ވައިޓް ހައުސް ކޮރެސްޕޮންޑެންޓްސް އެސޯސިއޭޝަނުން ހޮނިހިރު ދުވަހުގެ ރޭ ބޭއްވި ފަރިއްކޮޅުގެ ތެރެއަށް ބަޑިއެއް ހިފައިގެން ހުރި މީހަކު ވަންނަން އުޅުމާ ގުޅިގެން، ރައީސް ޑޮނަލްޑް ޓްރަމްޕާއި އަނބިކަނބަލުން މެލަނިއާ ޓްރަމްޕް ސީކްރެޓް ސާވިސްގެ އެޖެންޓުންގެ އެހީތެރިކަމާއެކު އެ ތަނުން ރައްކާތެރިކަމާއެކު ބޭރަށް ނެރެފި އެވެ.
އެފްބީއައިގެ އޮފިޝަލަކު ރޮއިޓާސްއަށް މައުލޫމާތު ދިން ގޮތުގައި، ހަތިޔާރު އަޅައިގެން ހުރި އެ މީހާ ވަނީ ސީކްރެޓް ސާވިސްގެ އެޖެންޓަކަށް އަމާޒުކޮށް ބަޑިޖަހާފަ އެވެ. ނަމަވެސް، ވަޒަން އެރީ އެޖެންޓް ލައިގެން ހުރި ރައްކާތެރިކަމުގެ ގިއަރަށް ކަމަށްވާތީ، އޭނާއަށް އެއްވެސް އަނިޔާއެއް ލިބިފައި ނުވާ ކަމަށް ބުންޏެވެ.
ޓްރަމްޕް ހިމެނޭހެން އެމެރިކާ ސަރުކާރުގެ ހުރިހާ އޮފިޝަލުންގެ ހާލުވެސް ރަނގަޅެވެ. ހާދިސާއާ ގުޅިގެން ޓްރަމްޕް އެ ތަނުން ގެންދިޔަތާ ގަޑިއެއްހާއިރު ފަހުން، ސޯޝަލް މީޑިއާ ޕްލެޓްފޯމް "ޓްރޫތު ސޯޝަލް" ގައި ކުރެއްވި ޕޯސްޓެއްގައި ވިދާޅުވީ ބަޑިޖެހި މީހާ މިހާރު ހައްޔަރުކޮށްފައިވާ ކަމަށެވެ.
"ވޮޝިންޓަން ޑީސީގައި ވަރަށް ތަފާތު ރެއެއް. ސީކްރެޓް ސާވިސް އާއި ގާނޫނު ތަންފީޒުކުރާ އިދާރާތަކުން ކުރީ ވަރަށް ފުރިހަމަ މަސައްކަތެއް،" ޓްރަމްޕް އިތުރަށް ވިދާޅުވި އެވެ.
އޭގެ ކުޑައިރުކޮޅެއް ފަހުން ޓްރަމްޕް ކުރެއްވި އެހެން ޕޯސްޓެއްގައި ވިދާޅުވީ، ފަސްޓް ލޭޑީ އާއި ނައިބު ރައީސްގެ އިތުރުން ކެބިނެޓުގެ ހުރިހާ ވަޒީރުންގެ ހާލުވެސް ރަނގަޅު ކަމަށެވެ. އަދި ހޮނިހިރު ދުވަހުގެ ރޭ ވައިޓް ހައުސްގައި ނޫސްވެރިންގެ ބައްދަލުވުމެއް ބާއްވާނެ ކަމަށް ވެސް އޭނާ ވިދާޅުވި އެވެ.
ސީކްރެޓް ސާވިސްގެ ތަރުޖަމާނު އެންތަނީ ގުގްލިއެލްމީ ވިދާޅުވީ، އެ ހަފުލާއަށް ވަންނަ މައި ސަރަހައްދު ކައިރީގައި ހިނގި ބަޑިޖެހުމުގެ ހާދިސާ އެ ސާވިސްއިން ތަހުގީގު ކުރަމުންދާ ކަމަށެވެ.
