އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ސިލްސިލާކޮށް ހިންގަމުން އަންނަ މަގުމަތީ ހަރަކާތްތަކުގެ ތެެރެއިން މިރޭ ބޭއްވި މުޒާހަރާގައި ބައިވެރިވަމުން ދަނިކޮށް މާލެ ސިޓީގެ މޭޔަރު އާދަމް އާޒިމްއަށް މީހަކު ހަމަލާ ދީފި އެވެ.
އާޒިމްއަށް ހަމަލާ ދިން މަންޒަރު ފެންނަ ވީޑިއިއޯތަކުން އެނގޭ ގޮތުގައި މުޒާހަރާގެ ބައިވެރިން ހިނގަމުން ދަނިކޮށް މަގެއްގެ އަރިމަތީގައި ހުރި މީހަކު ވަނީ އާޒިމްގެ މޭމަތީގައި އަތް އަޅާ ކޮއްޕާލާފަ އެވެ. އެ ވަގުތު އާޒިމް ކައިރީގައި ތިބި މީހުން ވަނީ އޭނާގެ ހިމާޔަތުގައި ހަމަލާ ދިން މީހާއަށް ރައްދު ދީނީ އޭނާއަށް ވެސް ހަމަލާ ދީފަ އެވެ.
މިރޭގެ މުޒާހަރާ ނިންމާލުމަށް ފަހު ދަނޑިކޮށީ ހަރުގޭ ބޭރުގައި ހުންނަވައި އަދަދު އަށް ދެއްވި އިންޓަވިއުއެއްގައި އާޒިމް ވަނީ މިއީ ސަރުކާރުން ގަސްތުގައި ރާވައިގެން ކުރި ކަމެއް ކަމަށް ތުހުމަތު ކުރައްވާފަ އެވެ. ސަރުކާރު ހަމަ މަގަށް އެޅުވުމަށް ކުރާ މަސައްކަތްތަކަށް ހުރަސް ނޭޅުމަށް އޭނާ ގޮވާލެއްވި އެވެ.
"މުޒާހަރާ މި ކުރަނީ ކަންތައްތައް ގޯސްވީމައި. ކަންތައް ރަނގަޅަށް ކުރާނަމަ މުޒާހަރާއެއް ނުކުރާނެ، ޑޮލަރެއް ނުލިބޭ، ބޭހެއް ނުިލިބޭ،" އާޒިމް ވިދާޅުވި އެވެ.
ސަރުކާރުން ހުރިހާ މުައައްސަސާތަކެއް ފެއިލްކޮށްލާފައިވާ ކަމަށާއި އެމްޑީޕީން ކުރަމުންދާ މުޒާހަރާތައް އިތުރަށް ވަރުގަދަ ކުރައްވާނެ ކަމަށް ވެސް ދެވަނަ ދައުރަކަށް މޭޔަރުކަމަށް އިންތިހާބުވި އާޒިމް ވިދާޅުވި އެވެ.
"ބޮޑެތި ކުންފުނިތައް ބަނގުރޫޓުވަމުންދާއިރު އެ ތިބެނީ ބަލަހައްޓައިގެން. ރައްޔިތުންގެ މަޖިލިސް އެ އޮތީ ހިސޯރުކޮށްފައި، ކޯޓުތައް އޮތީ ހިސޯރުކޮށްފައި،" އާޒިމް ވިދާޅުވި އެވެ.
ދައުލަތުގެ ހުރިހާ ބާރެއް ފެއިލްވުމުން އެ ތަންތަން ހަމަ މަގަށް އެޅުވުމަށް ރައްޔިތުން ނުކުންނާނެ ކަމަށް އާޒިމް ވިދާޅުވި އެވެ. ރައްޔިތުންގެ ތެރެއިން 70 ޕަސެންޓު މީހުން މި ސަރުކާރަށް ނޫނެކޭ ބުނެފައިވާ ކަމަށް ވެސް އާޒިމް ވިދާޅުވި އެވެ.
ވެރިކަން ކުރާ ސިޓީގެ މޭޔަރަށް ދިން ހަމަލާ އެމްޑީޕީގެ ޗެއާޕާސަން އަބްދުލްޣަފޫރު މޫސާ، އެ ޕާޓީގެ ރައީސް އަބްދުالله ޝާހިދު އަދި އިސް އޮފިޝަލުން އަންނަނީ ކުށްވެރި ކުރަމުންނެވެ.
