ރިވައިވަލް ސްޕޯޓްސްގެ ހައި ޕަފޯމަންސް ޓީމު އަދި ގައުމީ ބެޑްމިންޓަން ޓީމުގެ ޒަޔާން ޒަކީ އާއި އައިމިނަތު ނަބީހާ (ނަބީ) އަދި ފާތިމަތު ނަބާހާ (ނަބާ)، މި މަހު ޗައިނާގައި ކުރިއަށްދާ ބެޑްމިންޓަން އޭޝިއާ ޗެމްޕިއަންޝިޕްގައި ވާދަކުރަން ތައްޔާރުވެއްޖެ އެވެ.
ޗައިނާގެ ނިންބޯގައި ބެޑްމިންޓަން އޭޝިއާ ޗެމްޕިއަންޝިޕް ކުރިއަށްދާނީ މި މަހު 7-12 އަށެވެ. މި މުބާރާތުގައި، ފިރިހެން ސިންގަލްސްގައި ޒަޔާން ވާދަކުރާއިރު، އަންހެން ސިންގަލްސްގައި ވާދަކުރާނީ ނަބާ އެވެ. އަންހެން ޑަބަލްސްގައި ނަބާ އާއި ނަބީގެ ޕެއާ ވާދަކުރާއިރު، ދެން ވާދަކުރާނީ މިކްސް ޑަަބަލްސްގައި ނަބާ އާއި ޒަޔާންގެ ޕެއާ އެވެ.
ފިރިހެން ސިންގަލްސްގެ ގްރޫޕް ސީގައި ޒަޔާން ނުކުންނާނީ ސްރީލަންކާގެ ވިރޭން އާއި މަކާއުގެ ޕީ ޕުއީއާ ދެކޮޅަށެވެ. އަންހެން ސިންގަލްސްގައި ނަބާ ކުޅެން ޖެހިފައިވަނީ، ބަންގްލަދޭޝްގެ އުރްމީ އާއި ކިރްގިސްތާންގެ ޒަސްމީންއާ އެވެ. އަންހެން ޑަބަލްސްގައި، ނަބާ އާއި ނަބީގެ ޕެއާ ހިމެނެނީ، އިންޑޮނޭޝިއާގެ ޓޭ އާއި ޓިއޯގެ ޕެއާ އަދި ސްރީ ލަންކާގެ ހަސިނީ އާއި ހަސާރާގެ ޕެއާއާ އެވެ. މިކްސް ޑަބަލްސްގައި ނަބާ އާއި ޒަޔާންގެ ޕެއާ ވާދަކުރާނީ، ހޮންގް ކޮންގްގެ ޗޭން އާއި އެންޖީގެ ޕެއާ އާއި ބަންގްލަދޭޝްގެ ޖުމަރް އާއި އުރްމީގެ ޕެއާއާ އެއް ގްރޫޕެއްގަ އެވެ.
މި މުބާރާތުގައި ރިވައިވަލްގެ ކޯޗު ނަޝްފާން މުހައްމަދު ވެސް ޓީމާ އެކު ހަރަކާތްތެރިވާނެ އެވެ.
މިއީ، މި އަހަރު ރިވައިވަލްގެ ހަައި ޕަފޯމަންސް ޓީމުގައި ހިމެނޭ ގައުމީ ބެޑްމިންޓަން ޓީމުގެ ކުޅުންތެރިން ވާދަކުރާ ބައިނަލްއަގުވާމީ ދެ ވަނަ މުބާރާތެވެ. އެ ގޮތުން، މިދިޔަ ފެބްރުއަރީ މަހު ރިވައިވަލް އިން ވަނީ އަޒަރުބައިޖާންގައި ކުރިއަށްދިޔަ ޗެލެންޖް ލެވަލް މުބާރާތެއްގައި ވާދަކޮަށްފަ އެވެ.
މިދިޔަ އަހަރުގެ މެއި މަހު ބީޑަބްލިއުއެފް އިން ރާއްޖެ ސަސްޕެންޑް ކުރުމުން، އެ ސަސްޕެންޝަނާ އެއްގޮތަށް އަމަލުކުރަން ފަށައި، މިދިޔަ އަހަރުގެ ޖޫން މަހު، ޗެކް ރިޕަބްލިކާއި އިޓަލީގައި އޮތް މުބާރާތްތަކުން ރިވައިވަލް ސްޕޯޓްސް ކުޅުންތެރިން ބާކީކުރި އެވެ. އެ ގޮތަށް ބީޑަބްލިއުއެފް އިން ނިންމިއިރު، ރިވައިވަލްގެ ކުޅުންތެރިން ވަނީ ޗެކް ރިޕަބްލިކާއި އިޓަލީ މުބާރާތްތަކުން އެންޓްްރީ ވެސް ހަދައިފަ އެވެ.
ބީޑަބްލިއުއެފް އިން ރާއްޖެ ސަސްޕެންޝަނުގައި އޮއްވައި ދިން ލުޔެއްގެ ބޭނުންހިފައި ރިވައިވަލް އިން އެފްރިކާގައި ކުރިއަށްދިޔަ ބީޑަބްލިއުއެފް ތިން މުބާރާތެއްގައި ކުޅެ، ހަތް މެޑަލް ހޯދި އެވެ.
ބެޑްމިންޓަން އޭޝިއާ ޗެމްޕިއަންޝިޕް އަކީ، ނަބާ އާއި ނަބީ އަދި ޒަޔާން އަށް މި އަހަރު ކުރިއަށް ހުރި އިންޓަނޭޝަނަލް މުބާރާތްތަކުގައި ކާމިޔާބު ހޯދަން ބަލާއިރު، ރަނގަޅު ލެވަލްގެ މެޗުތަކެއް ކުޅެ، ރޭންކިންގައި ކުރިއަށް ޖެހިލަން ލިބިގެންދާ ފުރުސަތެކެވެ.
