މިލާން (އޭޕްރީލް 24) - ޖެހިޖެހިގެން ތިން ވޯލްޑް ކަޕަށް ކޮލިފައިނުވެ، ބޮޑު މާޔޫސްކަމަކާ ކުރިމަތިލާން ޖެހިފައި އޮތް އިޓަލީގެ ގައުމީ ޓީމުގެ ހާލަތު ބަދަލުކުރެވޭނެ ކޯޗަކީ، މެންޗެސްޓާ ސިޓީގެ ކޯޗު، ޕެޕް ގާޑިއޯލާ ކަމަށް އިޓަލީގެ ކުރީގެ ކެޕްޓަން، ލިއޮނާޑޯ ބޮނޫޗީ ބުނެފި އެވެ.
އެންމެ ފަހުން ބޭއްވި ތިން ވޯލްޑް ކަަޕަށް ވެސް އިޓަލީ ކޮލިފައިނުވީ ޕްލޭއޮފުން ކުރިއަށް ނުދެވިގެންނެވެ. މި ފަހަރުގެ ކުރިން، ރަޝިއާގައި 2018 ވަނަ އަހަރު ބޭއްވި ވޯލްޑް ކަޕްގެ ކޮލިފައިން ޕްލޭއޮފުން އިޓަލީ ކެޓީ ސްވިޑެން އަތުން 1-0 އިން ބަލިވެގެންނެވެ. އަދި، ގަތަރުގައި، 2022 ގައި ބޭއްވި ވޯލްޑް ކަޕުން ވެސް އިޓަލީ އަށް ފުރުސަތު ގެއްލުނީ ކޮލިފައިން ޕްލޭއޮފްގައި ބަލިވުމުންނެވެ. ނޯތު މެސެޑޯނިއާ އިން، 1-0 އިން އިޓަލީ ބަލިކުރި ގޯލު ޖެހީ އިތުރު ވަގުތުގައި އަލެކްސަންޑަ ޓްރަޖޯވްސްކީ އެވެ. ކުރިން ފަހަރުތަކާ ހިލާފަށް އިޓަލީން މި ފަހަރުގެ ޕްލޭއޮފް ފުރަތަމަ މެޗުން ވަނީ މޮޅުވެފަ އެވެ. އެކަމަކު، ޕްލޭއޮފް ފައިނަލުން ބޮސްނިއާ އަތްދަށުވެ ކެޓީ އެވެ.
ވޯލްޑް ކަޕަށް އިޓަލީ ކޮލިފައިނުވުމުން އިޓަލީ ފުޓްބޯޅަ ފެޑެރޭޝަންގެ ރައީސް، ގަބްރިއެލް ގްރަވީނާ ވަނީ މަގާމުން އިސްތިއުފާ ދީފަ އެވެ. އިޓަލީގެ ކޯޗިން ސްޓާފުންގެ ގޮތުގައި މަސައްކަތްކުރި، ކުރީގެ އެއް ވަނަ ގޯލްކީޕަރު، ޖިއަންލުއިޖީ ބުފޮން ވަނީ ޓީމު ދޫކޮށްލައިފަ އެވެ. އަދި، ކޯޗު ޖެނާރޯ ގަޓޫސޯ ވެސް ވަނީ މަގާމުން އިސްތިއުފާދީފަ އެވެ. ބޮނޫޗީ އަކީ ވެސް ކޯޗިން ސްޓާފުންގެ މެމްބަރެކެވެ.
ލަ ގަޒެޓާ ޑެލޯ ސްޕޯޓް އަށް ދިން އިންޓަވިއުއެއްގައި، ބޮނޫޗީ ބުނީ، މިދިޔަ ދުވަސްތަކުގައި އިޓަލީގެ ގައުމީ ޓީމުގެ ކޯޗުކަން ހަވާލުކުރާނެ ކޯޗުންގެ ގޮތުގައި ފެނުނު ނަންތަކަށް ބަލާއިރު، އޭނާ އެންމެ އެދެނީ ބާސެލޯނާ އާއި ބަޔާން މިއުނިކްގެ ކުރީގެ ކޯޗު ގާޑިއޯލާއާ ޓީމު ހަވާލުކުރުމަށް ކަމަށެވެ.
"އަލުން ހުރިހާ ކަމެއް ރަނގަޅަށް ފަށައި ރަނގަޅަށް ގެންދާނަމަ، އަހަރެން ބޭނުންވަނީ އެކަން ކުރަން ގާޑިއޯލާ ގެންނަން. ގާޑިއޯލާ، ސޮއިކުރުވުން ވެގެންދާނީ ރަނގަޅު ބަދަލެއްގެ ފެށުމަކަށް. މިއީ (ގާޑިއޯލާ ގެނައުމަކީ) ވަރަށް އުނދަގޫ ކަމަކަށް ވާނީ. އެކަމަކު، ހުވަފެން ދެކުމަކީ ނެތް ކަމެއް ނޫން،" ބޮނޫޗީ ބުންޏެވެ.
މި ސީޒަނަށް ފަހު، ނޫނީ އަންނަ ސީޒަނަށް ފަހު ގާޑިއޯލާ، މެންޗެސްޓާ ސިޓީ ދޫކޮށްލާނެ ކަމަށް ރިޕޯޓްތައް ބުނެ އެވެ. މީގެ ކުރިން ގާޑިއޯލާ ވަނީ ގައުމީ ޓީމަކާ ހަވާލުވުމަކީ ޝައުގުވެރިވާ ކަމެއް ކަމަށް ބުނެފަ އެވެ.
