ރައްޔިތުންގެ މަޖިލީހަށް ނިސްބަތްވާ ވެރިކަން ކުރާ ޕީޕަލްސް ނެޝަނަލް ކޮންގްރެސްގެ މެންބަރުން ގައުމަށް ހެޔޮ އެދޭ ނަމަ ގޮނޑި ދޫކޮށްލަންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އައްޑޫގައި ބޭއްވި ޖަލްސާއެއްގައި ވާހަކަ ދައްކަވަމުން ސަރުކާރު ޕާޓީގެ މެންބަރުންނަށް ނަޝީދު ނަސޭހަތް ދެއްވީ ރައީސް މުހައްމަދު މުއިއްޒުއާ ދުރަށްޖެހި، މަޖިލީހުން އިސްތިއުފާ ދެއްވުމަށެވެ.
"އަޅުގަނޑު ދަންނަވާނަން، ޕީއެންސީގެ ހުރިހާ ރައްޔިތުންގެ މަޖިލީހުގެ މެންބަރުންނަށް ތިބޭފުޅުން ރާއްޖެއަށް ހެޔޮ އެދޭނެމަ [ގޮނޑި] ދޫކޮށްލައްވާށޭ. ރައީސް މުއިއްޒުގެ ފަހަތްޕުޅުގައި ތިބޭފުޅުން ތިއްބަވައިފި ނަމަ ތިބޭފުޅުންނަށް ވާ ގޮތް ކައުންސިލް އިންތިހާބުގައި ވަރަށް ސާފުކޮށް ފެނިގެން އެދިޔައީ،" ނަޝީދު ވިދާޅުވި އެވެ.
ނިމިދިޔަ ލޯކަލް ކައުންސިލްތަކުގެ އިންތިހާބުގައި ޕީއެންސީގެ ކެމްޕެއިން ޓީމުތަކުން އެކަށީގެންވާ މިންވަރަކަށް މަސައްކަތް ނުކުރާ ކަމަށް މުއިއްޒު ވިދާޅުވެފައި ވާތީ އެކަމަށް ވެސް ނަޝީދު ފާޑުވިދާޅުވި އެވެ.
"ދެން ރައީސް ވަޑައިގެން ވިދާޅުވީ ތިބޭފުޅުން މަސައްކަތް ނުކުރެއްވީއޭ. ނޫން، ފަލްސަފާއެއް ނެތީ، ވިސްނުމެއް ނުތުނީ، ތަސައްވުރެއް ނެތުނީ، މަންޒަރެއް ނުކުރެހުނީ، އުއްމީދެއް ނުދެވުނީ،" އެމަނިކުފާނު ވިދާޅުވި އެވެ.
އޭގެ އިތުރުން އެ ޖަލްސާގައި ވާހަކަ ދައްކަވަމުން ނަޝީދު ވަނީ، 2028 ގައި ރިޔާސީ އިންތިހާބެއް ބޭއްވުމުގެ ކުރިން މުއިއްޒުގެ ވެރިކަން ބަދަލު ކުރަންޖެހޭ ކަމަށެވެ.
"އަޅުގަނޑު ޕާޓީގެ ޗެއާޕާސަން ކަމާ ހަވާލު މިވަނީ، ހަވާލުވުމަށް އަޅުގަނޑު އެދެނީ، އަޅުގަނޑު ދެކޭ ގޮތުގައި ސަރުކާރު ބަދަލުކުރުމަކީ ވަރަށް މުހިންމު ކަމެއް. [މުއިއްޒުގެ] ސަރުކާރު ބަދަލުނުވެ 2028 ވަނަ އަހަރު އަތުވެއްޖެނަމަ، އެއީ މި ދިވެހިރާއްޖެއަށް އަޅުގަނޑު ދެކޭ ގޮތުގައި ލިބޭނެ ވަރަށް ބޮޑު ގެއްލުމެއް،" ނަޝީދު ވިދާޅުވި އެވެ.
