ފުރަމާނަ ދަތުރެއްގައި އަންނަ މެއި މަހު މުހައްމަދު މުއިއްޒު ސްރީލަންކާއަށް ވަޑައިގަންނަވާ ގޮތަށް ހަމަޖެހިފައިވާ ކަމަށް ސްރީލަންކާގެ ނޫސްތަކުން ރިޕޯޓުކޮށްފި އެވެ.
ލަންކާގެ ނޫސްތަކުން ބުނީ މުއިއްޒުގެ ދަތުރާ ގުޅޭގޮތުން ލަންކާގެ ފިޝަރީޒް މިނިސްޓަރު ރަމަލިންގަމް ޗަންޑްރެސޭކަރު އާއި ރާއްޖެއިން ލަންކާއަށް ކަނޑައަޅުއްވާފައި ހުންނަވާ ސަފީރު މަސްއޫދު އިމާދު މަޝްވަރާ ކުރައްވާފައިވާ ކަމަށެވެ.
ސްރީ ލަންކާއަށް މުއިއްޒު ކުރައްވަން ހަމަޖެހިފައިވާ ދަތުރާ ގުޅޭ ގޮތުން ރައީސް އޮފީހުން ވަކި އެއްޗެއް އަދި ނުބުނެ އެވެ. ރައީސް އޮފީހުން އާންމުކޮށް ބުނަނީ، މުއިއްޒުގެ ދަތުރުތަކާ ގުޅޭ މައުލޫމާތު އެކަމަށް އޮންނަ އުސޫލެއްގެ ދަށުން ހާމަ ކުރާނެ ކަމަށެވެ.
މިދިޔަ އަހަރުގެ ޑިސެމްބަރު މަހު ތެރޭގައި ވެސް މުއިއްޒު ލަންކާއަށް ވަޑައިގަންނަވާ ގޮތަށް ހަމަޖެހިފައިވާ ކަމަށް ލަންކާގެ ނޫސްތަކުން ކުރިން ރިޕޯޓުކުރި އެވެ. ނަމަވެސް އެ ދަތުރުގެ ތާރީހު ފަހުން ބަދަލު ކުރީ އެވެ.
މުއިއްޒުގެ ދަތުރުގައި، ވިޔަފާރި އާއި އިގްތިސާދާއި ފަތުރުވެރިކަމާއި މައުލޫމާތު ބަދަލު ކުރުމާ ގުޅޭ ހަ އެއްބަސްވުމެއްގައި ސޮއި ކުރައްވާނެ ކަމަށް ވެސް އޭރު ލަންކާގެ ނޫސްތަކުން ބުންޏެވެ.
ރާއްޖޭގެ މިނިވަން ދުވަހުގެ ހަފުލާއަށް މިދިޔަ ޖުލައި މަހު ލަންކާގެ ރައީސް އަނޫރާ ކުމާރަ ޑިސަނަޔަކެ ރާއްޖެ ވަޑައިގެންނެވި އެވެ. އެ ދަތުރުގައި ދެ ގައުމުން ވަނީ ދެ އެއްބަސްވުމެއްގައި ސޮއިކޮށްފަ އެވެ.
ރައީސް ޑިސަނަޔަކެގެ އެ ދަތުރުގައި އެމަނިކުފާނު ވަނީ ރާއްޖޭގެ ވިޔަފާރިވެރިން ލަންކާގައި އިންވެސްޓު ކުރުމަށް އެދިވަޑައިގެންފަ އެވެ. އިންވެސްޓަރުންނަށް ފަހި މަންޒަލިކަށް ލަންކާ ބަދަލު ކުރަން މަސައްކަތް ކުރައްވަމުންދާ ކަމަށް ވެސް އެމަނިކުފާނު ވިދާޅުވި އެވެ.
އޭޕްރީލް، 2019، ގައި ލަންކާގައި ދިން ޓެރަރިސްޓު ހަމަލާއަށްފަހު އެ ގައުމުން ވަނީ "ކަންޓްރީ އޮފް ސެކިއުރިޓީ ކޮންސާން" ގެ ދަރަޖަ ރާއްޖެއަށް ދީފަ އެވެ. އޭގެ ސަބަބުން އެ ގައުމުގައި ދިރިއުޅޭ އަދި ޒިޔާރަތް ކުރާ ދިވެހިންނަށް ދަތިތަކާ ކުރިމަތިވަމުންދާ ކަމަށް ރިޕޯޓުތަކުން ބުނެ އެވެ.
މީގެ ކުރިން ލަންކާއަކީ އެންމެ ގިނަ ދިވެހިން ވަޒަންވެރިވެގެން އުޅެމުން އައި އެއް ގައުމެވެ. އީސްޓާ ބޮމުގެ ހަމަލާގެ ކުރިން ގާތްގަނޑަކަށް 15،000 ދިވެހިން ލަންކާގައި ދިރިއުޅުނު ކަމަށް ބެލެވެ އެވެ. އެކަމަކު ރިޕޯޓުތައް ބުނާ ގޮތުން އެ ނަންބަރު މިހާރު ވަނީ 1،500 އަށް ވެއްޓިފަ އެވެ.
