އެމެރިކާގެ ރައީސް ޑޮނަލްޑް ޓްރަމްޕު ބައިވެރިވެވަޑައިގެންނެވި ވައިޓް ހައުސް ކޮރެސްޕޮންޑެންޓްސް ޑިނާގައި މީހަކު ބަޑި ޖަހައިފި އެވެ.
އެ މީހާ ބަޑި ޖެހީ ރޭގަނޑުގެ ކެއުން ކުރިއަށް ދަނިކޮށް އިވެންޓު ކުރިއަށްދިޔަ ހޮޓަލުގެ ކޮރިޑޯއެއްގަ އެވެ. އޭނާ ވަނީ މިހާރު ހައްޔަރުކޮށްފަ އެވެ.
އެ މައްސަލައިގައި ހައްޔަރު ކުރީ ކެލިފޯނިއާއަށް ނިސްބަތްވާ ކޯލް ތޯމަސް އެލަން، 31، އެވެ.
ބަޑީގެ އަޑު އިވެންޓު ބޭއްވި ތަނަށް ވެސް އިވުނެވެ. އެކަން ހިނގުމާއެކު ރައީސް ޓްރަމްޕް އަދި އޭނާގެ ނައިބު ޖޭޑީ ވޭންސް ވަނީ އެތަނުން ނެރެފަ އެވެ.
އެ ހާދިސާގައި ސީކްރެޓް ސާވިސްގެ އެޖެންޓެއްގެ ހަށިގަނޑަށް ވަޒަނެއް އެރި އެވެ. އޭނާ ސަލާމަތްވީ ބުލެޓް ޕްރޫފް ވެސްޓެއް ލައިގެން ހުރުމުންނެވެ.
ހާދިސާއަށްފަހު ވާހަކަ ދައްކަވަމުން ޓްރަމްޕު ވިދާޅުވީ ބަޑިޖެހި މީހާ ހަރަކާތްތެރިވީ އެކަނި ކަމަށެވެ. އަދި އޭނާގެ މަގްސަދު މިހާތަނަށް ސާފުނުވާ ކަމަށް ވެސް ރައީސް ވިދާޅުވި އެވެ.
ވައިޓް ހައުސް ކޮރެސްޕޮންޑެންޓްސް ޑިނާއަކީ ޓްރަމްޕާއި އޭނާގެ އޮފީހުން ބާއްވާ ނޫސްވެރިންގެ ބައްދަލުވުންތައް ކަވަރު ކުރަންދާ ނޫސްވެރިންގެ ޖަމިއްޔާއިން ކޮންމެ އަހަރަކު ވެސް ބާއްވާ ރޭގަނޑުގެ ކެއުމެކެވެ.
