ވައިޓް ހައުސް ކޮރެސްޕޮންޑެންޓްސް ޑިނާގެ ތެރޭގައި ހޮނިހިރު ދުވަހު ހިނގި ބަޑިޖެހުމުގެ ހާދިސާއާ ގުޅިގެން ހައްޔަރުކުރި މީހާއަކީ ލޮސް އެންޖެލެސް ސަރަހައްދަށް ނިސްބަތްވާ ކޯލް ތޯމަސް އެލަން ކަމަށް ތަންފީޒީ އިދާރާތަކުގެ އޮފިޝަލަކު ކަށަވަރުކޮށްދީފި އެވެ.
ސޯޝަލް މީޑިއާ ސައިޓްތަކުން އެނގޭ ގޮތުގައި އޭނާއަކީ ކެލްޓެކް އިން ގްރެޖުއޭޓްވެފައިވާ، ޕާޓް-ޓައިމް ޓީޗަރެއް އަދި ގޭމް ޑިވެލޮޕަރެއްގެ ގޮތުގައި މަސައްކަތް ކުރާ މީހެކެވެ.
އޮފިޝަލް ވިދާޅުވި ގޮތުގައި އުމުރުން ގާތްގަނޑަކަށް 31 އަހަރުގެ އެލަންއަކީ ކެލިފޯނިއާގެ ޓޮރެންސްގެ ރަށްވެއްސެކެވެ. އެއީ ލޮސް އެންޖެލެސްއާ އިންވެގެން، ސަންޓާ މޮނިކާ ބޭ ކައިރީގައި އޮންނަ ސައުތު ބޭ ސަރަހައްދުގެ އައްސޭރިފަށުގެ ރަށެކެވެ.
ޑިސްޓްރިކްޓް އޮފް ކޮލަމްބިއާގެ ފުލުހުންގެ މުއައްސަސާގެ ވެރިޔާ ވިދާޅުވީ، ތަހުގީގު ކުރާ ފަރާތްތަކަށް ގަބޫލުކުރެވޭ ގޮތުގައި އެ މީހާއަކީ ފަރިއްކޮޅު ބޭއްވި ވޮޝިންޓަން ހިލްޓަން ހޮޓަލުގެ ކޮޓަރިއެއް ހިފައިގެން ހުރި މީހެކެވެ. ނަމަވެސް، މި ހަމަލާ ދޭން މެދުވެރިވި ސަބަބެއް އަދި މިހާތަނަށް ދެނެގަނެވިފައެއް ނުވެ އެވެ.
ފޭސްބުކްގައި ކޯލްއާ ގުޅުން ހުރި ކަމަށް ބެލެވޭ ޕޯސްޓްތަކުން އެނގޭ ގޮތުގައި، ކޮލެޖްތަކަށް ވަންނަން ތައްޔާރުވާ ދަރިވަރުންނަށް ޓިއުޝަން ދޭ ގައުމީ ފެންވަރުގެ އަމިއްލަ އިދާރާއެއް ކަމަށްވާ "ސީ2 އެޑިއުކޭޝަން" ގެ ޓޮރެންސް އޮފީހުން 2024 ވަނަ އަހަރުގެ ޑިސެމްބަރު މަހު އޭނާއަށް "މަހުގެ އެންމެ މޮޅު ޓީޗަރު" ގެ މަގާމު ދީފައިވެ އެވެ.
ހައްޔަރުކުރި މީހާގެ ނަމުގައިވާ ލިންކްޑްއިން ޕްރޮފައިލެއްގައި އޭނާ ސިފަކޮށްފައިވަނީ "ޑިގްރީގެ ގޮތުން މެކޭނިކަލް އިންޖިނިއަރެއް އަދި ކޮމްޕިއުޓަރު ސައިންޓިސްޓެއް، ތަޖުރިބާގެ ގޮތުން އަމިއްލަ ގޭމް ޑިވެލޮޕަރެއް، އަދި އުފަންވުމުން ފެށިގެން ޓީޗަރެއް" ގެ ގޮތުގަ އެވެ.
