ވެކްސިންގެ ހިދުމަތްދޭން ހެލްތު މިނިސްޓްރީގެ ދަށުން އުފައްދާފައިވާ ދަމަނަވެށިން ދޭ ހިދުމަތްތައް މާފަންނުގައި ހުންނަ އާބަން ޕްރައިމަރީ ހެލްތުކެއާ ސެންޓަރަށް މިއަދުން ފެށިގެން ބަދަލުކޮށްފި އެވެ.
ހެލްތު މިނިސްޓްރީން ބުނީ ދަމަނަވެށި އިމާރާތުގެ މަސައްކަތްތަކެއް ކުރިއަށްދާތީ، އެ މަރުކަޒުން ފޯރުކޮށްދެމުންދާ ހުރިހާ ހިދުމަތްތަކެއް މިއަދުން ފެށިގެން ވަގުތީ ގޮތުން މާފަންނުގައި ހުންނަ އާބަން ޕްރައިމަރީ ހެލްތުކެއާ ސެންޓަރަށް ބަދަލުކޮށްފައިވާ ކަމަށެވެ.
އަދަދު އަށް އެނގިފައިވާ ގޮތުގައި ދަމަނަވެށި އުވާލުމަށްފަހު، އެތަނުގެ މުވައްޒަފުން އައިޖީއެމްއެޗްގެ ދަށަށް ބަދަލުކުރަން ވަނީ ނިންމާފަ އެވެ.
މިކަމާ ގުޅިގެން ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފް (މުންދު) އަދަދު އަށް ކުރިން ވިދާޅުވީ ހެންވޭރު އާބަން ޕްރައިމަރީ ހެލްތުކެއާ ސެންޓަރު ހެދުމުގެ މަސައްކަތް ކުރުމަށް ދަމަނަވެށި ހުސްކުރަން ޖެހޭ ކަމަށް އައިޖީއެމްއެޗް އިން ބުނެފައިވާ ކަމަށެވެ.
"ދަމަނަވެށީގެ ބައެއް ހިދުމަތް ދިނުމަށް ބޭނުންކުރަމުންދަނީ ކުރީގައި މޯލްޑިވްސް ބްލަޑް ސާވިސް (އެމްބީއެސް) ގޮތުގައި ބޭނުންކުރިޔަ އިމާރާތުގައި، އެމްބީއެސް އިމާރާތް މަރާމާތު ކުރުމަށްފަހު ހެންވޭރު ޕްރައިމަރީ ހެލްތު ކެއާ ސެންޓަރު ހެދުމުގެ މަސައްކަތް ކުރަމުންދާއިރު، ދަމަނަވެށި ހުސްކުރަންޖެހޭކަން އައިޖީއެމްއެޗް ހޮސްޕިޓަލުން ވަނީ ފާހަގަކޮށްފައި،" އޭނާ ވިދާޅުވި އެވެ.
ނަމަވެސް މުންދު ވިދާޅުވީ ދަމަނަވެށީގެ މުވައްޒަފުންނާމެދު އަމަލުކުރާނެ ގޮތެއް މިވަގުތު ނިންމާފައި ނުވާ ކަމަށެވެ.
މާލޭގައި ފަސް އާބަން ޕްރައިމަރީ ހެލްތު ކެއާ ސެންޓަރު ގާއިމުކުރަން ސަރުކާރުން ނިންމާފައިވާއިރު، އެ ސެންޓަރުތަކުގެ ހިދުމަތްތަކުގެ ތެރޭގައި ދަމަނަވެށިީގައި ދެމުންދާ ހިދުމަތްތައް ހިމަނައި އެ ހިދުމަތުގެ ތެރެއަށް ދަމަނަވެށީގެ ހިދުމަތްތައް ވެގެންދާގޮތުން ޔޫޕީއެޗްސީގެ ސްކޯޕް އެކުލަވާލާފައިވާ ކަމަށް އޭނާ ވިދާޅުވި އެވެ.
ޖުމްލަ 40 މުވައްޒަފުން ތިބޭ ދަމަނަވެށިން ދުވާލެއްގެ މައްޗަށް 300 އާއި 400 އާ ދެމެދުގެ މީހުންނަށް ހިދުމަތްދޭއިރު، އާބަން ޕްރައިމަރީ ހެލްތު ކެއާ ސެންޓަރުން ދުވާލެއްގެ މައްޗަށް ހިދުމަތްދެނީ ލިމިޓްކޮށްގެން 50 މީހުންނަށެވެ.
ދަމަނަވެށިން ދޭ ހިދުމަތްތަކުގެ ތެރޭގައި ކުޑަކުދިންނަށް ވެކްސިން ދިނުމާއި ރާއްޖެއިން ބޭރަށް ދަތުރުކުރާ މީހުންނަށް ވެކްސިން ދިނުމާއި ޖީޕީ ސާވިސް އާއި ކޮމިއުނިޓީ ސާވިސް އަދި ސައިކޯސޯޝިއަލް ސަޕޯޓް ސާވިސަސް ޔުނިޓު ހިމެނެ އެވެ.
