އެމްޑީޕީގެ ޗެއާޕާސަންގެ މަގާމަށް އިންތިހާބުވެއްޖެ ނަމަ އެންމެ ފުރަތަމަ ވެސް އަމާޒު ހިފާނީ ދެފުށް ފެންނަ ސިޔާސަތެއްގެ ދަށުން ޕާޓީގެ މާލީ ހިސާބުތައް އާންމުކުރަން ކަމަށް ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ވިދާޅުވެއްޖެ އެވެ.
މީކާއީލްގެ އިތުބާރު ކެމްޕެއިން ޕޮޑްކާސްޓްގައި އޭނާ ވިދާޅުވީ ރަށްރަށަށް ދިޔުމުން ޕާޓީއަށް މިލިއަނުން ލިބޭ ރުފިޔާއަށް ކުރާ ހަރަދާ ގުޅޭ ގޮތުން އޭނާއާ ސުވާލުކުރާ ކަމަށެވެ. މިގޮތުން ޕާޓީގެ އާންމު މެންބަރުން ކުރާ ސުވާލަށް ހައްލު ހޯދުމަށް ޕާޓީން ކުރާ ހަރަދުތައް މަގާމަށް ހޮވިއްޖެނަމަ ހާމަކުރާނެ ކަމަށް އޭނާ ވިދާޅުވި އެވެ.
"ރަށްރަށަށް ދިޔާމަ އެބަ އަހައޭ ކީއްހޭ ތިކުރަނީ. ދައުލަތުން ލިބޭ ފައިސާ. އެތައް މިލިއަން ރުފިޔާއޭ. ހަތަރުބުރި ކުއްޔަށް ހިފައިގެން، ޕާޓީ އޮފީހެއް ހިފައިގެން ކީއްހޭ ތިކުރަނީ. ތިމަންނަމެންނާ ކޮބާހޭ އަޅާލުން. މާލޭގައި އެކަނިހޭ ޕާޓީ ހިނގަނީ. މިއީ ރަށްރަށުން އަޅުގަނޑުމެންނާ ކޮށްފައި ހުރި ސުވާލު،" މީކާއިލް ވިދާޅުވި އެވެ.
"އެހެންވީމަ އެކަންކަމަށް ތަސައްލީއެއް ދޭން، އެކަންކަމަށް ހައްލެއް ހޯދަދޭން އަޅުގަނޑު ދެފުށް ފެންނަ ސިޔާސަތެއްގެ ދަށުން ޕާޓީގެ މާލީހިސާބުތައް އާންމުކުރާނަން. ޕާޓީގެ ހަރަދުތައް އާންމުކުރާނަން. ޕާޓީގެ އާންމު މެންބަރުންނަށް ހަގީގަތުގައިވެސް މި ޕާޓީއަކީ އެމީހުންގެ ޕާޓީއެއްކަމުގެ އިހުސާސް އަޅުގަނޑު ކުރުވާނަން."
މީކާއިލް ވިދާޅުވީ އެމްޑީޕީއަށް ލިބޭ ފައިސާއަށް ވާގޮތް އާންމު މެންބަރުންނަށް އެންގެންޖެހޭނެ ކަމަށާއި އެއީ ޕާޓީގެ އާންމު މެންބަރުންނަށް ލިބިގެންވާ ހައްގެއް ކަމަށެވެ.
"ޕާޓީއަށް ލިބޭ ފައިސާއަށް ވާގޮތް ޕާޓީގެ އާންމު މެންބަރުންނަށް އެބަ އެނގެންޖެހޭ. އެއީކީ ވަކި މީހެއްގެ އެއްޗެއް ނޫނެއްނު. ޕާޓީއަކީ މަތިފަޑީގައި ތިބޭ ޗެއާޕާސަނާއި ޑެޕިއުޓީންނާއި ރައީސާއި ނައިބްރައީސާއި މި މީހުންގެ އެއްޗެއް ނޫނެއްނު ޕާޓީއަކީ. ޕާޓީއަކީ އާންމު މެންބަރުންގެ ޕާޓީއެއް. އެހެންވީމަ ޕާޓީއަށް ވަންނަ ފައިސާއަށްވާ ގޮތް އެނގުމަކީވެސް އެމީހުންގެ ހައްގެއް."
މީކާއިލް އިތުރަށް ވިދާޅުވީ ކުރިން ޕާޓީ ހިންގި ބޭފުޅުންގެ ހިދުމަތްތައް ބަލައިގަންނަ ކަމަށެވެ. ނަމަވެސް، ކަންތައްތަކެއް ގޯސްކޮށް ހިނގާފައިވާކަން ގަބޫލުކޮށް، އެކަންކަން ރަނގަޅުކުރުމަށް ބަދަލުތަކެއް ގެންނަންޖެހޭކަމަށް އޭނާ ވިދާޅުވި އެވެ.
އެމްޑީޕީ އުފެދިގެން އައީ 30 އަހަރުގެ ދިގު ހުދުމުހުތާރު ވެރިކަމަކާ ދެކޮޅަށްކަން ފާހަގަކުރައްވައި، ހުރިހާ މަގާމެއްގައި އެއް ބަޔަކު ތިބޭ ސަގާފަތް ޕާޓީގެ ތެރޭގައި ވެސް އަށަގަތުމަށް ފުރުސަތު ނުދިނުމަކީ މުހިންމު ކަމެއްކަމުގައި މީކާއީލް ފާހަގަކުރެއްވި އެވެ.
މީކާއީލްއާ ދެކޮޅަށް ޗެއާޕާސަން އިންތިހާބުގައި ވާދަކުރައްވަނީ ކުރީގެ ރައީސް މުހައްމަދު ނަޝީދު އެވެ.
ރައްޔިތުންގެ މަޖިލީހަށް ދެވަނަ ދައުރަކަށް 2024 ގައި އިންތިހާބުވި އެމްޑީޕީއަށް ނިސްބަތްވާ ހަތަރު މެންބަރުންގެ ތެރެއިން މީކާއިލްއަކީ އެކަކެވެ. އެންމެ ފަހުން އޮތް މަޖިލިސް އިންތިހާބުގައި ގަލޮޅު ދެކުނު ދާއިރާގެ ގޮނޑި މީކާއިލް ދިފާއުކުރެއްވި އެވެ.
މީކާއިލް އެމްޑީޕިއާ ގުޅުނީ 2012 ވަނަ އަހަރު ކުރީގެ ރައީސް މުހައްމަދު ނަޝީދު ހިންގެވި އެމްޑީޕީގެ ފުރަތަމަ ސަރުކާރު ބަގާވާތަކުން ވައްޓާލުމާ ގުޅިގެންނެވެ. އެ ޕާޓީގެ ޒުވާނުންގެ ހިތްވަރުގެ ރައީސްކަން ވެސް މީކާއިލް ކުރެއްވި އެވެ. އަދި މިވަގުތު ވެސް އޭނާއަކީ އެ ޕާޓީގެ ގައުމީ މަޖިލީހުގެ މެންބަރެކެވެ.
