ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މެނޭޖިން ޑިރެކްޓަރަކަށް އެ ކުންފުނީގެ ހިންގުމާ ވަގުތީ ގޮތުން ހަވާލުވެ ހުންނެވި ޑރ. އަލީ އަޒްވަރު އައްޔަނުކޮށްފި އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނީ ސްޓެލްކޯގެ އެމްޑީގެ މަގާމަށް ސ. ފޭދޫ، ނެސްޕްރޯވިލާ، އަލީ އަޒްވަރު އައްޔަންކުރީ މިއަދުގެ ވަގުތެއްގައި ކަމަށެވެ.
ސްޓެލްކޯ އާ 1997 ގައި ގުޅިވަޑައިގެންނެވި އަލީ އަޒްވަރު ވަނީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އަދި އެގްޒެކެޓިވް ޑިރެކްޓަރުގެ މަގާމުވެސް ފުރުއްވާފަ އެވެ. އޭގެއިތުރުން އޭނާ ވަނީ ސްޓެލްކޯގެ އިސް އެހެން މަގާމުތައްވެސް ފުރުއްވާފަ އެވެ.
ސްޓެލްކޯގެ އެމްޑީގެ މަގާމު ހުސްވީ އެ މަގާމުގައި ހުންނެވި އަހްމަދު ޝަމާހު ރަޝީދު މިދިޔަ ޖެނުއަރީ މަހު ވަކިކުރުމުންނެވެ. ޝަމާހު އެ މަގާމަށް އައްޔަންކުރީ އޭގެ ކުރިން އެ މަގާމުގައި ހުންނެވި ހުސައިން ފަހުމީ، ސެޕްޓެމްބަރު 7، 2025، ގައި ވަކިކުރުމުންނެވެ.
ޝަމާހު މަގާމުން ވަކިކުރިފަހުން ކޮރަޕްޝަންގެ މައްސަލަތަކެއް އެންޓި ކޮރަޕްޝަން ކޮމިޝަން (އޭސީސީ) އަށް ވެއްދި އެވެ. ނަމަވެސް މިހާތަނަށް ވެސް އެ މައްސަލަތަކާ ގުޅިގެން އެއްވެސް މައުލޫމާތެއް އޭސީސީން ހާމަކޮށްފައެއް ނުވެ އެވެ.
މި ސަރުކާރުގައި ސްޓެލްކޯގެ އެމްޑީއަކަށް އެންމެ ފުރަތަމަ އައްޔަންކުރީ ފަހުމީ އެވެ. އޭނާ އޭރު މަގާމުން ވަކިކުރީ މާލެ އާއި ހުޅުމާލެއިން ކަރަންޓު ކެނޑޭ މައްސަލަ އާއި ކަރަންޓު ބިލު އަގުބޮޑުވާ މައްސަލައިގައި ނުރުހުން ސަރުކާރަށް އަމާޒުވެފައި އޮތް ދަނޑިވަޅެއްގަ އެވެ.
މިހާރުވެސް މާލޭގެ އެކި ސަރަހައްދުތަކުން ކަރަންޓު ކެނޑޭ މައްސަލަ އާއި ކަރަންޓު ބިލު ބޮޑުވާ މައްސަލައިގައި އާންމުންގެ ޝަކުވާ ބޮޑެވެ.
