އެމްޑީޕީން ރޭ ބޭއްވި މުޒާހަރާގައި މާލެ ސިޓީގެ މޭޔަރު އާދަމް އާޒިމަށް މީހަކު ހަމަލާދިނީ ސަރުކާރުން ރާވައިގެން ކަމަށް އޭނާ ތުހުމަތު ކުރައްވައިފިއެވެ.
ރޭ "އަދަދު" ނޫހަށް ދިން އިންޓަވިއުއެއްގައި އާޒިމް ވިދާޅުވީ، ރައްޔިތުން މަގުމައްޗަށް ނުކުމެ އިހުތިޖާޖު ކުރަން ޖެހުނީ ސަރުކާރުގެ ނާގާބިލުކަން އިންތިހާއަށް ގޮސް، ރައްޔިތުން ތަހައްމަލު ކުރަމުންދާ ދަތިތަކުން ސަލާމަތްކޮށްދިނުމަށްޓަކައި ކަމަށެވެ. އޭނާއަށް ހަމަލާ ދިނީ ސަރުކާރުގެ ނާގާބިލްކަން ހާމަކޮށް، ހަމަމަގަށް އެޅުވުމަށް މަސައްކަތް ކުރާތީ ކަމަށް އާޒިމް ވިދާޅުވިއެވެ.
"އަޅުގަނޑު ގަބޫލުކުރަނީ މިއީ [ހަމަލާ ދިނުމަކީ] ސަރުކާރުން ރާވައިގެން ކޮށްފައިވާ ކަމެއް ކަމަށް،" އާޒިމް ވިދާޅުވިއެވެ.
މާލޭގެ މޭޔަރު އާދަމް އާޒިމްއަށް މަގުމަތިން ހަމަލާ ދީފި
މުޒާހަރާއެއްގެ ތެރެއިން މާލޭގެ މޭޔަރު އާދަމް އާޒިމަށް މީހަކު ހަމަލާދީ ކޮއްޕާލައިފި. މި ހަމަލާއަކީ ސަރުކާރުން ރާވައިގެން ދިން ހަމަލާއެއް ކަމަށް އާޒިމް ތުހުމަތު ކުރެއްވި ނަމަވެސް، ސަރުކާރު ހަމަމަގަށް އެޅުވުމަށް ކުރާ މަސައްކަތްތަކާއި މުޒާހަރާތައް އިތުރަށް ވަރުގަދަ ކުރައްވާނެ ކަމަށް އޭނާ ވިދާޅުވި.
މިފަދަ ހަމަލާތަކުން ރައްޔިތުންގެ އަޑު ކަނޑުވައިނުލެވޭނެ ކަމަށާއި، ކުރިއަށް އޮތް ތަނުގައި މުޒާހަރާތައް މިހާރަށްވުރެ ވަރުގަދަ ކުރައްވާނެ ކަމަށް އޭނާ ވިދާޅުވިއެވެ.
"އަޅުގަނޑުމެންނަށް އަނިޔާކޮށްގެން ރައްޔިތުންނަށް މިކޮށްދޭ މަސައްކަތް އަޅުގަނޑުމެން ހުއްޓައެއް ނުލާނެކަން މި އަނިޔާވެރި ސަރުކާރަށް ބުނެލަން ބޭނުން. ތަޅާފޮޅާ މަރައިގެން އަޅުގަނޑުމެން ނުހުއްޓުވޭނެ. މިއަށްވުރެ މުޒާހަރާތައް ވަރުގަދަކުރާނަން،" އާޒިމް ވިދާޅުވިއެވެ.
ކަންތައްތައް ރަނގަޅަށް ހިނގާނަމަ އެއްވެސް މީހަކު މަގުމައްޗަށް ނުކުމެ މުޒާހަރާ ކުރާކަށް ނުޖެހޭނެ ކަމަށާއި، ނަމަވެސް މިހާރު ޑޮލަރާއި ބޭހެއް ނުލިބޭ ކަމަށް އާޒިމް ވިދާޅުވިއެވެ. އަދި މި ދެ ދުވަހުގެ ތެރޭގައި އެތައް ކުދިންނެއް މަރުވިއިރު، ބައެއް ކުދިންގެ ގަޔަށް ތެލެސީމިއާ ސެންޓަރުން ކުނި ލޭ އަޅާފައިވާ ކަމަށް ވެސް އާޒިމް ފާހަގަކުރެއްވިއެވެ.
މި ދަރަޖައަށް ކަންކަން ގޯސްވީ، ސަރުކާރުގެ މުއައްސަސާތަކަށް ނާގާބިލް މީހުން އައްޔަން ކުރުމުން ކަމަށް އާޒިމް ވިދާޅުވިއެވެ. އެފަދަ މީހުން އައްޔަން ކުރަނީ ކޮރަޕްޝަނާއި ވައްކަން ކުރުމަށް މަގުފަހިކުރުމަށް ކަމަށް ވެސް އާޒިމް ތުހުމަތު ކުރެއްވިއެވެ.
ގައުމުގެ ހާލަތު މިހާ ހިސާބަށް ދިޔުމުން ރައްޔިތުން ނުކުމެ ސަރުކާރު ހަމަމަގަށް އަޅުވަން ޖެހޭ ކަމަށާއި، އަނިޔާކޮށްގެން ނުވަތަ "ތަޅާފޮޅައި މަރައިގެން" ވެސް ރައްޔިތުންގެ ހައްގުގައި ކުރާ މަސައްކަތް ހުއްޓުވައި ނުލެވޭނެ ކަމަށް އޭނާ ވިދާޅުވިއެވެ.
އާޒިމް ވިދާޅުވީ ސަރުކާރާއި، ރައްޔިތުންގެ މަޖިލީހާއި، ކޯޓުތައް ފެއިލްވުމުން ދެން އޮންނާނީ ރައްޔިތުންގެ ބާރު ކަމަށެވެ. އަދި ރައްޔިތުންގެ ބާރު އެންމެ ގަދަވާނީ ވޯޓު ފޮށިން ކަމަށާއި، ރައްޔިތުން ނުކުމެ މި ނާގާބިލް ސަރުކާރު ބަދަލުކުރާނެ ކަމަށް ވެސް އޭނާ ވިދާޅުވިއެވެ.
އާޒިމްގެ މި ވާހަކަތަކާ ގުޅިގެން ސަރުކާރުގެ ފަރާތުން އަދި ރަސްމީ ބަހެއް ބުނެފައެއް ނުވެއެވެ.
