އެމެރިކާގެ ޓޯޕިޑޯ ހަމަލާއަކާ ގުޅިގެން، އެއް މަހަށް ވުރެ ގިނަ ދުވަހު ސްރީލަންކާގައި ތާށިވެފައި ތިބި އީރާނުގެ 200 ފަޅުވެރިން އެނބުރި ގައުމަށް ދާން ފަށައިފި އެވެ.
ސްރީލަންކާގެ ޑެޕިއުޓީ ޑިފެންސް މިނިސްޓަރު އަރުނާ ޖަޔަސޭކަރަ ބުދަ ދުވަހު ކަށަވަރުކޮށްދެއްވި ގޮތުގައި، "އައިރިސް ދޭނާ" އިން ސަލާމަތްކުރި 32 ފަޅުވެރިންނާއި "އައިރިންސް ބުޝެހެރް" ގައި ތިބި 206 ފަޅުވެރިން މިހާރު ވަނީ އެ ގައުމުން ފުރާފަ އެވެ.
އީރާނުގެ ހަނގުރާމަމަތީ މަނަވަރު "އައިރިސް ދޭނާ" އަޑިއަށް ގޮސްފައި ވަނީ މާޗް މަހުގެ 4 ވަނަ ދުވަހު އެވެ. ސްރީލަންކާގެ ދެކުނު އައްސޭރިފަށާ ގާތްގަނޑަކަށް 40 ކިލޯމީޓަރު (25 މޭލު) ބޭރުން އެމެރިކާގެ ސަބްމެރީނަކުން ދިން ޓޯޕިޑޯ ހަމަލާއެއްގައި އެ މަނަވަރު އަޑިއަށް ދިޔަ ހާދިސާގައި އީރާނުގެ 104 ފަޅުވެރިން މަރުވި އެވެ.
މާޗް މަހުގެ 5 ވަނަ ދުވަހު، އީރާނުގެ އަސްކަރީ އުޅަނދެއް ކަމަށްވާ "އައިރިންސް ބުޝެހެރް" ގެ އިންޖީނަކަށް ދިމާވި މައްސަލައަކާ ގުޅިގެން ލަންކާގެ ބަނދަރަކަށް ވަނުމަށް އެދުމުން، އެ ގައުމުގެ ސަރުކާރުން ވަނީ އެ އުޅަނދު އެ ގައުމުގެ ބެލުމުގެ ދަށަށް ގެންގޮސްފަ އެވެ.
ރޮއިޓާސް ނިއުސް އެޖެންސީއަށް މައުލޫމާތު ދެއްވަމުން ޖަޔަސޭކަރަ ވިދާޅުވީ، ދެ މަނަވަރުގެ ފަޅުވެރިން ވެސް އަންގާރަ ދުވަހުގެ ރޭ ފްލައިޓްތަކުގައި ގައުމުން ފުރާފައިވާ ކަމަށެވެ.
ލަންކާގައި ތާށިވި ފަޅުވެރިންނަށް އެ ގައުމުގެ ސަރުކާރުން 30 ދުވަހުގެ އެންޓްރީ ވިސާ ދީފައިވާއިރު، އެ މީހުން ބައިތިއްބާފައި ތިބީ އެ ގައުމުގެ ނޭވީ އަދި އެއާފޯސް ކޭމްޕްތަކުގަ އެވެ.
"އައިރިސް ދޭނާ" އަށް ހަމަލާދިން އިރު، އެ މަނަވަރު ދަތުރުކުރަމުން ދިޔައީ އިންޑިއާއިން އިންތިޒާމުކޮށްގެން ބޭއްވި އަސްކަރީ ތަމްރީނުތަކެއް ނިންމާލުމަށް ފަހު އެނބުރި ގައުމަށް ދިއުމަށެވެ.
މި ހާދިސާއަށް ފަހު އެމެރިކާގެ ޑިފެންސް ޑިޕާޓްމަންޓުން އާންމުކުރި ވީޑިއޯއިން ފެންނަ ގޮތުގައި، މަނަވަރުގައި ހަމަލާ ޖެހުމާއެކު އޭގެ ފަހަތުކޮޅު މައްޗަށް އަރައި، ބާރުގަދަ ގޮވުމެއް ގޮވަ އެވެ.
