ހުސްވި ހިތަދޫ އުތުރު ދާއިރާގެ މަޖިލިސް ގޮނޑިއަށް ވާދަކުރާ ޕީއެންސީގެ ކެންޑިޑޭޓު ކަނޑައެޅުމަށް ބާއްވާ ޕްރައިމަރީގައި އެ ދާއިރާގެ ކުރީގެ މެންބަރު މުހައްމަދު ސިނާނު އާއި ހިތަދޫ މޫލެކެޑެ ދާއިރާގެ ކައުންސިލަރު އަހްމަދު ސައީދު ވާދަކުރައްވަން ނިންމަވައިފި އެވެ.
ޕީއެންސީން ހިތަދޫ އުތުރު ދާއިރާގެ ބައި-އިލެކްޝަންގެ ޕްރައިމަރީއަށް ހުޅުވާލުމުން ސުންގަޑި ހަމަވިއިރު ފޯމު ހުށަހެޅި މީހުންގެ ތެރެއިން ޝަރުތު ހަމަވާ ކަމަށް ކަނޑައެޅީ ސިނާނު އާއި ސައީދު އެކަންޏެވެ.
ހިތަދޫ އުތުރު ދާއިރާގެ ގޮނޑި ސިނާނުއަށް ގެއްލުނީ ސާބިތު ދަރަނީގެ މައްސަލައެއްގަ އެވެ. އެ މައްސަލައިގައި ސުޕްރީމް ކޯޓުން ކަނޑައެޅީ އޭނާގެ ގޮނޑި ގެއްލިފައިވާ ކަމަށެވެ.
ޕްރައިމަރީގައި ސިނާނުއާ ދެކޮޅަށް ނުކުންނަ ސައީދުއަކީ ނިމިދިޔަ ކައުންސިލް އިންތިހާބުގައި މޫލެކެޑެ ދާއިރާގެ ކައުންސިލަރުކަމަށް ވާދަކުރައްވާ ނާކާމިޔާބުވެފަ އެވެ. އިންތިހާބުގައި ސައީދުއަށް 583 ވޯޓު ލިބުނުއިރު، އޭނާއާ ވާދަކޮށް މޮޅުވި އެމްޑީޕީގެ ކެންޑިޑޭޓް އަހްމަދު ނަޒީރުއަށް ލިބުނީ 592 ވޯޓެވެ.
ބައި-އިލެކްޝަންގެ ޕީއެންސީ ޕްރައިމަރީ ބޭއްވުމަށް ހަމަޖެހިފައިވަނީ އެޕްރީލް 25، ވާ ހޮނިހިރު ދުވަހު ހެނދުނު 09:00 އިން ފެށިގެން ހަވީރު 16:00 ޖެހުމާ ހަމައަށް ކަމަށް އެ ޕާޓީން ބުންޏެވެ.
ޕްރައިމަރީގައި ވޯޓުލެވޭނީ އިންތިހާބުގައި ވޯޓުލުމަށް ހިތަދޫ އުތުރު ދާއިރާގައި އަދި ވެރިރަށް މާލޭގައި ޕީއެންސީން ބަހައްޓާ ވޯޓި ފޮށިތަކަށް އެކަންޏެވެ.
ޕީއެންސީން ބުނީ އިންތިހާބުގެ ހުރިހާ ކަމެއް ރާވައި ހިންގާނީ އެ ޕާޓީގެ އިންތިހާބީ ކޮމިޓީން ކަމަށާއި އިންތިހާބު ބޭއްވުމަށް ބޭނުންވާ އިންތިޒާމުތަކާއި، އަމަލުކުރަންޖެހޭ އުސޫލުތައް އެ ކޮމިޓީގެ ފަރާތުން އާންމުކޮށް އިއުލާން ކުރާނެ ކަމަށެވެ.
ސިނާނުގެ މެންބަރުކަން ގެއްލިއްޖެ ކަމަށް ސުޕްރީމް ކޯޓުން ކަނޑައެޅީ ސާބިތު ދަރަންޏެއް އޮވެ، އެ ދަރަންޏާ އެއްގޮތަށް ފައިސާ ދައްކާފައި ނުވާ މައްސަލަ ބެއްލެވި ބެންޗުގައި ތިއްބެވި ފަސް ފަނޑިޔާރުންގެ އިއްތިފާގުންނެވެ. އެ ބެންޗުގެ ރިޔާސަތު ބެލެހެއްޓެވީ ފަނޑިޔާރު އައިޝާ ޝުޖޫން މުހައްމަދު އެވެ.
އޭނާގެ ރައުޔަށް ފަނޑިޔާރު އަލީ ރަޝީދު ހުސައިން، ފަނޑިޔާރު ޑރ. މުހައްމަދު އިބްރާހިމް، ފަނޑިޔާރު ހުސައިން ޝަހީދު އަދި ފަނޑިޔާރު މުހައްމަދު ސަލީމް ތާއިދު ކުރެއްވި އެވެ.
މިއީ އެންމެ މަތީ ކޯޓުގެ ހުކުމަކާއެކު ވިހިވަނަ މަޖިލީހުގެ މެންބަރެއްގެ ގޮނޑި ގެއްލުނު ފުރަތަމަ ފަހަރެވެ.
ހުކުމާ އެއްގޮތަށް ސިނާނު ނުދެއްކީ މޯލްޑިވްސް އިސްލާމިކް ބޭންކުން ނަގާފައި އޮތް ފަސް މިލިއަން ރުފިޔާގެ ލޯނެކެވެ. އެ ލޯނު އޭނާ އަދާ ކުރީ އެ މައްސަލަ ސުޕްރީމް ކޯޓަށް ވެއްދުމުނެވެ. އެހެންކަމުން، އޭނާއަށް ވެސް އަލުން މަޖިލިސް މެންބަރުކަމަށް ކުރިމަތިލެވޭނެ އެވެ.
ހިތަދޫ އުތުރު ދާއިރާގެ ބައި އިލެކްޝަން ބާއްވަން އިލެކްޝަންސް ކޮމިޝަނުން ނިންމާފައި ވަނީ ޖޫން 6، ގަ އެވެ. އެ އިންތިހާބުގައި ވާދަކުރުމުގެ ސުންގަޑިއަކީ އޭޕްރިލް 29، ގެ ހަވީރު 3:00 އެވެ.