ބަޑިޖެހި އަޑާއެކު، ފަރިއްކޮޅަށް ގޮސް ތިބި މީހުން ވާހަކަދެއްކުން ހުއްޓާލައި، ހަޅޭއްލަވަން ފެށި އެވެ. އެ ތަނަށް އެއްވެ ތިބި 2،600 އެއްހާ މީހުންގެ ތެރެއިން ގިނަ ބަޔަކު މޭޒުތަކުގެ ދަށަށް ވަދެ ރައްކާތެރިކަން ހޯދިއިރު، އެ ތަނުގައި މަސައްކަތް ކުރި ވެއިޓަރުން ވަނީ ހޯލުގެ ކުރީކޮޅަށް ގޮސްފަ އެވެ.
މި ހާދިސާއާ ގުޅިގެން އެ ރޭގެ ހަފުލާ ވަނީ ކެންސަލްކޮށްފަ އެވެ. ޓްރަމްޕް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ކުރިއަށް އޮތް 30 ދުވަހުގެ ތެރޭގައި މި ހަފުލާ އަލުން ބޭއްވޭނެ ކަމަށް އުންމީދު ކުރައްވާ ކަމަށެވެ.
ހޮނިހިރު ދުވަހުގެ ރޭ ބޭއްވި މި ފަރިއްކޮޅަކީ ޓްރަމްޕް ރައީސްކަމުގެ މަގާމުގައި ހުންނަވައިގެން ކޮރެސްޕޮންޑެންޓްސް ޑިނާގައި ބައިވެރިވެވަޑައިގެންނެވި ފުރަތަމަ ފަހަރެވެ.
2021 ވަނަ އަހަރު ވައިޓް ހައުސްއިން ވަކިވެވަޑައިގަތުމަށްފަހު، އަލުން އިންތިޚާބަށް ކެމްޕޭން ކުރައްވަމުން ގެންދެވި 2024 ވަނަ އަހަރުގެ ތެރޭގައި ވެސް ޓްރަމްޕް އަވަހާރަކޮށްލަން ދެ ފަހަރަކު ވަނީ މަސައްކަތް ކޮށްފަ އެވެ.
މީގެ ތެރެއިން އެންމެ ނުރައްކާތެރި ހާދިސާ ހިނގީ 2024 ވަނަ އަހަރުގެ ޖުލައި މަހު ޕެންސިލްވޭނިއާގެ ބަޓްލާގައި ބޭއްވި ކެމްޕޭން ރެލީއެއްގެ ތެރޭގަ އެވެ. އެ ފަހަރު 20 އަހަރުގެ މީހަކު ބަޑިން ދިން ހަމަލާގައި ޓްރަމްޕްގެ ކަނާތު ކަންފަތުގެ މަތީ ބަޔަށް ވަޒަން އަރައި ޒަޚަމްވި އެވެ. އެ ހަމަލާ ދިން މީހާ ވަނީ ސަލާމަތީ ބާރުތަކުން ބަޑިޖަހައި މަރާލާފަ އެވެ.
ބަޓްލާގެ ހާދިސާއަށް ދެ މަސްވީތަނާ، ފްލޮރިޑާގެ ވެސްޓް ޕާމް ބީޗުގައި ހުންނަ ޓްރަމްޕް އިންޓަނޭޝަނަލް ގޮލްފް ކްލަބުގައި ޓްރަމްޕް ގޮލްފް ކުޅުއްވަން ހުންނަވަނިކޮށް، ބަޑިއެއް ހިފައިގެން ގަސްތަކުގެ ތެރޭގައި ފިލައި އޮތް މީހަކު ސީކްރެޓް ސާވިސްގެ އެޖެންޓުންނަށް ފެނުނެވެ. އެއީ ވެސް ޓްރަމްޕް އަވަހާރަކޮށްލަން ދިން ހަމަލާއެއްގެ ގޮތުގައި ބަލައި، އެ މީހާގެ މައްޗަށް މިދިޔަ ފެބްރުއަރީ މަހު ވަނީ އުމުރުދުވަހުގެ ޖަލު ހުކުމެއް އިއްވާފަ އެވެ.
ހޮނިހިރު ދުވަހުގެ ރޭގެ ފަރިއްކޮޅު ބޭއްވި ވޮޝިންޓަން ހިލްޓަން ހޮޓަލަކީ، 1981 ވަނަ އަހަރު އޭރުގެ ރައީސް ރޮނަލްޑް ރޭގަން އަވަހާރަކޮށްލަން ދިން ހަމަލާގައި އެމަނިކުފާނަށް ބަޑިން ހަމަލާދީ ޒަޚަމްކޮށްލި ތަން ވެސް މެއެވެ.
