މާލީ ގޮތުން ހުރި ހުރަސްތަކާ ހެދި ހިންގަން ދަތިވާ ހިސާބަށް ގޮސްފައިވާ ފެނަކައިން ކަރަންޓާއި ފެނާއި ނަރުދަމާގެ ހިދުމަތް ދެމުން އައި ތިން އަތޮޅެއްގައި ހިދުމަތްތައް ދިނުމާ ސްޓެލްކޯއިން މިއަދު ހަވާލުވެއްޖެ އެވެ.
ސްޓެލްކޯއިން ބުނި ގޮތުގައި މިއީ ސަރުކާރުން ހިދުމަތްތައް ދިނުމާއި ހިދުމަތްތައް ތަރައްގީކުރުމުގެ ނިޒާމަށް ގެންނަމުންދާ ބަދަލުތަކުގެ ތެރެއިން، ރައީސް މުހައްމަދު މުއިއްޒު ނިންމަވައިގެން ގެނައި ބަދަލެއް ކަމަށެވެ. މި ބަދަލާއެކީ ބ. އަތޮޅުން ފެށިގެން މ. އަތޮޅުގެ ރަށްތަކުގެ ހުރިހާ ޔުޓިލިޓީ ހިދުމަތެއް ދޭނީ ސްޓެލްކޯއިންނެވެ.
އެ ގޮތުން ފެނަކައިން ހިދުމަތް ދެމުން އައި އަތޮޅުތަކުގެ ތެރެއިން ބ. އަތޮޅާއި ޅ. އަތޮޅާއި މ. އަތޮޅުގެ 25 ރަށުގެ ޔުޓިލިޓީ ހިދުމަތާ ސްޓެލްކޯއިން ހަވާލުވާން ވަނީ އެއްބަސްވެފަ އެވެ. މިއާ އެކީ އެ ކުންފުނިން ހިދުމަތްދޭ ރަށްތަކުގެ އަދަދު 61 އަށް އަރާނެ އެވެ.
ސަރުކާރުން ކުއްލިއަކަށް މި ބަދަލު ގެނައިއިރު، ފެނަކައަކީ މި ސަރުކާރުން ރިފޯމް ކުރާ ލިސްޓުގެ އެންމެ ކުރިއަށް ލައިގެން އުޅުނު ކުންފުންޏެވެ. ފުރަތަމަ އުޅުނީ އެސްޓީއޯގެ ދަށަށް އެ ކުންފުނި ބަދަލުކުރާށެވެ.
މި ޕްލޭން ދޫކޮށްލާފައި ސަރުކާރުން ދެން ބުނީ "ސިނާޖީ" ހޯދުމުގެ ގޮތުން ސްޓެލްކޯ ކަހަލަ އެއް ގޮތް މަސައްކަތް ކުރާ ކުންފުންޏަކާ އެއްކޮށްލާނީ ކަމަށެވެ. އެކަމަކު މިއިން އެއްވެސް ކަމެއް ނުކުރެ އެވެ. އަދި ފެނެކައިގެ ހިންގުން ވެސް ރަނގަޅެއް ނުކުރެވުނެވެ.
