ސަރުކާރު ކުންފުނިތަކުގައި މަސައްކަތް ކުރާ މުވައްޒަފުންގެ އަދަދު 33 ޕަސެންޓު މަދުކުރުމަށް ފިނޭންސް މިނިސްޓްރީން ކުންފުނިތަކަށް ކުއްލި ގޮތަކަށް އެންގުމާ ގުޅިގެން އެތައް ހާސް ބައެއްގެ ވަޒީފާ ގެއްލޭނެތީ ހުށަހެޅި ކުއްލި މައްސަލައަށް ބަހުސް ނުކޮށް ރައްޔިތުންގެ މަޖިލީހުން ބޭރުކޮށްލައިފި އެވެ.
މިއަދުގެ މަޖިލިސް ޖަލްސާއަށް މި މައްސަލަ ހުށަހެޅުއްވީ ހުޅުމާލެ ދެކުނު ދާއިރާގެ މެންބަރު އަހުމަދު ޝަމްހީދު އެވެ. އެ މައްސަލައަށް ބަހުސް ކުރުމަށް ވޯޓު ދެއްވީ 12 މެންބަރުންނެވެ. މައްސަލަ ބޭރުކޮށްލަން ޖެހުނީ 39 މެންބަރުން ބަހުސް ކުރުމާ ދެކޮޅަށް ވޯޓު ދެއްވުމުންނެވެ.
އެ މައްސަލާގައި ބުނެފައިވާ ގޮތުގައި ރާއްޖޭގެ އިގުތިސޯދު ދަށްވެ، ރައްޔިތުންނަށް ދަތިވަމުންދާ ވަގުތެއްގައި ގިނަ ބަޔަކު ވަޒީފާއިން ވަކިކުރުމަކީ އާއިލާތަކަށް ސީދާ މާލީ ބޮޑު ގެއްލުމެއް ލިބޭނެ ކަމެކެވެ. ހަމައެހެންމެ، ރާއްޖޭގެ އަމިއްލަ ސެކްޓަރުގައި އެކަށީގެންވާ ވަރަށް ވަޒީފާ އުފެދިފައި ނުވަނީސް ސަރުކާރު ވަޒީފާތަކުން މީހުން ވަކިކުރުމަކީ ބޮޑު ނުރައްކަލެއް ކަމަށް އެ މައްސަލާގައި ބުނެފައިވެ އެވެ.
އޭގެ އިތުރުން، ދައުލަތުގެ ހަރަދު ކުޑަކުރަން ފަށަންވާނީ އާދައިގެ މުވައްޒަފުން ވަޒީފާއިން ވަކިކޮށްގެން ނޫންކަމަށާއި، ސިޔާސީ މަގާމުތަކާއި އެހެނިހެން ބޮޑެތި ހަރަދުތަކުންކަން ބަޔާންކޮށްފައިވެ އެވެ.
ސަރުކާރު ކުންފުނިތަކުގައި ތިބި މުވައްޒަފުންގެ އަދަދު މަދުކުރަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) މެދުވެރިކޮށް އެ ކުންފުނިތަކަށް އެންގީ، މެދުއިރުމަތީގައި ހިނގަމުންދާ ހަނގުރާމައާ ގުޅިގެން އަޅަން ނިންމާފައިވާ ހަރަދު ކުޑަކުރުމުގެ ފިޔަވަޅެއްގެ ގޮތުގަ އެވެ.
އެ ގޮތުން ސަރުކާރުން ކުންފުނިތަކަށް އަންގާފައި ވަނީ ހިންގުމުގެ ހަރަދުތައް ކުޑަކުރުމުގެ ގޮތުން މިހާރު ތިބި މުވައްޒަފުންގެ އަދަދު މަދުކުރުމަށާއި ކޮންމެހެން ބޭނުން ނުވާ ވަޒީފާތަކަށް މީހުން ނުނެގުމަށެވެ.
އެ ކުންފުނިތަކުގައި 42،000 އަށް ވުރެ ގިނަ މުވައްޒަފުން ތިބި ކަމަށް އަންދާޒާ ކުރެވޭ ކަމަށް ފިނޭންސް މިނިސްޓަރު މޫސާ ޒަމީރު އިއްޔެ ވިދާޅުވި އެވެ. އެ އަދަދުން ހިސާބުކުރާއިރު، ސީދާ 33 ޕަސެންޓު މުވައްޒަފުން ކަނޑާނަމަ، 13،000 އަށް ވުރެ ގިނަ މީހަކަށް ވަޒީފާ ގެއްލުމުގެ ބިރު އެބައޮތެވެ.
ޕީސީބީން ޝާއިއުކޮށްފައިވާ އެނުއަލް ސެކްޓާ ރިޕޯޓު 2024 ގައިވާ ގޮތުގައި، މި ސަރުކާރުގެ ދައުރު ފެށުނު 2023 ވަނަ އަހަރު ނިމުނުއިރު ސަރުކާރު ކުންފުނިތަކުގައި ތިބީ 35,000 މުވައްޒަފުންނެވެ.
މިހާރު ކުންފުނިތަކުގައި ތިބި ކަމަށް ބުނާ އަދަދަކީ އަސްލު އަދަދު ނަމަ، އެ ފަހުން މިވީ ދެ އަހަރާއި ތިން މަސް ދުވަހުގެ ތެރޭގައި އެސްއޯއީތަކުން ވަނީ 12،000 ވަޒީފާ އުފައްދާފަ އެވެ. މިއީ ކުންފުނިތަކުން މަދުކުރަން ބޭނުންވެގެން އުޅޭ 13،000 އާ ގާތްކުރާ އަދަދެކެވެ.
