ސްރީލަންކާގެ ފިނޭންސް މިނިސްޓްރީގެ އެކްސްޓާނަލް ރިސޯސަސް ޑިޕާޓްމަންޓުގެ ކޮމްޕިއުޓަރު ސިސްޓަމަށް ހެކަރުން ވަދެ، ބޭރު ފައިސާގެ މުއާމަލާތަކާ ގުޅޭ ވައްކަމެއް ހިންގާފައިވާ ކަމަށް އެ މިނިސްޓްރީން ބުނެފި އެވެ.
މިނިސްޓްރީން މިކަން ހާމަކޮށްފައި މިވަނީ، ލަންކާގެ ދަރަނި އަދާކުރުމުގެ ތެރެއިން ޓްރެޝަރީ ފަންޑުން 2.5 މިލިއަން އެމެރިކާ ޑޮލަރު ނަހަމަ ގޮތުގައި ބޭނުންކޮށްފައިވާ ކަމަށް އެ ގައުމުގެ އިދިކޮޅު ފަރާތްތަކުން ތުހުމަތުކޮށްފައި ވަނިކޮށް، އެ ތުހުމަތުތައް ކުރިތާ މަދު ގަޑިއިރުތަކެއްގެ ތެރޭގަ އެވެ.
މިއަދު ނެރުނު ބަޔާނެއްގައި ފިނޭންސް މިނިސްޓްރީން ބުނީ، މި ހާދިސާއާ ގުޅިގެން ގާނޫނު ތަންފީޒުކުރާ އިދާރާތަކަށާއި ކަމާބެހޭ މުއައްސަސާތަކަށް މިހާރު މައްސަލަ ހުށަހަޅާފައިވާ ކަމަށެވެ.
މި މައްސަލައަކީ 2026 ވަނަ އަހަރުގެ ޖެނުއަރީ މަހު އަދާކުރަން ޖެހޭ ބޭރު ފައިސާގެ ދަރަންޏެއް ދެއްކުމަކާ ގުޅުންހުރި ކަމެއް ކަމަށާއި، މިކަން ސްރީލަންކާ ކޮމްޕިއުޓާ އިމަޖެންސީ ރެޑިނަސް ޓީމަށާއި ސްރީލަންކާ ފުލުހުންގެ ކޮމްޕިއުޓާ ކްރައިމް އިންވެސްޓިގޭޝަން ޑިވިޝަނަށް އަންގާފައިވާ ކަމަށް އެ މިނިސްޓްރީން ބުންޏެވެ.
މި ހާދިސާގެ ތަހުގީގުތަކަށްފަހު، ސްރީލަންކާގެ ކްރިމިނަލް އިންވެސްޓިގޭޝަން ޑިޕާޓްމަންޓް (ސީއައިޑީ) އަށާއި އެ ގައުމުގެ މަރުކަޒީ ބޭންކުގެ ފައިނޭންޝަލް އިންޓެލިޖެންސް ޔުނިޓަށް ވެސް މިހާރު ވަނީ މައްސަލަ ހުށަހަޅާފަ އެވެ.
މި މައްސަލައާ ގުޅިގެން މިނިސްޓްރީގެ އެތެރޭގެ އިބްތިދާއީ ތަހުގީގެއް ހިންގާފައިވާ ކަމަށާއި، އެކަމުގައި ޒިންމާވާންޖެހޭ ބައެއް އޮފިޝަލުންނާ މެދު ފިޔަވަޅު އަޅައި، އަދަބީ ފިޔަވަޅު އެޅުމުގެ މަރުހަލާ ފަށާފައިވާ ކަމަށް ވެސް އެ ބަޔާނުގައިވެ އެވެ.
މިނިސްޓްރީން އިތުރަށް ބުނީ، މިހާރު ކުރިއަށްދާ ތަހުގީގުތަކަށް ފުރިހަމަ އެއްބާރުލުން ދެމުންގެންދާނެ ކަމަށާއި، ތަހުގީގަށް ހުރަސް ނޭޅޭނެ ފަދަ ވަގުތެއްގައި މިކަމާ ގުޅޭ އިތުރު މައުލޫމާތު ހާމަކުރާނެ ކަމަށެވެ.
