ނޭޕްލްސް، އިޓަލީ (އޭޕްރީލް 7) - އިޓާލިއަން ލީގުގައި ރޭ ފަހު ވަގުތު ގޯލު ޖަހައި، އެންމެ ފަހުގެ ޗެމްޕިއަން، ނަޕޯލީން 1-0 އިން އޭސީ މިލާން ބަލިކޮށް ލީގުގެ ދެ ވަނަ މަގާމަށް ޖެހިލައިފި އެވެ.
މި ނަތީޖާއާ އެކު، ނަޕޯލީން ތަށި ދިފާއުކުރަން ކުރާ މަސައްކަތުގައި ކުޑަ އުންމީދެއް ވަނީ ލިބިފަ އެވެ. ލީގުގައި މި ހަފްތާގައި ކުޅުނު މެޗުން ރޯމާ ބަލިކޮށް އިންޓަ މިލާނުން ލީގުގެ އެއް ވަނައިގައި ނުވަ ޕޮއިންޓުގެ ލީޑެއް ނެގި ނަމަވެސް، ރޭ ނަޕޯލީ ނެރުނު ނަތީޖާއާ އެކު، އިންޓަގެ ލީޑު ވަނީ ހަތް ޕޮއިންޓަށް ކުޑަވެފަ އެވެ.
އިންޓަ އިން އެއް ވަނައިގައި އޮތީ 31 މެޗުން 72 ޕޮއިންޓް ހޯދައިގެންނެވެ. ދެ ވަނައިގައި އޮތް ނަޕޯޯލީ އަށް 31 މެޗުން 65 ޕޮއިންޓް އަދި ތިން ވަނައިގައި އޮތް އޭސީ މިލާނަށް ވަނީ 31 މެޗުން 63 ޕޮއިންޓް ލިބިފަ އެވެ. އަދި، ހަތަރެއްގައި އޮތް ކޯމޯގެ އޮތީ 31 މެޗުން 58 ޕޮއިންޓެވެ.
ރޭ ޖެނޯއާ އަތުން 2-0 އިން މޮޅުވި ޔުވެންޓަސް އިން ފަސް ވަނައިގައި އޮތީ 31 މެޗުން 57 ޕޮއިންޓް ހޯދައިގެންނެވެ.
ނަޕޯލީގެ ޑިއޭގޯ އަރްމާންޑޯ މަރަޑޯނާ ސްޓޭޑިއަމްގައި ރޭ ކުޅުނު މެޗުގައި މިލާނުގެ ޔޫސުފް ފޮފާނާ ފޮނުވާލި ބޯޅައެއް ނަޕޯލީގެ ކީޕަރު، ވަންޖާ މިލިންކޮވިޗް-ސަވިޗް ވަނީ މަތަކޮށްފަ އެވެ. އަނެއްކޮޅުން، ނަޕޯލީގެ ލެއޮނާޑޯ ސްޕިނަޒޯލާ ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ. އޭގެ އިތުރުން، ނަޕޯލީގެ ޖިއޮވާނޭ ފޮނުވާލި ހަމަލާއެއް ބްލޮކްވިއިރު، އެ ޓީމުގެ ސްކޮޓް މެކްޓޮމިނޭ ފޮނުވާލި އޯވަހެޑްކިކް ވެސް ދިޔައީ ދަނޑިކައިރިންނެވެ.
ނަޕޯލީގެ ކޯޗު އެންޓޯނިއޯ ކޮންޓޭ ވަނީ ނަތީޖާ ނެރުމަށްޓަކައި، އެ ޓީމުގެ ބެންޗުގައި އިން، މަޓެއޯ ޕޮލިޓާނޯ އާއި އަލިސަން ސަންޓޯސް ކުޅެން ނެރެފަ އެވެ. އެ ދެ ކުޅުންތެރިންގެ ބައިވެރިވުމާ އެކު، މެޗުން ނަޕޯލީ މޮޅުވި ލަނޑު ކާމިޔާބުކުރީ 79 ވަނަ މިނިޓްގަ އެވެ. މެޗުގެ ފުރިހަމަ ވަގުތު ހަމަވާން 11 މިނިޓަށް ވެފައި ހުއްޓައި، ޕޮލިޓާނޯ އަށް ލިބުނު ފުރުސަތުގައި އޭނާ ވަނީ މިލާންގެ ކީޕަރު މައިކް މައިންނޯން ކައިރިން ގޯލަށް ބޯޅަ ފޮނުވާލައިފަ އެވެ.
މިލާނަށް އެއްވަރުކޮށްދޭން ސަންޓިއާގޯ ޖިމެނޭޒް ފޮނުވާލި ބޯޅަ މާ ބޮޑު ނުރައްކަލަކަށް ނުވެދިޔައިރު، ނަޕޯލީ ޑިފެންޑަރުން ވަނީ ލީޑު ހިފެހެއްޓުމުގައި ރަނގަޅު މަސައްކަތެއްކޮށް، ލީގުގައި ކުރިއަށްދާން މި މެޗުގެ މުހިންމު ތިން ޕޮއިންޓް ކަށަވަރުކޮށްފަ އެވެ.
