އަދަދު ނޫހުން ގެނެސްދިން "އައިޝާ" ޑޮކިއުމެންޓްރީއާ ގުޅިގެން އެ ނޫހުގެ މައްޗަށް ޖިނާއީ ތަހުގީގެއް ފުލުހުން ހިންގަން ފެށީ ޕްރޮސެކިއުޓާ ޖެނެރަލް (ޕީޖީ) އިން އަންގައިގެން ކަމަށް ރައީސް އޮފީހުގެ ތަރުޖަމާން މުހައްމަދު ހުސައިން ޝަރީފް (މުންދު) މިއަދު ވިދާޅުވެއްޖެ އެވެ.
ނޫސްވެރިންނާ ބައްދަލުކުރައްވާ މުންދު ވިދާޅުވީ އައިޝާ ޑޮކިއުމަންޓްރީގައި މުހައްމަދު މުއިއްޒުއަށް އަމާޒުވެފައިވާ ތުހުމަަތުތަކުގެ ވާހަކަ ދައްކާ ހުރިހާ އެންމެންނަށް ދައުވާކުރަން އެމަނިކުފާނު އެދިވަޑައިގަތުމުގެ ކުރިން އަދަދު ނޫހުގެ މައްޗަށް ތަހުގީގު ހިންގަން ޕީޖީން އިސްނަގައިގެން ފުލުހުންނަށް ލިޔުމުން އަންގާފައިވާ ކަމަށެވެ.
"ބައްލަވާ މި ސްޕެސިފިކް ކޭސްގައި އެދިވަޑައިގަންނަވާކަށް ނުޖެހުނޭ. ކީއްވެ. މިދެންނެވިހެން އޮތީ ޕްރޮސެކިއުޓާ ޖެނެރަލް އިން އިސްނަންގަވައިގެން ފުލުހުންނަށް ލިޔުމުން ފޮނުއްވާފައި މަތިކުރައްވާފައި އޭރުވެސް ތަހުގީގުކޮށްދެއްވާށޭ،" މުންދު ވިދާޅުވި އެވެ.
މުންދު ވިދާޅުވީ ޕީޖީ އޮފީހުގެ އިތުރުން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިން ވެސް އަދަދުގެ މައްސަލަ ބަލަމުންދާތީ އެކަން އެ ނޫހަށް އަންގާފައިވާނެ ކަމަށެވެ.
ނަމަވެސް އަދަދު ނޫހަށް ފުލުހުން ވަދެ ބަލައިފާސްކުރީ ޑޮކިއުމަންޓްރީއާ ގުޅޭ ވާހަކަތައް ދައްކާ އެންމެންނަށް ދައުވާކުރަން ކަމާބެހޭ ފަރާތްތަކަށް މުއިއްޒު ގޮވާލެއްވިތާ 12 ގަޑިއިރުވެސް ނުވަނީސްކަން ފާހަގަކޮށްލެވެ އެވެ.
މިދިޔަ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި މުއިއްޒު ވަނީ އެމަނިކުފާނުގެ މައްޗަށް ޑޮކިއުމަންޓްރީގައި އަމާޒުވި ތުހުމަތުތައް ދޮގުކުރައްވާފަ އެވެ.
މި މައްސަލައިގައި ފުލުހުން އަދަދު އޮފީސް ރެއިޑްކޮށް ގާތްގަނޑަކަށް ހަތަރު ގަޑިއިރު ބަލައިފާސްކުރުމުގައި ހޭދަކުރިއިރު، އެ އޮޕަރޭޝަންގައި ގިނަ އަދަދެއްގެ އިލެކްޓްރޯނިކް ސާމާނު ފުލުހުންގެ ބެލުމުގެ ދަށަށް ގެންދިޔަ އެވެ.
މީގެއިތުރުން މައްސަލައިގައި އަދަދު ނޫހުގެ ސީއީއޯ ހުސައިން ފިޔާޒް މޫސާ އާއި އަދަދު ނޫހުގެ އެޑިޓަރު ހަސަން މުހައްމަދު ފުލުހަށް ހާޒިރުކޮށް ސުވާލުކޮށްފައިވެ އެވެ.
ފުލުހުން ފިޔާޒް އާއި ހަސަންގެ މައްޗަށް ކުރަނީ ޖުމްލަ ފަސް ޖިނާއީ ތުހުމަތެއް:
- މީހަކު ކުރާ އަމަލަކަށް އެހެން މީހާކު ޒިންމާދާރުކުރުވުން، ބައިވެރިވުމުގެ ޒިންމާގެ ކުށް - ގާނޫނުލްއުގޫބާތުގެ 30 ވަނަ މާއްދާ
- މީހަކު ކުރާ އަމަލަކަށް އެހެން މީހާކު ޒިންމާދާރުކުރުވުން، ބައިވެރިވުމުގެ ޒިންމާގެ ކުށް - ގާނޫނުލްއުގޫބާތުގެ 30 ވަނަ މާއްދާގެ ހ. ގެ ދެވަނަ ނަންބަރުގެ ދަށުން
- ގަޛްފުގެ ކުށް - ގާނޫނުލްއުގޫބާތުގެ 612 ވަނަ މާއްދާ
- ކުށެއް ކުރުމަށް އެދުން - ގާނޫނުލްއުގޫބާތުގެ 81 ވަނަ މާއްދާ
- ކުށެއް ކުރުމަށް ރޭވުން - ގާނޫނުލްއުގޫބާތުގެ 82 ވަނަ މާއްދާ
މީގެއިތުރުން މި މައްސަލައާ ގުޅިގެން ފިޔާޒް އާއި ހަސަންގެ އިތުރުން ރައީސް އޮފީހުގައި ކުރިން މަސައްކަތްކުރި މުވައްޒަފެއްގެ ޕާސްޕޯޓުވެސް މައްސަލައާ ގުޅިގެން ވަނީ ހިފަހައްޓާފަ އެވެ.
