ސްކޫލްތަކުގެ މެދުގައި ބާއްވާ އިންޓަ ސްކޫލް ކުޅިވަރު މުބާރާތްތަކުގައި ގްރޭޑް 7 އިން ދަށުގެ ކުދިންނަށް ނުކުޅެވޭ ގޮތަށް އެޑިއުކޭޝަން މިނިސްޓްރީން އެކުލަވާލި އުސޫލުތަކާ މެދު ގައުމީ ކުޅިވަރު އެސޯސިއޭޝަންތަކުން ސްޕޯޓްސް މިިނިސްޓްރީ އަށް ކަންބޮޑުވުންތައް ހިއްސާކުރުމާ އެކު، އެ މިނިސްޓްރީން އެޑިއުކޭޝަން މިނިސްޓްރީއާ އެކު މަޝްވަރާތައް ފަށައިފި އެވެ.
މިދިޔަ މަހުގެ 29 ވަނަ ދުވަހު އެޑިއުކޭޝަން މިނިސްޓްރީގެ ސާކިއުލާ ސިޓީއެއްގައި ބުނެފައިވަނީ، އިންޓަ ސްކޫލް ލެވަލްގައި، "14 (ސާދަ) އަހަރުން ދަށުގެ އުމުރުފުރާގައި ބައިވެރިވާނީ ގްރޭޑް 7 އިން ފެށިގެން މަތީގެ ދަރިވަރުންނެވެ" މިހެނެވެ. އެޑިއުކޭޝަން މިނިސްޓްރީގެ މި ނިންމުމާ އެކު، ގްރޭޑް 7 އިން ދަށަށް އިންޓަ ސްކޫލްގެ މުބާރާތްތައް ބޭއްވުމުގެ ފުރުސަތު އެސޯސިއޭޝަންތަކަށް ގެއްލުނީ އެވެ. އަދި، އިންޓަ ސްކޫލް މުބާރާތްތައް މީގެ ކުރިން ބާއްވަމުން އައި 12 އަހަރުން ދަަށުގެ ކެޓަަގަރީ ފަދަ މުހިންމު އުމުރުފުރާއެއްގައި، އަދި އޭގެއިން ދަށް އުމުރުގެ ކުދިން ކުޅިވަރު ކުޅުންތެރިން ގޮތަށް ޑިވެލޮޕްކުުރުމުގެ ފުރުސަތު ކުޅިވަރު އެސޯސިއޭޝަންތަކަށް ގެއްލިދިޔައީ އެވެ.
މި މައްސަލަައިގައި ކުޅިވަރު އެސޯސިއޭޝަންތަކުން އެޑިއުކޭޝަނާ ވާހަކަ ދައްކައިގެން ހައްލެއް ހޯދަން މަސައްކަަތްކުރި އެވެ. އެކަމަކު، އެކަށީގެންވާ ކުރިއެރުމެއް ނުލިބުމުން، އެ ހުރިހާ ޝަކުވާތަކެއް ހިފައިގެން، ކުޅިވަރު އެސޯސިއޭޝަންތަކުން ދިޔައީ ސްޕޯޓްސް މިނިސްޓްރީ އަށެވެ.
އެޑިއުކޭޝަން މިނިސްޓްރީގެ ނިންމުމަކާހެދި ކުޅިވަރުގެ ކުރިމަގު ބަނަ
އިންޓަ ސްކޫލް މުބާރާތްތަކުގައި ބައިވެރިވެވޭނީ ގްރޭޑް 7 އިން މަތީގެ ދަރިވަރުންނަށް ކަމަށް އެޑިއުކޭޝަން މިނިސްޓްރީން ނިންމުމާ ގުޅިގެން، ކުދިން ކުޅިވަރުގެ ތެރެއިން ތަމްރީނުކުރުމަށް ގޮންޖެހުން ވަނީ ބޮޑުވެފައި. ކުޅިވަރު އެސޯސިއޭޝަންތަކުގެ އިސް ފަރާތްތަކުން "އަދަދު ސްޕޯޓްސް" އަށް ބުނީ މިއީ ކުޅިވަރުގެ މުސްތަގުބަލަށް ބޮޑު ދެރައެއް ލިބޭ ނިންމުމެއް ކަމަށް
"އަދަދު ސްޕޯޓްސް" އަށް ސްޕޯޓްސް މިނިސްޓްރީގެ އޮފިޝަލް ވިދާޅުވީ، އެސޯސިއޭޝަންތަކުގެ ގިނަ ކަންބޮޑުވުންތަކެއް މި ކަމާ ގުޅިގެން ސްޕޯޓްސް މިނިސްޓްރީ އަށް ލިބިފައިވާ ކަމަށެވެ. އަދި، އެސޯސިއޭޝަންތަކުން ފާހަގަކުރާ ގޮުތުގައި، އިންޓަ ސްކޫލްގެ 12 އަހަރުން ދަށާއި 10 އަހަރުން ދަށުގެ އުމުރުފުރާ އަކީ އެންމެ ގިނަ ކުދިން ބައިވެރިވާ އުމުރުފުރާ ކަމަށްވާއިރު، ޅަ އުމުރުގައި ކުދިންގެ ހުނަރު ދެނެގަނެ، ޖޫނިއާ ގައުމީ ޓީމުތައް އެކުލަވާލުމާއި، އެކަޑަމީތަކަށް ވެސް ހުނަރުވެރި ކުދިން ދެނެގަންނަން (ޓެލަންޓް ހަންޓް) ކުރަން އެންމެ އެކަށޭނެ އުމުރުފުރާ އަކީ އެއީ ކަމަށެވެ. އެ ހުރިހާ ކަމަކަށް އަލިއަޅުވާލައި، ސްޕޯޓްސް މިނިސްޓްރީން މިހާރު އެޑިއުކޭޝަން މިނިސްޓްރީއާ ވާހަކަ ދައްކަމުން އަންނަ ކަމަށް އޮފިޝަލް ވިދާޅުވި އެވެ.
