އީރާނުގެ ތެޔޮ ގަންނާތީ ޗައިނާގެ ބޮޑު ކުންފުންޏަކަށް އެމެރިކާއިން ދަތިކުރުމުގެ ފިޔަވަޅު އަޅައިފި

އީރާނުގެ ތެޔޮ ގަތުމަށް އެތައް މިލިއަން ޑޮލަރެއް ހޭދަކުރި ކަމަށް ބުނެ، އެމެރިކާ އިން ޗައިނާގެ ތެޔޮ ސާފުކުރާ ކުންފުންޏަކަށް ދަތިކުރުމުގެ ފިޔަވަޅު އަޅައިފި އެވެ.

އިޒްރޭލާއި އެމެރިކާ ގުޅިގެން އީރާނާ ދެކޮޅަށް ކުރަމުންދާ ހަނގުރާމަ ހުއްޓާލުމާ ގުޅޭ ގޮތުން އާ މަޝްވަރާތަކެއް ފެށުމަށް ތައްޔާރުވަމުންދާ ދަނޑިވަޅެއްގައި، އެމެރިކާގެ ޓްރެޝަރީ ޑިޕާޓްމަންޓުން ހުކުރު ދުވަހު ބުނީ، މި ފިޔަވަޅުތައް އަމާޒުކޮށްފައިވަނީ ޗައިނާގެ ދެވަނައަށް އެންމެ ބޮޑު އަމިއްލަ ރިފައިނަރީ ކަމަށްވާ ހެންގްލީ ޕެޓްރޯކެމިކަލް (ޑާލިއަން) ރިފައިނަރީއަށް ކަމަށެވެ.

ޓްރެޝަރީ ޑިޕާޓްމަންޓުން އިތުރަށް ހާމަކުރި ގޮތުގައި، ހެންގްލީ އަކީ އީރާނުގެ އެންމެ މުހިންމު އެއް ކަސްޓަމަރެވެ. އަދި އެ ކުންފުނިން އީރާނުގެ ސާފުނުކުރާ ތެޔޮ ގަތުމުގެ ސަބަބުން، އީރާނުގެ އަސްކަރިއްޔާއަށް އާމްދަނީގެ ގޮތުގައި އެތައް މިލިއަން ޑޮލަރެއް ލިބިފައިވާ ކަމަށް ވެސް އެމެރިކާ އިން ބުނެ އެވެ.

މީގެ އިތުރުން، އީރާނުގެ "ޝެޑޯ ފްލީޓް" ނުވަތަ ސިއްރުން ތެޔޮ އުފުލާ އުޅަނދުފަހަރުގެ ގޮތުގައި ހަރަކާތްތެރިވާ ކަމަށް ތުހުމަތުކޮށް، މުދާ އުފުލާ 40 ކުންފުންޏަކާއި އުޅަނދަކަށް ވެސް އެމެރިކާ އިން ވަނީ އަލަށް ދަތިކުރުމުގެ ފިޔަވަޅު އަޅާފަ އެވެ.

ވޮޝިންގްޓަން ޑީސީގައި ހުންނަ ޗައިނާގެ އެމްބަސީން ވަނީ އެމެރިކާގެ މި ނިންމުމާ ދެކޮޅަށް އަޑުއުފުލާފަ އެވެ.

އެމްބަސީގެ ތަރުޖަމާނަކު ވިދާޅުވީ، ވިޔަފާރި އާއި ސައިންސާއި ޓެކްނޮލޮޖީގެ މައްސަލަތައް ސިޔާސީ ހަތިޔާރަކަށް ހެދުން ހުއްޓާލުމަށާއި، ޗައިނާގެ ކުންފުނިތަކަށް ގެއްލުން ދިނުމަށް އެކި ބާވަތުގެ ދަތިކުރުމުގެ ފިޔަވަޅުތައް ނަހަމަ ގޮތުގައި ބޭނުންކުރުން ހުއްޓާލުމަށް އެމެރިކާއަށް ގޮވާލާ ކަމަށެވެ.

ކްޕްލާ ނަމަކަށް ކިޔާ އެނަލިޓިކްސް ފާމަކުން ހާމަކޮށްފައިވާ ތަފާސްހިސާބުތަކަށް ބަލާއިރު، ޗައިނާއަށް ބޭނުންވާ ތެލުގެ ދެބައިކުޅަ އެއްބަޔަށް ވުރެ ގިނަ ތެޔޮ ހޯދަނީ މެދުއިރުމަތިންނެވެ. އަދި މިދިޔަ އަހަރު އީރާނުން ބޭރުކުރި ތެލުގެ 80 އިންސައްތައަށް ވުރެ ގިނަ ތެޔޮ ގަނެފައިވަނީ ޗައިނާއިންނެވެ.

އޭޕްރިލް 13 އިން ފެށިގެން އެމެރިކާގެ ކަނޑުގެ ސިފައިން ވަނީ އީރާނުގެ ބަނދަރުތައް ބަންދުކޮށްފަ އެވެ. ރައީސް ޑޮނަލްޑް ޓްރަމްޕް ވިދާޅުވާ ގޮތުގައި، މިއީ އީރާނުން ތެލާއި ގޭސް ބޭރުކޮށްގެން ހޯދާ އާމްދަނީ އިތުރަށް ހަނިކުރުމަށް އަޅާފައިވާ ފިޔަވަޅެކެވެ.