަރާތްތަކުގެ ދިރިއުޅުމުގެ ހާލަތު ދިރާސާކުރުމާއި، މާލީ ތަނަވަސްކަން ކުޑަ، ބޯހިޔާވަހިކަމެއް ނެތް އާއިލާތަކަށް ހާއްސަ ޕްރޮގްރާމްތައް ހިންގުމާއި މަޝްރޫއުތައް ހިންގާ ފަރާތްތައް ރަޖިސްޓްރީކޮށް، ދެފުށް ފެންނަ އުސޫލަކުން އަމަލުކުރާކަން ކަށަވަރުކުރުން އަދި ތަރައްގީކުރާ ތަންތަނުގައި ހުންނަންޖެހޭ ވަސީލަތްތަކާއި އަސާސީ ހިދުމަތްތަކުގެ ފެންވަރު ހިފޭނެ ގޮތް ހެދުމެވެ.
ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލަ މި ފަސް އަހަރުގެ ދައުރުގެ ތެރޭގައި ހައްލުކުރާނެ ކަމަށް ރައީސް މުހައްމަދު މުއިއްޒު ވިދާޅުވެފައިވެ އެވެ.
