ޔުނައިޓެޑް އެރަބް އެމިރޭޓްސް (ޔޫއޭއީ) އިން ތެޔޮ އުފައްދާ ގައުމުތަކުގެ ޖަމިއްޔާ ކަމަށްވާ އޯޕެކް އަދި އޯޕެކް ޕްލަސް އިން ވަކިވެއްޖެކަން އިއުލާނުކޮށްފިއެވެ. މިއީ އީރާނުގެ ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ބޮޑު ލޮޅުމެއް އަރައި، އިގުތިސާދީ ނުތަނަވަސްކަން އުފެދިފައިވާ ދަނޑިވަޅެއްގައި އެ ޖަމިއްޔާއަށް ލިބުނު ވަރަށް ބޮޑު ދެރައެކެވެ.
ޔޫއޭއީ އިން މިފަދަ ނިންމުމެއް ނިންމާފައިވަނީ، ހަނގުރާމައިގެ ތެރޭގައި އިރާނުން ދެމުންދިޔަ ހަމަލާތަކުން އެ ގައުމު ސަލާމަތްކުރުމަށް އަރަބި އެހެން ގައުމުތަކުން އެކަށީގެންވާ މަސައްކަތެއް ކޮށްފައިނުވާ ކަމަށް ބުނެ ފާޑުކިޔުމަށްފަހުއެވެ.
މިކަމާ ގުޅޭގޮތުން ޔޫއޭއީގެ ރައީސްގެ ޑިޕްލޮމެޓިކް އެޑްވައިޒަރު އަންވަރު ގަރްގާޝް ހޯމަ ދުވަހު ބޭއްވި ގަލްފް އިންފްލުއެންސާސް ފޯރަމްގައި ވާހަކަދައްކަވަމުން ވަނީ އަރަބި އަދި ގަލްފުގެ ގައުމުތަކުން އިރާނުގެ ހަމަލާތަކާ މެދު ގެންގުޅުނު ސިޔާސަތަށް ވަރަށް ބޮޑަށް ފާޑުވިދާޅުވެފައެވެ.
ގަރްގާޝް ވިދާޅުވި ގޮތުގައި ގަލްފް ކޯޕަރޭޝަން ކައުންސިލް (ޖީސީސީ)ގެ ގައުމުތަކުން އެއް ގައުމު އަނެއް ގައުމަށް ލޮޖިސްޓިކް ގޮތުން އެހީތެރިކަން ފޯރުކޮށްދިން ނަމަވެސް، ސިޔާސީ އަދި އަސްކަރީ ގޮތުން އެ ގައުމުތަކުގެ މަގާމު ތާރީހީ ގޮތުން ފެނިފައިވަނީ ވަރަށް ބަލިކަށިކޮށެވެ. އަދި އަރަބި ލީގުގެ ފަރާތުން މިފަދަ ބަލިކަށި އަމަލުތަކެއް ފެނުމަކީ ހައިރާންވާންޖެހޭ ކަމެއް ނޫން ކަމަށާއި، ނަމަވެސް ޖީސީސީ ފަދަ ޖަމާއަތަކުން އެފަދަ ގޮތަކަށް އަމަލުކުރުމުން ވަރަށް ބޮޑަށް ހައިރާންވެވަޑައިގެންނެވި ކަމަށް އޭނާ ވިދާޅުވިއެވެ.
ޔޫއޭއީ އަކީ އޯޕެކްގައި ހިމެނޭ އެންމެ ނުފޫޒުގަދަ އަދި އެންމެ ގިނައިން ތެޔޮ އުފައްދާ އެއް ގައުމަށް ވާއިރު، އެ ގައުމުން މި ނިންމި ނިންމުމުގެ ސަބަބުން ބައިނަލްއަގުވާމީ ތެލުގެ ބާޒާރަށް ބޮޑެތި ބަދަލުތަކެއް އަންނާނެ ކަމަށް މާހިރުން ލަފާކުރެއެވެ. މިއީ ފަހުގެ ތާރީހެއްގައި އޯޕެކްގެ އެއްބައިވަންތަކަމަށް ކުރިމަތިވި އެންމެ ބޮޑު ގޮންޖެހުމެވެ.
އޯޕެކްގައި ހިމެނޭ ގަލްފުގެ ގައުމުތަކުން މިހާރުވެސް ދަނީ ހޮރްމޫޒް ކަނޑުއޮޅިން ތެޔޮ ބޭރުކުރުމުގައި ބޮޑެތި ގޮންޖެހުންތަކާ ކުރިމަތިލަމުންނެވެ. އިރާނާއި އޮމާންއާ ދެމެދު އޮންނަ މި ހަނި ކަނޑުއޮޅިއަކީ ދުނިޔޭގައި އުފައްދާ ސާފުނުކުރާ ތެލާއި ގުދުރަތީ ގޭހުގެ ފަސްބައިކުޅަ އެއްބައި ދަތުރުކުރާ މައި މަގަށް ވާއިރު، އިރާނުން ދެމުންދާ އިންޒާރުތަކާއި އުޅަނދުފަހަރަށް ދޭ ހަމަލާތަކުގެ ސަބަބުން އެ ސަރަހައްދުގެ ސަލާމަތީ މަސްރަހު ވަނީ ވަރަށް ބޮޑަށް ގޯސްވެފައެވެ.
މި މައްސަލައިގައި އެމެރިކާގެ ރައީސް ޑޮނަލްޑް ޓްރަމްޕް ވަނީ އޯޕެކްގެ ގައުމުތަކުން ތެލުގެ އަގު އުފުލައިގެން މުޅި ދުނިޔެ "ފޭރެމުންދާ" ކަމަށް ތުހުމަތު ކުރައްވާފައެވެ. އަދި އެމެރިކާއިން ގަލްފުގެ ގައުމުތަކަށް ދޭ އަސްކަރީ އެހީތެރިކަމާއި ތެލުގެ އަގާ ގުޅުވައި ވާހަކަދައްކަވަމުން ޓްރަމްޕް ވިދާޅުވީ، އެމެރިކާއިން އޯޕެކްގެ މެންބަރު ގައުމުތައް ދިފާއުކޮށްދެމުންދާއިރު، އެ ގައުމުތަކުން ތެލުގެ އަގު ބޮޑުކޮށްގެން އޭގެ ނާޖާއިޒު ފައިދާ ނަގަމުންދާ ކަމަށެވެ.