"އަޅުގަނޑުމެން މިހާރު އެޑިއުކޭޝަން މިނިސްޓްރީއާ އެކު، މި ކަމުގައި އެސޯސިއޭޝަންތަކުގެ ކަންބޮޑުވުންތަކުގެ ހައްލެއް ހޯދަން ޕޮލިސީ ލެވަލްގައި މި ދަނީ މަޝްވަރާ ކުރަމުން،" އޮފިޝަލް ވިދާޅުވި އެވެ.
އެޑިއުކޭޝަން މިނިސްޓްރީން އިންޓަ ސްކޫލްގެ އުމުރުފުރާ ކަނޑައެޅުމުގައި އެންމެ ބޮޑަށް އަލި އަޅުވާލި ކަމަކީ، ކުޅުންތެރިންގެ ކިޔެވުމުގެ ކަންކަމަށް ކުޅިވަރު މުބާރާތްތައް ގިނަވުމުގެ ސަބަބުން ނޭދެވޭ އަސަރު ކުރާ ކަމަށް ބުނެ އެވެ. އަދި، ގިނަ އަދަަދެއްގެ ކުޅިވަރު މުބާރާތްތަކެއްގައި ކުދިން ޝާމިލުވެ އުޅޭއިރު، އެކަމަށްޓަކައި ސްކޫލްތަކުގެ ޓީޗަރުން ވެސް ބައިވެރިވެ އުޅެން ޖެހޭ ވަގުތުތައް ގިނަވާތީ އެވެ.
ކުޅިވަރުގެ ކަންކަމުގައި އެޑިއުކޭޝަން މިނިސްޓްރީން މި ފަހުން އެސޯސިއޭޝަންތަކާ އެކި ކަންކަމާ ވާހަކަ ދެއްކިއިރު، ކުދިން އެކި ގްރޭޑްތަކުގައި ފާސްވާ ނިސްބަތް ވެސް ހިއްސާކޮށްފައިވެ އެވެ. އަދި، އެޑިއުކޭޝަން މިނިސްޓްރީން ކުޅިވަރުގެ ކަންކަމުގައި މި ނިންމާނިންމުންތަކަކީ އެކަމުގެ ސަބަބުން އަންނަ ކަމެއް ކަމަށް ވެސް ބުނެފައި އެބަހުއްޓެވެ.
ސަރަހައްދީ އެހެނިހެން ގައުމުތަކުން ސްކޫލްތަކާއި ޔުނިވާސިޓީ ތަކާއި އެކަޑަމީ ލެވަލްގައި ގިނަ މުބާރާތްތަކެއް ބާއްވައި، ޖޫނިއާ ލެވަލް އިން ފެށިގެން މުސްތަގުބަލަށް ރަނގަޅު ގައުމީ ޓީމުތަކެއް ބިނާކުރަން މަަސައްކަތްކުރާއިރު، ރާއްޖޭގައި ވަކި އުމުރުފުރާތަކަށް އޮތް ފުރުސަތު ހަނިވުމަކީ، ކުޅިވަރުގެ ތަރައްގީ އަށް އެޅޭ ހުރަހެކެވެ. އެކަން ރާއްޖޭގެ ކުޅިވަރުގައި ގިނަ އަހަރުތަކެއް ވަންދެން މަސައްކަތްކޮށް، ގައުމަށް ރީތި ނަން ހޯދައިދީފައިވާ ގިނަ އެތުލީޓުން ވެސް ވަނީ ފާހަގަކޮށްފަ އެވެ.
ރާއްޖޭގެ ސްކޫލްތަކަށް ބާއްވަމުން އަންނަ ކުޅިވަރު މުބާރާތްތަކުގައި ބޭނުންކުރި އިންޓަ ސްކޫލްގެ ނަން، ރާއްޖެ ޖޫނިއާ ޗެމްޕިއަންޝިޕަށް ވަނީ ބަދަލުކޮށްފަ އެވެ.
އިންޓަ ސްކޫލްގެ ބަދަލުގައި ދެން އޮންނާނީ ރާއްޖެ ޖޫނިއާ ޗެމްޕިއަންޝިޕް
ރާއްޖޭގެ ސްކޫލްތަކުގެ މެދުގައި ބާއްވާ ކުޅިވަރު މުބާރާތްތަކަށް ކިޔަމުން އައި "އިންޓަ ސްކޫލް" ނަން "ރާއްޖެ ޖޫނިއާ ޗެމްޕިއަންޝިޕް" އަށް ބަދަލުކޮށް، އެކި ރީޖަންތަކަށް ބަހާލައިގެން މުބާރާތްތައް ބޭއްވުމަށް އެޑިއުކޭޝަން މިނިސްޓްރީން ވަނީ ކުޅިވަރު އެސޯސިއޭޝަންތަކާ ގުޅިގެން ކުރި މަޝްވަރާތަކަށް ފަހު ނިންމާފައި.