މި ހަމަލާގައި މަރުވި އީރާނުގެ 84 ފަޅުވެރިއެއްގެ ހަށިގަނޑު ފެނިފައިވާއިރު، އެ ހަށިގަނޑުތައް ވަނީ އީރާނުން ހަމަޖެއްސި ޗާޓަރު ފްލައިޓެއްގައި އެ ގައުމަށް ގެންގޮސްފަ އެވެ.
ބައިނަލްއަގުވާމީ ކަނޑުގެ ސަރަހައްދުގައި މި މަނަވަރު އަޑިއަށް ދިޔައީ، އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމަ ފެށުނުތާ މަދު ދުވަސްކޮޅެއްގެ ތެރޭގަ އެވެ. މިއީ މި ހަމަނުޖެހުން ބޮޑުތަނުން ފުޅާވެގެން ދިޔަ ކަމެއްގެ ގޮތުގައި ބެލެވެ އެވެ.
މި ހަމަލާއަށްފަހު އީރާނުން ވަނީ މެދުއިރުމަތީގެ އެކި ސަރަހައްދުތަކަށް ބަދަލުހިފުމުގެ ހަމަލާތައް ދީފަ އެވެ. އޭގެ ތެރޭގައި އެމެރިކާއާ ގުޅިފައިވާ ގަލްފުގެ ގައުމުތަކަށް ދިން ހަމަލާތައް ހިމެނެ އެވެ.
ސްރީލަންކާގެ އިރުއުތުރުގެ ބަނދަރެއް ކަމަށްވާ ޓްރިންކޯމަލީގައި ބާއްވާފައިވާ "އައިރިންސް ބުޝެހެރް" އޮޕަރޭޓް ކުރުމަށްޓަކައި އީރާނުގެ 15 ފަޅުވެރިއަކު އަދިވެސް އެ ގައުމުގައި މަޑުކުރާނެ އެވެ.
ގިނަ ގަޑިއިރުތަކެއްގެ މަޝްވަރާއަށް ފަހު، މާޗް މަހުގެ 5 ވަނަ ދުވަހު އީރާނުގެ މަނަވަރު ބަނދަރުކުރުމުގެ ހުއްދަ ލަންކާއިން ދިނީ، އިންސާނިއްޔަތުކަން އިސްކުރުމުގައި އެ ގައުމުން ފަސްނުޖެހޭނެ ކަމަށް ރައީސް ވިދާޅުވުމާ ގުޅިގެންނެވެ.
"އަޅުގަނޑުމެންގެ ސިޔާސަތަކީ ވަކި ފަރާތަކަށް ނުޖެހި ތިބުމާއެކު، އިންސާނީ ކަރާމާތް ދެމެހެއްޓުން،" އެ ދުވަސްވަރު ނެރުއްވި ބަޔާނެއްގައި ރައީސް އަނޫރާ ކުމާރާ ދިސާނަޔަކަ ވިދާޅުވި އެވެ.
އޭނާ އިތުރަށް ވިދާޅުވީ، ސްރީލަންކާއިން މިކަމުގައި އަމަލުކުރީ ބައިނަލްއަގުވާމީ މުއާހަދާތަކަށް އިހުތިރާމްކޮށް، ގައުމުގެ އަބުރާއި ކަރާމާތް ހިމާޔަތްކޮށް، އިންސާނީ ފުރާނަ ސަލާމަތްކުރުމަށް އިސްކަންދީގެން ކަމަށެވެ.
ސްރީލަންކާއަކީ އީރާނާއި އެމެރިކާއާ ދެ ގައުމާއެކު ވެސް އިގްތިސާދީ އަދި ހާރިޖީ ގޮތުން ވަރުގަދަ ގުޅުމެއް ބާއްވަމުން އަންނަ ގައުމެކެވެ.