އެ ޕްރޮފައިލްގައިވާ ގޮތުން އޭނާ ވަނީ 2017 ވަނަ އަހަރު ކެލިފޯނިއާ އިންސްޓިޓިއުޓް އޮފް ޓެކްނޮލޮޖީ (ކެލްޓެކް) އިން މެކޭނިކަލް އިންޖިނިއަރިންގެ ދާއިރާއިން ބެޗްލާސް ޑިގްރީ ހާސިލްކޮށްފަ އެވެ. އަދި 2025 ވަނަ އަހަރު ކެލިފޯނިއާ ސްޓޭޓް ޔުނިވާސިޓީ އެޓް ޑޮމިންގޭޒް ހިލްސް އިން ކޮމްޕިއުޓަރު ސައިންސްގެ ދާއިރާއިން މާސްޓާސް ޑިގްރީ ހާސިލްކޮށްފައިވެ އެވެ. ކެލްޓެކް އިން ނެރުނު ބަޔާނެއްގައި ބުނެފައިވަނީ އެ ނަމުގައިވާ މީހަކު 2017 ވަނަ އަހަރު އެ ތަނުން ގްރެޖުއޭޓްވެފައިވާ ކަމަށެވެ.
މަސައްކަތުގެ ތަޖުރިބާގެ ދަށުން އެ ޕޯސްޓުގައިވާ ގޮތުން، އޭނާ ފާއިތުވި އަހަރުތަކުގައި މަސައްކަތް ކޮށްފައިވަނީ "ސީ2 އެޑިއުކޭޝަން" ގެ ޕާޓް-ޓައިމް ޓީޗަރެއްގެ ގޮތުގަ އާއި އަމިއްލަ މަސައްކަތެއްގެ ގޮތުގައި ގޭމް ޑިވެލޮޕް ކުރުމުގަ އެވެ. އޭގެ ކުރިން އޭނާ ވަނީ ސައުތު ޕަސަޑީނާގެ "އައިޖޭކޭ ކޮންޓްރޯލްސް" ކިޔާ ކުންފުންޏެއްގައި އެއް އަހަރު ދުވަހު މެކޭނިކަލް އިންޖިނިއަރެއްގެ ގޮތުގައި މަސައްކަތް ކޮށްފަ އެވެ. އަދި އޭގެ ކުރިން ކެލްޓެކްގެ ޓީޗިން އެސިސްޓެންޓެއްގެ ގޮތުގައި ވެސް އޭނާ މަސައްކަތް ކުރި އެވެ.
އެ ޕްރޮފައިލްގައި 2016 ވަނަ އަހަރު ކެލްޓެކްގައި އޭނާގެ ޓީމުން ކާމިޔާބުކުރި ރޮބޮޓިކްސް މުބާރާތަކާ ގުޅޭ ގޮތުން ދުވަހު ނޫހެއްގައި ޝާއިއުކޮށްފައިވާ ލިޔުމެއް ވެސް ހިމަނާފައިވެ އެވެ.
ސީކްރެޓް ސާވިސް އިން ބުނި ގޮތުގައި، ޝޮޓްގަންއެއް ހިފައިގެން ހުރި އެ މީހާ ހައްޔަރުކުރީ ވޮޝިންޓަން ހިލްޓަން ހޮޓަލުގެ ތެރޭގައި ސީކްރެޓް ސާވިސް އެޖެންޓަކަށް އަމާޒުކޮށް ބަޑިޖެހުމާ ގުޅިގެންނެވެ. މި ހާދިސާ ހިނގާފައިވަނީ ރައީސް ޑޮނަލްޑް ޓްރަމްޕާއި، އެމަނިކުފާނުގެ އަނބިކަނބަލުން މެލަނިއާ ޓްރަމްޕާއި، ނައިބު ރައީސް ޖޭޑީ ވެންސް އަދި ކެބިނެޓްގެ ބައެއް ވަޒީރުން ބައިވެރިވެވަޑައިގެންނެވި ފަރިއްކޮޅު ކުރިއަށްދިޔަ ހޯލް ބޭރުގަ އެވެ.
