ރޯދަ ހަދިޔާއެއްގެ ގޮތުގައި ނިމިދިޔަ ރޯދަ މަހު ޑޮމެސްޓިކް ރޭޓުން ބިލުކުރާ ކަރަންޓު ބިލުން ޑިސްކައުންޓް ދިނުމަށް ޖުމްލަ ހިނގި ހަރަދު ހާމަކުރަން ސްޓެލްކޯއިން ދެކޮޅު ހަދައިފި އެވެ.
މިކަމާ ގުޅިގެން އަދަދު އިން ސްޓެލްކޯއަށް ތަކުރާރުކޮށް ގުޅައި މެސެޖު ކުރުމުން ވެސް ކަރަންޓު ބިލުން ޑިސްކައުންޓް ދިނުމަށް ހަރަދުވާ ވަރުގެ އެއްވެސް މައުލޫމާތެއް ނުދެ އެވެ.
ކަރަންޓު ބިލުން ޑިސްކައުންޓް ދޭން ނިންމިކަން މިދިޔަ އަހަރުގެ ނޮވެމްބަރު 14، ގައި ހާމަކުރެއްވި މުހައްމަދު މުއިއްޒު އެވެ. އެ ޖަލްސާގައި މުއިއްޒު ވިދާޅުވީ ރޯދަ މަހު ޑޮމެސްޓިކް ރޭޓުން ބިލުކުރާ ކޮންމެ ބިލަކަށް ގިނަވެގެން ނަގާނީ 400ރ. ކަމަށެވެ. އެގޮތުން ބާކީ ބިލަށް އަރާވަރަކީ ޑިސްކައުންޓް ކަމަށް ވެސް ވިދާޅުވި އެވެ.
"ޑޮމެސްޓިކް ރޭޓުން ބިލުކުރާ ކޮންމެ ބިލަކަށް އެންމެ ގިނަވެގެން މިއަންނަ ރަމަޟާން މަހު ނަގާނީ 400ރ. ޑޮމެސްޓިކް ރޭޓުން ބިލުކުރާ ކޮންމެ ބިލަކަށް ނަގާނީ މި އަންނަ ރަމަޟާން މަހު، އެމަހުގެ ބިލަށް ނަގާނީ 400ރ. އެންމެ ގިނަވެގެން. ބާކީ ބައި ޑިސްކައުންޓް،" މުއިއްޒު ވިދާޅުވި އެވެ.
ކަރަންޓު ބިލުން ދޭ ޑިސްކައުންޓަކީ ދުރާލައި ރާވައިގެން ބަޖެޓުގައި ވެސް ޖަހައިގެން ދޭ އެއްޗެއް ކަމަށް ފިނޭންސް މިނިސްޓަރު މޫސާ ޒަމީރު މީގެ ކުރިން ވިދާޅުވި އެވެ. އެކަމަކު ތެލުގެ އަގަށް އައި ބަދަލާ ގުޅިގެން އޭރު އަންދާޒާކުރި އަދަދަށްވުރެ ގިނައިން ކަރަންޓު ބިލުގެ ޑިސްކައުންޓަށް ސަރުކާރުން ހަރަދުކުރަން ޖެހޭވަރު ބޮޑުވާނެ ކަމަށް ބެލެވެ އެވެ.
ރޯދަ މަސް ތެރޭގައި މެދުއިރުމަތީގައި ހަނގުރާމަ ފެށުމާ ގުޅިގެން ތެލުގެ އަގު އިންތިހާއަށް ބޮޑުވި އެވެ. އެ ގޮތުން ރޯދަ މަހު ޑިސްކައުންޓް ދިން ކަރަންޓު ބިލަށް ސަރުކާރުން ބޮޑު ހަރަދެއް ކުރަން ޖެހޭނެ ކަމަށް ބެލެވެ އެވެ.
މިދިޔަ އަހަރުގެ ރޯދަ މަހުގެ ކަރަންޓު ބިލުން 10 ޕަސަންޓުގެ ޑިސްކައުންޓު ދީފައިވެ އެވެ. ނަމަވެސް އެފަހަރު ބިލުން ޑިސްކައުންޓް ދިން ގޮތާ ގުޅިގެން ރައްޔިތުންގެ ޝަކުވާތައް ގިނަވެ، ފަހުން އެޕްރީލް މަހުގެ ކަރަންޓު ބިލުންވެސް ޑިސްކައުންޓް ދިނެވެ.
ފަހަކަށް އައިސް ކަރަންޓު ބިލު އިންތިހާއަށް ބޮޑުވަމުންދާތީ ވެސް އާންމުން ދަނީ ޝަކުވާ އެކަމާ ގުޅިގެން ކުރަމުންނެވެ.
ރޯދަ ހަދިޔާގެ ގޮތުގައި ކަރަންޓު ބިލުން ޑިސްކައުންޓް ދިނުމުގެ އިތުރުން މުޅި ރާއްޖޭގެ ހުރިހާ ގޭބިސީތަކަށް މިދިޔަ އަހަރެކޭ އެއްފަދައިން މި އަހަރުވެސް މަސްދަޅު ކޭސް ބެހި އެވެ. ސަރުކާރުން ބުނީ ޖުމްލަ 118،673 މަސްދަޅު ކޭސް ބެހުމަށް އޭރު ތައްޔާރުކުރި ކަމަށެވެ.
