މިލާން (އޭޕްރީލް 6) - އިޓާލިއަން ލީގުގައި ރޭ ކުޅުނު މެޗުން ރޯމާ 5-2 އިން ބަލިކޮށް އިންޓަ މިލާނުން ލީގު ތާވަލުގެ އެއް ވަނައިގައި ނުވަ ޕޮއިންޓުގެ ލީޑެއް ނެގުމަށް ފަހު ހަމަޖެހިލައިފި އެވެ.
މިއީ، ލީގުގައި އެންމެ ފަހުން އިންޓަ އިން ކުޅުނު ހަތަރު މެޗުގެ ތެރެއިން މޮޅުވި ފުރަަތަމަ ފަަހަރެވެ. އެންމެ ފަހުން ކުޅުނު ދެ މެޗުން އެއްވަރުވިއިރު، އޭގެ ކުރިން ކުޅުނު މެޗުން ވީ ބައްޔެވެ. އިންޓަ އަށް ވަނީ 31 މެޗުން 72 ޕޮއިންޓް ލިބިފަ އެވެ. ދެ ވަނައިގައި އޮތް އޭސީ މިލާނަަށް 63 ޕޮއިންޓް ލިބިފައިވާއިރު، ތިން ވަނައިގައި އޮތް ނަޕޯލީ އަށް ވަނީ 30 މެޗުން 62 ޕޮއިންޓް ލިބިފަ އެވެ.
ލީގުގައި މިރޭ ނަޕޯލީން އަމިއްލަ ދަނޑުގައި އޭސީ މިލާނާ ބައްދަލުކުރާނެ އެވެ. ލީގުގެ ހަތަރެއްގައި އޮތް ކޯމޯ އިން ރަށުންބޭރުގައި ކުޅޭނީ އުދިނޭޒީއާ އެވެ.
އިންޓަ އިން ރޭގެ މެޗުގެ ފުރަތަމަ މިނިޓްގައި ވަނީ ލަނޑު ޖަހައިފަ އެވެ. މިއީ، މާކަސް ތުރާމް އަރިމަތިން ބޯޅަ ހިފައިގެން ވަދެ، ނަގައިދިން ހުރަހަކަށް އަރައި އެއް ފަހަރުން ބޯޅަ ގޯލަށް ފޮނުވާލައިގެން، ލައުޓާރޯ މާޓީނޭޒް ޖެހި ގޯލެކެވެ. މެޗުގެ 12 ވަނަ މިނިޓްގައި މާޓީނޭޒް ޖެހި ޝޮޓެއް ރޯމާގެ ކީޕަރު މައިލް ޒްވީލާ ވަނީ މަތަކޮށްފަ އެވެ.
ރޯމާ އަށް އެއްވަރުކޮށްދޭން ޑޮންޔެލް މާލެން ބޮލުން ފޮނުވާލި ބޯޅަ އިންޓަގެ ކީޕަރު ޔެން ސޮމާ ވަނީ މަތަކޮށްފަ އެވެ. ރޯމާ އިން އެއްވަރުކުރީ 40 ވަނަ މިނިޓްގައި އޭރިއާތެރެއިން ބޮލުން ގޯލަށް ބޯޅަ ފޮނުވާލައިގެން ޖިއަންލޫކާ މަންޗިނީ ޖެހި ގޯލުންނެވެ. އެކަމަކު، ފުރަތަމަ ހާފު ނިމުމުގެ ކުރިން އިންޓަ އިން އަލުން ލީޑުނެގި އެވެ. މިއީ، ހާފުގެ މެދެއްހާ ހިސާބުން ތުރުކީގެ މިޑްފީލްޑަރު، ހަކަން ޗަނޮނޯލޫ ގޯލުގެ މަތީ ދާގަނޑަށް ބޯޅަ އަމާޒުކޮށްލައިގެން ޖެހި ގޯލެކެވެ.
ދެ ވަނަ ހާފުގެ ކުޅުން ފެށިގެން ހަ ވަަނަ މިނިޓްގައި ތުރާމް ދިން ބޯޅައަކުން މާޓީނޭޒް ވަނީ އިންޓަގެ ތިން ވަނަ ލަނޑު ޖަހައިފަ އެވެ. މި ލަނޑު ޖެހިތާ ދެ މިނިޓް ފަހުން، ކޯނަރަކުން ހުރަސްވި ބޯޅައެއް ބޮލުން ގޯލަށް ފޮނުވާލައި، ތުރާމް ވަނީ އިންޓަގެ ހަތަރު ވަނަ ލަނޑު ޖަހައިފަ އެވެ. އިންޓަގެ ފަސް ވަނަ ލަނޑު ޖެހީ، 62 ވަނަ މިނިޓްގައި އޭރިއާތެެރެއިން ގޯލަށް ބޯޅަ ފޮނުވާލައިގެން ނިކޯލޯ ބަރެއްލާ އެވެ.
ރޯމާ އިން ދެ ވަނަ ލަނޑު ޖެހީ މެޗުގެ 70 ވަނަ މިނިޓްގަ އެވެ. މިއީ، މާލެން ބޯޅަ ހިފައިގެން އޭރިއާތެރެއަށް ވަން ވަގުތު އޭނަ ހުއްޓުވަން އިންޓަ ޑިފެންޑަރުން މަސައްކަތްކުރި ވަގުތު ތަނަވަސްވި ފުރުސަތެއްގައި ލޮރެންޒޯ ޕެލެގްރީނީ ޖެހި ގޯލެކެވެ.
